ព័ត៌មានជាតិ

គម្រោងស្ដីពី“ការពង្រីករបបសន្តិសុខសង្គមសម្រាប់បុគ្គលស្វ័យនិយោជន៍” បានបិទបញ្ចប់

បានផុស

៨ ខែ មុន

នៅ

ថ្ងៃសុក្រ ២៦ កក្កដា ២០២៤

ដោយ

គម្រោងស្ដីពី “ការពង្រីករបបសន្តិសុខសង្គមសម្រាប់បុគ្គលស្វ័យនិយោជន៍” ដែលសហការរៀបចំដោយបេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈអង្គការហ្គ្រេត (GRET) បានបិទបញ្ចប់ បន្ទាប់ពីបានអនុវត្តកាលពីថ្ងៃទី ២៧ ខែមីនា ឆ្នាំ ២០២៣ កន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសិក្ខាសាលាបិទបញ្ចប់គម្រោងស្តីពី “ការពង្រីករបបសន្តិសុខសង្គមសម្រាប់បុគ្គលស្វ័យនិយោជន៍” នៅថ្ងៃទី ២៦ កក្កដានេះ លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស. និងជាប្រធានគណៈកម្មការសម្របសម្រួលគម្រោង បានលើកឡើងថា សិក្ខាសាលានេះរៀបចំឡើងក្នុងគោលបំណងបង្ហាញអំពីសមិទ្ធផលសម្រេចបាន ឧត្តម្មានុវត្ត និងបទពិសោធ នៃការអនុវត្តគម្រោង។ ការកំណត់អនុសាសន៍គន្លឹះ និងការស្វែងរកវិធីសាស្ត្រក្នុងការពង្រឹងភាពជាដៃគូសម្រាប់ការអនុវត្តរបបសន្តិសុខសង្គម។

លោកបណ្ឌិត បានបន្ថែមទៀតថា គម្រោងខាងលើនេះ គឺជាផ្នែកមួយដ៏សំខាន់ ក្នុងការរួមចំណែក អនុវត្តសកម្មភាពឆ្ពោះទៅការអភិវឌ្ឍ និងការកសាងប្រព័ន្ធគាំពារសង្គម អនុលោមតាមការចង្អុលបង្ហាញរបស់ក្របខណ្ឌគោលនយោបាយជាតិគាំពារសង្គម ២០១៦-២០២៥, យុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ២០២៣-២០២៨, ផែនទីបង្ហាញផ្លូវឆ្ពោះទៅការគ្របដណ្តប់សុខភាពជាសកលនៅកម្ពុជា ២០២៤-២០៣៥ និងយុទ្ធសាស្ត្របញ្ចកោណដំណាក់កាលទី ១ របស់រាជរដ្ឋាភិបាលកម្ពុជា។

គួររំលឹកថា បេឡាជាតិសន្តិសុខសង្គម (ប.ស.ស.) នៃក្រសួងការងារ និងបណ្តុះបណ្តាលវិជ្ជាជីវៈ និងអង្គការហ្គ្រេត (GRET) បានចុះអនុស្សរណៈ នៃការយោគយល់គ្នាសម្រាប់អនុវត្តគម្រោងស្តីពី “ការពង្រីករបបសន្តិសុខសង្គមសម្រាប់បុគ្គលស្វ័យនិយោជន៍” (គម្រោង A4S) កាលពីថ្ងៃទី ២៧ ខែមីនា ឆ្នាំ ២០២៣ កន្លងទៅ ក្នុងគោលបំណងដើម្បីផ្តល់កិច្ចសហប្រតិបត្តិការ រវាង ប.ស.ស. និងអង្គការហ្គ្រេត (GRET) សម្រាប់ពង្រីកវិសាលភាពនៃការអនុវត្តរបបសន្តិសុខសង្គមផ្នែកថែទាំសុខភាពជូនដល់បុគ្គលស្វ័យនិយោជន៍ និងបុគ្គលដែលមិនទាន់បានគ្របដណ្តប់ក្នុងរបបសន្តិសុខសង្គម។

គួរបញ្ជាក់ថា គិតត្រឹមឆមាសទី ១ ឆ្នាំ ២០២៤ នេះ ប.ស.ស ផ្នែកថែទាំសុខភាព មានសមាជិកចំនួនសរុប ២ ២២៩ ៥២២ នាក់ (ស្រី ១ ២៥១២៣៨ នាក់) ក្នុងនោះ បុគ្គលស្វ័យនិយោជន៍មានចំនួន ១៧០ ២៥៤ នាក់ (ស្រី ១០៦ ០៦២ នាក់)៕

អត្ថបទ ៖ សំអឿន