កងកម្លាំងអន្តរាគមន៍ខេត្ត​​កំពង់ធំ ត្រៀមជួយ​សង្គ្រោះពលរដ្ឋ​ ពេលទឹកជំនន់តាមដងស្ទឹងសែន ឈានដល់កម្រិតប្រកាសអាសន្ន

នៅព្រឹកថ្ងៃទី២៩ ខែកក្កដា​ ឆ្នាំ២០២៤ នៅទីបញ្ជាការ​តំបន់ប្រតិបត្តិការសឹករងកំពង់ធំ បានប្រកាស​អាសន្ន​ ត្រួតពិនិត្យកងកម្លាំងអន្តរាគមន៍ នៃ​បញ្ជាការ​ដ្ឋាន​តំបន់ប្រតិបត្តិការសឹករងកំពង់ធំ​ ដើម្បីត្រៀមជួយសង្គ្រោះប្រជាពលរដ្ឋ ដែលរងផលប៉ះពាល់ដោយគ្រោះទឹកជំនន់ នៅក្នុងភូមិសាស្ត្រខេត្តកំពង់ធំ ក្នុង​ពេល​ដែល​ជំនន់​ទឹក​ភ្លៀង​ឡើង​លើសកម្រិតប្រកាសអាសន្ន។​ កិច្ចប្រជុំត្រួតពិនិត្យនេះ ស្ថិតក្រោមអធិបតីភាព លោកឧត្តមសេនីយ៍ទោ សោម ស៊ុន មេបញ្ជាការ​តំបន់​ប្រតិបត្តិការ​សឹករងកំពង់ធំ យោធភូមិភាគ​ទី​៤​។​

​លោកឧត្តមសេនីយ៍ទោ សោម ស៊ុន បានបញ្ជាក់ថា គិតត្រឹមថ្ងៃទី​២៩ ខែកក្កដា ឆ្នាំ២០២៤​នេះ កម្រិតកម្ពស់ទឹកនៅតាមដងស្ទឹងសែន នៅស្ថានីយ៍​ក្រុងស្ទឹងសែន ខេត្តកំពង់ធំ មានកម្ពស់ ១៣,៦៣ម៉ែត្រ លើ​កម្រិតប្រកាសអាសន្ន ១៣.៥០ម៉ែត្រ។ ដូច្នេះទឹកបានឡើងលើសកម្រិតប្រកាសអាសន្នកម្ពស់ ១៣សង់ទីម៉ែត្រ​ ហើយជាមួយនោះដែរ រដ្ឋបាលខេត្ត​កំពង់ធំ បានចេញលិខិតជូនដំណឹងដល់ប្រជាពលរដ្ឋទាំងអស់ នៅក្នុងខេត្ត​កំពង់ធំ ឱ្យមានការប្រុងប្រយ័ត្នខ្ពស់ ក្នុងពេលដែលកម្រិតទឹកតាមដងស្ទឹងសែន ឈានដល់លើសកម្រិតប្រកាសអាសន្ន ដើម្បីឱ្យប្រជាពលរដ្ឋគ្រប់រូប មានការប្រុងប្រយ័ត្នខ្ពស់ ទាំងការថែរក្សាអាយុជីវិត និងការថែរក្សាទ្រព្យសម្បត្តិ។ ទទ្ទឹមនឹងនេះ រដ្ឋបាល​ខេត្ត​​ ក៏​បាន​ប្រកាស​ឱ្យអាជ្ញាធរដែនដីគ្រប់លំដាប់ថ្នាក់ ​ពិសេស​ភូមិ​សាស្ត្រ​នៅ​តាម​បណ្ដោយ​ដងស្ទឹងសែន​ ត្រូវ​រៀបចំប្រុងប្រៀបទីទួលសុវត្ថិភាព ជូនប្រជាពលរដ្ឋស្នាក់នៅ ដើម្បីជៀសផុតពីគ្រោះថ្នាក់ផ្សេងៗ ជាយថាហេតុ។​

ជាមួយគ្នានោះ លោកមេបញ្ជាការតំបន់ប្រតិបត្តិការសឹករងកំពង់ធំ បានណែនាំដល់កងកម្លាំងអន្តរាគមន៍ទាំងអស់ ទាំង​នៅ​ថ្នាក់​ខេត្ត​ និង​នៅ​តាម​បណ្តា​ក្រុង​ស្រុក​ ត្រូវត្រៀមបម្រុងកម្លាំង ២៤ម៉ោង លើ ២៤ម៉ោង ដើម្បីជួយសង្គ្រោះប្រជាពលរដ្ឋ ដែលរងផលប៉ះពាល់ដោយគ្រោះទឹកជំនន់ នៅតាមមូលដ្ឋាននានា តាមបទបញ្ជារបស់លោក​មេបញ្ជាការរងកងទ័ព​ជើង​គោក​ មេបញ្ជាការ​យោធភូមិភាគទី៤ និងបទបញ្ជារបស់លោកអភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ឱ្យទាន់ពេលវេលា​ន និងមានប្រសិទ្ធភាព។​

ចំណែក លោកវរសេនីយ៍ទោ សៀង ហុកឃាន់ តំណាងឱ្យនាយ​ទាហាន​ នាយ​ទាហាន​រង​ និង​ពលទាហាន​ ក្នុង​កងអន្តរាគមន៍​ទាំង​អស់​ នៃ​បញ្ជាការ​ដ្ឋាន​តំបន់ប្រតិបត្តិការសឹករងកំពង់ធំ​ បាន​ប្តេជ្ញា​ចិត្ត​ដាច់​ខាត​គោរព​អនុវត្ត​ន៍​តាម​បទ​បញ្ជា​របស់​ថ្នាក់​ដឹកនាំ​គ្រប់​លំដាប់​ថ្នាក់​ នៃ​កងយោធពលខេមរភូមិន្ទ​ លោក​អភិបាល​ខេត្ត​ ប្រធានគណៈបញ្ជាការឯកភាព​រដ្ឋ​បាល​ខេត្ត​ និង​បទបញ្ជា​របស់​មេបញ្ជាការតំបន់ប្រតិបត្តិការសឹករងកំពង់ធំ​ ឱ្យមាន​ប្រសិទ្ធភាព​ និង​ទទួល​បាន​ជោគជ័យ​ ដើម្បី​ប្រជាជន​៕