ពលរដ្ឋក្រុងដូនកែវ ស្នើបង្កើតទីតាំងទឹកអគ្គិភ័យបន្ថែម

ទីតាំងទឹកអគ្គិភ័យ ដែលជាកន្លែងដ៏សំខាន់សម្រាប់ផ្តល់សេវាផ្គត់ផ្គង់ទឹកដល់រថយន្តពន្លត់អគ្គិភ័យ ក្នុងករណីកើតមានអគ្គិភ័យដោយប្រការណាមួយ។ ពលរដ្ឋក្រុងដូនកែវ ខេត្តតាកែវ បានស្នើសុំឱ្យមានទីតាំងផ្ដល់ទឹកសម្រាប់ពន្លត់អគ្គិភ័យបន្ថែមទៀត។

ពិតជាមិនអាចបម្រើសេវាសម្រាប់រថយន្តពន្លត់អគ្គិភ័យបានរលូន និងរហ័សនោះទេ ខណៈនៅក្រុងដូនកែវទាំងមូលមានទីតាំងទឹកអគ្គិភ័យតែ២កន្លែងប៉ុណ្ណោះសម្រាប់ផ្គត់ផ្គង់ទឹកករណីមានអគ្គិភ័យកើតឡើង។ នេះជាការលើកឡើងពីសំណាក់ពលរដ្ឋជាច្រើនក្នុងក្រុងដូនកែវ។

មន្ត្រីនគរបាលផ្នែករថយន្តពន្លត់អគ្គិភ័យនៃស្នងការដ្ឋាននគរបាលខេត្តតាកែវ ដោយសុំមិនបញ្ចេញអត្តសញ្ញាណ បានប្រាប់ឱ្យដឹងថា យ៉ាងហោចណាស់ក្នុងដូនកែវ ត្រូវមានទីតាំងទឹកអគ្គិភ័យ ៦ ទៅ ៧កន្លែងទើបគ្រប់គ្រាន់ក្នុងការផ្កត់ផ្គង់ទឹកពេលមានគ្រោះអាសន្ន ជាពិសេសត្រូវដាក់ក្បែរៗផ្សារ និងទីតាំងណាងាយឡានទឹកចេញចូលបានស្រួល។

មន្ត្រីដដែល បញ្ជាក់បន្ថែមថា ជាបទពិសោធន៍កន្លងមក ដែលកាលពីប៉ុន្មានថ្ងៃមុនមានអគ្គិភ័យឆេះផ្ទះលក់សម្ភារៈគ្រឿងបន្លាស់រថយន្ត និងម៉ូតូអស់៥ល្វែង និងវីឡាមួយខ្នង ខាតបង់អស់ទ្រព្យសម្បត្តិរាប់សែនដុល្លា ងាកមកមើលឡានទឹកវិញកកស្ទះបន្តកន្ទុយគ្នាចាំបូមទឹកចេញពីទីតាំងទឹកអគ្គិភ័យ ដែលមានតែ២កន្លែង។

ពលរដ្ឋក្រុងដូនកែវ ស្នើសុំទៅមន្ត្រីពាក់ព័ន្ធ ជាពិសេសលោក វ៉ី សំណាង អភិបាលខេត្តតាកែវ ដែលទើបមកកាន់ដំណែងថ្មីសុំគិតគូរដំឡើងបន្ថែមនូវទីតាំងទឹកអគ្គិភ័យ ដើម្បីងាយស្រួលបម្រើសេវាដល់រថយន្តពន្លត់អគ្គិភ័យបានរហ័សជៀសវាងការមិនកកស្ទះដូចកាលពីប៉ុន្មានថ្ងៃមុនទៀត៕ អត្ថបទ៖ វីរៈ