ព័ត៌មានជាតិ

Breaking News រដ្ឋបាលខេត្តព្រះសីហនុ ប្រកាសរកអ្នកបើករថយន្តដឹកភ្ញៀវ សណ្ឋាគារហ័ងហ្គ័នជាយី ទៅធ្វើតេស្តកូវីដ១៩ ក្រោយរកឃើញស្ត្រីជនជាតិចិនមានវិជ្ជមានកូវីដ១៩

បានផុស

៤ years មុន

នៅ

ថ្ងៃពុធ ៣ មីនា ២០២១

ដោយ

ព្រះសីហនុ ៖ រដ្ឋបាលខេត្តព្រះសីហនុ បានជូនដំណឹងដល់សាធារណជនដែលមានទំនាក់ទំនងជិតដិត ជាពិសេសអ្នកបើករថយន្តដឹកភ្ញៀវ នៅសណ្ឋាគារហ័ងហ្គ័នជាយី ដែលមានអសយដ្ឋានស្ថិតនៅភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ ឲ្យទៅធ្វើតេស្តរកកូវីដ១៩ ក្រោយរកឃើញស្ត្រីជនជាតិចិនមានវិជ្ជមានកូវីដ១៩ស្នាក់នៅសណ្ឋាគារខាងលើ។

រដ្ឋបាលខេត្តព្រះសីហនុ បានជម្រាបជូនដំណឹងទៀតថា នៅថ្ងៃទី២២ ខែកុម្ភៈ ឆ្នាំ២០២១កន្លងមក ក្រុមឆ្លើយតបបន្ទាន់នៃមន្ទីរសុខាភិបាលខេត្ត បានយកសំណាកតេស្តពីស្ត្រីជនជាតិចិន អាយុ ២២ឆ្នាំម្នាក់ ស្នាក់នៅបន្ទប់លេខ១២០ សណ្ឋាគារហ័ងហ្គ័នជាយី ស្ថិតនៅភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ ឃើញថាមានវិជ្ជមានកូវីដ១៩ ដូច្នេះសូមអញ្ជើញទៅធ្វើតេស្តសំណាកនៅតាមទីតាំង ក្នុងរាជធានី-ខេត្ត ដែលបងប្អូនកំពុងស្នាក់នៅ។

ដោយឡែកសម្រាប់នៅខេត្តព្រះសីហនុ សូមបងប្អូនមកធ្វើតេស្តសំណាក នៅសាលាបឋម-អនុវិទ្យាល័យតេជោសែនកម្មករ ឲ្យបានឆាប់បំផុត។ ចំពោះបុគ្គលដែលមិនមានរោគសញ្ញា ឬប៉ះពាល់ដោយប្រយោល សូមតាមដានសុខភាពរបស់ខ្លួន និងត្រូវធ្វើចត្តាឡីស័ករយៈពេល១៤ថ្ងៃ នៅផ្ទះរៀងៗខ្លួន រាប់ចាប់ពីថ្ងៃដែលមានការពាក់ព័ន្ធតទៅ ដើម្បីចូលរួមការពារ ទប់ស្កាត់ការឆ្លងរាលដាលនៃជំងឺកូវីដ-១៩ នៅក្នុងសហគមន៍៕
កែសម្រួលដោយ ៖ នាគព័ន្ធ