សម្ដេចធិបតី ថា ការហ្វឹកហ្វឺនរួមគ្នារវាងកងទ័ពកម្ពុជា-ហ្វីលីពីន បានចូលរួមកសាងសមត្ថភាពកងទ័ពបន្ថែម

សម្ដេចធិបតី ហ៊ុន ម៉ាណែត ថា ការហ្វឹកហ្វឺនរួមគ្នារវាងកងទ័ពជើងគោកកម្ពុជា-ហ្វីលីពីន បានរួមចំណែកយ៉ាងសំខាន់ដល់ការកសាងសមត្ថភាពកងទ័ពប្រទេសទាំងពីរ ក៏ដូចជាការយល់ដឹងពីគ្នាទៅវិញទៅមកបន្ថែមទៀតលើវិស័យការពារជាតិ។

សម្ដេចធិបតី ហ៊ុន ម៉ាណែត លើកឡើងបែបនេះនៅក្នុងឱកាសទទួលជួបជាមួយឧត្តមសេនីយ៍ឯក Roy M. Galido មេបញ្ជាការកងទ័ពជើងគោកហ្វីលីពីន នៅវិមានសន្តិភាព នាព្រឹកថ្ងៃទី២៩ ខែកក្កដា ឆ្នាំ២០២៤។ ឧត្តមសេនីយ៍ឯក Roy M. Galido បានវាយតម្លៃខ្ពស់ចំពោះការរីកចម្រើនប្រកបដោយផ្លែផ្កានៃទំនាក់ទំនង និងកិច្ចសហប្រតិបត្តិការរវាងកងទ័ព និងកងទ័ពនៃប្រទេសកម្ពុជា និងហ្វីលីពីន។ លោកមេបញ្ជាការកងទ័ពជើងគោក បានបង្ហាញនូវសុទិដ្ឋិនិយម និងបន្តប្ដេជ្ញាបន្តពង្រឹង និងពង្រីកកិច្ចសហប្រតិបត្តិការនៃកងទ័ពជើងគោកកម្ពុជា-ហ្វីលីពីនឱ្យកាន់តែរឹងមាំថែមទៀត។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានសម្ដែងក្ដីសោមនស្សរីករាយចំពោះលទ្ធផលនៃកិច្ចសហប្រតិបត្តិការរវាងកងទ័ពជើងគោកនៃប្រទេសទាំងពីរ និងបានវាយតម្លៃខ្ពស់ចំពោះវគ្គបណ្តុះបណ្តាល និងការហ្វឹកហ្វឺនរួមគ្នា ដែលបានរួមចំណែកកសាងសមត្ថភាព និងការយល់ដឹងពីគ្នាទៅវិញទៅមកបន្ថែមទៀត ក្នុងការត្រៀមខ្លួនឆ្លើយតបចំពោះការគំរាមកំហែងមិនប្រពៃណី និងជាយថាហេតុ។

ពាក់ព័ន្ធទៅនឹងការពង្រឹងពង្រីកកិច្ចសហប្រតិបត្តិការរវាងកងទ័ពជើងគោកនៃប្រទេសទាំងពីរឱ្យកាន់តែរឹងមាំថែមទៀត សម្ដេចធិបតី នាយករដ្ឋមន្ត្រី និងលោកមេបញ្ជាការកងទ័ពជើងគោក បានពិភាក្សា និងផ្លាស់ប្តូរយោបល់តាមរយៈការបន្តការហ្វឹកហ្វឺនរួមគ្នា ការបណ្ដុះបណ្ដាលធនធានមនុស្ស ការចែករំលែកព័ត៌មាន និងការផ្លាស់ប្តូរបទពិសោធន៍ ជាពិសេស ការប្រយុទ្ធប្រឆាំងឧក្រិដ្ឋកម្មបច្ចេកវិទ្យា ការពង្រឹងសមត្ថភាព ការត្រៀមលក្ខណ:ក្នុងការចូលរួមប្រតិបត្តិការជួយសង្គ្រោះនៅពេលមានគ្រោះមហន្តរាយ និងផ្តល់ជំនួយមនុស្សធម៌ ក៏ដូចជាការជំរុញឱ្យមាននូវកិច្ចសហប្រតិបត្តិការរវាងអង្គភាព និងអង្គភាពនៃកងទ័ពជើងគោកប្រទេសទាំងពីរ នាពេលអនាគតផងដែរ៕