ស្ថានភាពទឹកស្ទឹងសែន ឡើងដល់កម្រិតប្រកាសអាសន្ន ដែលត្រូវប្រុងប្រយ័ត្ន

ស្ថានភាពទឹកស្ទឹងសែន បានឡើងដល់កម្រិតដែលត្រូវប្រកាសឱ្យប្រុងប្រយ័ត្ន ក្នុងកម្ពស់១៣,៥០ម៉ែត្រ ដែលប្រការនេះ អាជ្ញាធរខេត្តកំពង់ធំ បានណែនាំដល់ពលរដ្ឋរស់នៅតាមបណ្តោយដងស្ទឹងសែនបង្កើនការប្រុងប្រយ័ត្នខ្ពស់។

តាមសេចក្ដីជូនដំណឹងរបស់រដ្ឋបាលខេត្តកំពង់ធំ បានឱ្យដឹងថា ដោយផ្អែកលើស្ថានភាពបច្ចុប្បន្នកម្រិតទឹកស្ទឹងសែននៅស្ថានីយកំពង់ធំ មានកម្ពស់ ១៣,៥១ម៉ែត្រ ដែលសង្កេតឃើញថា មានការកើនឡើងជាបន្តបន្ទាប់ដល់កម្រិតប្រកាសឱ្យមានការប្រុងប្រយ័ត្ននូវកម្ពស់ ១៣,៥០ម៉ែត្រ។

ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ រដ្ឋបាលខេត្តកំពង់ធំ បានអំពាវនាវដល់ប្រជាពលរដ្ឋក្នុងខេត្តកំពង់ធំទាំងអស់ និងពលរដ្ឋដែលរស់នៅតាមបណ្តោយដងស្ទឹងសែន ជាពិសេសអ្នករស់នៅតំបន់ងាយរងគ្រោះ បង្កើនការប្រុងប្រយ័ត្នខ្ពស់ ដោយហាមកូនចៅតូចៗកុំឱ្យចុះលេងទឹក និងត្រូវត្រៀមរៀបចំទុកដាក់សម្ភារ ឯកសារសំខាន់ៗដែលចាំបាច់ឱ្យបានត្រឹមត្រូវ។

ទន្ទឹមនេះ រដ្ឋបាលខេត្តកំពង់ធំ ក៏បានណែនាំឱ្យអាជ្ញាធរមូលដ្ឋានគ្រប់លំដាប់ថ្នាក់ត្រូវយកចិត្តទុកដាក់ក្នុងការត្រៀមរៀបចំផែនការអន្តរាគមន៍ និងត្រៀមរៀបចំទីទួលសុវត្ថិភាពឱ្យបានសមរម្យក្នុងការជម្លៀសប្រជាពលរដ្ឋទៅទីទួលសុវត្ថិភាព ក្នុងអំឡុងពេលដែលមានគ្រោះមហន្តរាយទឹកជំនន់មកដល់ ម្យ៉ាងវិញទៀត ត្រូវធ្វើការផ្សព្វផ្សាយ ណែនាំឱ្យប្រជាពលរដ្ឋយកចិត្តទុកដាក់លើសុខភាពអនាម័យ ដើម្បីជៀសវាងជំងឺឆ្លងផ្សេងៗ។

ដោយស្ថានភាពទឹកជំនន់នៅក្នុងខេត្តកំពង់ធំ បានកំពុងជន់លិចផលដំណាំស្រូវរបស់ប្រជាពលរដ្ឋ នៅថ្ងៃទី២៧ ខែកក្កដា ឆ្នាំ២០២៤ លោក នួន ផារ័ត្ន អភិបាលខេត្តកំពង់ធំ និងសហការី ក៏បានដឹកនាំក្រុមការងារចុះពិនិត្យស្ថានភាពទឹកជំនន់ នៅឃុំព្រៃគុយ និងឃុំកំពង់ស្វាយ ស្រុកកំពង់ស្វាយ មានសន្ទុះកើនឡើងយ៉ាងគំហុកបានធ្វើឱ្យរងផលប៉ះពាល់ខូចខាតធ្ងន់ធ្ងរដំណាំស្រូវប្រដេញទឹករបស់ប្រជាពលរដ្ឋចំនួន១.១០៨ហិចតា និងខូចខាតាទាំងស្រុង ៩៩៦ហិចតា ខណៈដំណាំផ្សេងៗទៀត និងហេដ្ឋារចនាសម្ព័ន្ធមួយចំនួនក៏រងផលប៉ះពាល់និងខូចខាតផងដែរ៕