ព័ត៌មានជាតិ

អភិបាលខណ្ឌឫស្សីកែវ បន្តចុះត្រួតពិនិត្យការដ្ឋាន ស្ដារសម្អាតប្រឡាយកុំឲ្យជន់លិច

បានផុស

៥ ខែ មុន

នៅ

ថ្ងៃពុធ ២៤ កក្កដា ២០២៤

ដោយ

អ៊ិន ពិសី

អភិបាលខណ្ឌឫស្សីកែវ បន្តយកចិត្តទុកដាក់ចុះស្ដារប្រឡាយសម្អាតរាល់កម្ទេចកាកសំណល់ ដើម្បីបញ្ចៀសរាល់បញ្ហាជន់លិច ក្នុងមូលដ្ឋាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការស្ដារប្រឡាយនេះដែរ បានជួយរំដោះប្រព័ន្ធទឹកក្នុងភូមិសាស្ត្រខណ្ឌឫស្សីកែវទាំងមូល និងទឹកបើកមកពីខណ្ឌទាំង ៥ ផ្សេងទៀត ដែលហូរចេញពីតាមរយៈស្ថានីយបូមទឹកទួលគោក។

លោក ជិន ប៊ុនធឿន អភិបាលខណ្ឌឫស្សីកែវ បានឲ្យដឹងថា លោកបានដាក់បទបញ្ជាទៅកាន់ក្រុមការងារជំនាញពាក់ព័ន្ធ បន្តដាក់គ្រឿងចក្រស្ដារតាមប្រឡាយ និងព្រែក ក្នុងមូលដ្ឋានខណ្ឌមានដូចជា ប្រព័ន្ធបង្ហូរព្រែកអូរវែង,ព្រែកបាក់ទូក ដែលជាប្រព័ន្ធបង្ហូររំដោះទឹកដ៏សំខាន់។ បើគិតត្រឹមថ្ងៃទី ២២ ខែកក្កដា ឆ្នាំ ២០២៤ រដ្ឋបាលខណ្ឌឫស្សីកែវ បាននិងកំពុងស្ដារសម្អាត ហើយប្រព័ន្ធលូបង្ហូរក្នុងភូមិសាស្ត្រសង្កាត់ទាំង ០៧ របស់ខណ្ឌ ក៏ត្រូវបានស្ដារសម្អាតទាំងអស់ឡើងវិញផងដែរ។

លោកអភិបាលខណ្ឌ ក៏បានស្នើឲ្យម្ចាស់ដីនៅសងខាងព្រែកអូវែងទាំងអស់ សូមបញ្ឈប់ជាបន្ទាន់ រាល់សកម្មភាពចាក់ដីរំលោភយកចំណីព្រែក ប្រើប្រាស់ជាប្រយោជន៍ឯកជន។ បន្ថែមនោះ ម្ចាស់ដីត្រូវសហការជាមួយអាជ្ញាធរមានសមត្ថកិច្ច មកជួយកំណត់ព្រំដីរបស់ខ្លួនជាប់ដីចំណីព្រែកឲ្យបានច្បាស់លាស់ និងត្រូវរុះរើចេញជាបន្ទាន់នូវបណ្ដាសំណង់ដែលបានសង់លើដីចំណីព្រែកអូវែង បើមិនដូច្នោះទេ លោកនឹងបញ្ជាឲ្យអាជ្ញាធរចាត់វិធានការតាមផ្លូវច្បាប់៕

អត្ថបទ ៖ រដ្ឋា