អ្នកនាំពាក្យអប់រំ អំពាវនាវឱ្យសាលា និងមាតាបិតាបង្កើនយកចិត្តទុកដាក់ ក្នុងរដូវវស្សា

អ្នកស្រី ឃួន វិច្ឆិកា អ្នកនាំពាក្យ ក្រសួងអប់រំ យុវជន និងកីឡា បានធ្វើការអំពាវនាវដល់គណៈគ្រប់គ្រងសាលា និងមាតាបិតាត្រូវបង្កើនការយកចិត្តទុកដាក់ទៅលើសុវត្ថិភាពសិស្សានុសិស្សនៅក្នុងរដូវវស្សានេះ ដើម្បីចៀសវាងនូវការឆ្លងជំងឺដង្កាត់នានា និងគ្រោះថ្នាក់ផ្សេងៗ ខណៈបច្ចុប្បន្នភ្លៀងបន្តធ្លាក់ជាបន្តបន្ទាប់។

អ្នកស្រី ឃួន វិច្ឆិកា មានប្រសាសន៍នៅព្រឹកថ្ងៃទី២៩ ខែកក្កដា នេះថា រដូវវស្សាតែងតែមានភ្លៀងធ្លាប់ជាបន្តបន្ទាប់ ហើយតំបន់ខ្លះបង្កទៅជាមានជំនន់ទឹកភ្លៀង។ ប៉ុន្តែគិតមកដល់ពេលនេះ ជំនន់ទឹកភ្លៀងនេះនៅមិនទាន់មានការប៉ះពាល់ដល់ការសិក្សានៅឡើយទេ។

លោកស្រីបានបន្តថា៖ “ក្នុងនាមក្រសួងអប់រំ យុវជន និងកីឡា សូមអំពាវដល់គណៈគ្រប់គ្រងសាលាក្នុងការបង្កើនការយកចិត្តទុកដាក់ចំពោះស្ថានភាពសាលារៀន ឧតុនិយម បរិស្ថានសាលារៀន ចៀសវាងសម្ភារដក់ទឹកដែលជាជម្រកមូស បង្កើនការយកចិត្តទុកដាក់លើសុវត្ថិភាពសិស្សានុសិស្ស”។

ជាមួយគ្នានេះ អ្នកស្រី ឃួន វិច្ឆិកា បានអំពាវនាវដល់មាតាបិតាទាំងអស់ សូមបង្កើនការយកចិត្តទុកដាក់ចំពោះកូនៗរបស់ខ្លួនក្នុងការធ្វើដំណើរទៅមកសាលា និងរៀបចំសម្ភារនានាដូចជា អាវភ្លៀង ឬឆត្រ ដល់ប្អូនៗដើម្បីកុំឱ្យពួកគាត់ទទឹកទឹកភ្លៀងនាំឱ្យកើតជំងឺគ្រុនក្តៅ ឬជំងឺផ្តាសាយប៉ះពាល់ដល់ការសិក្សា។

យោងតាម ក្រសួងធនធានទឹក និងឧត្តុនិយម បានឱ្យដឹងថា ចាប់ពីថ្ងៃទី២៩ ដល់ថ្ងៃទី៣១ ខែកក្កដា ឆ្នាំ២០២៤ ស្ថានភាពធាតុអាកាសនៅព្រះរាជាណាចក្រកម្ពុជាទទួលរងនូវសម្ពាធទាបគ្របដណ្ដប់លើសមុទ្រចិនខាងត្បូង សមុទ្រ Andaman ភាគកណ្តាល និងខាងកើតឈូងសមុទ្រថៃ ភាគកណ្តាល នៃអាងទន្លេមេគង្គ។ ស្ថានភាពបែបនេះនឹងធ្វើឱ្យតំបន់ទំនាបកណ្តាលមានភ្លៀងធ្លាក់ ផ្គររន្ទះ និងខ្យល់កន្ត្រាក់គ្របដណ្តប់ ១២ ភាគរយ តំបន់ខ្ពស់រាប ២៥ ភាគរយនិងតំបន់មាត់សមុទ្រ ១០ ភាគរយ៕

អត្ថបទ៖ សំអឿន