មន្ត្រីជាន់ខ្ពស់៖ស្លាប់ម្នាក់ និងបាត់ខ្លួនម្នាក់ ក្នុងហេតុការណ៍ធ្លាក់ឧទ្ធម្ភាគចក្រយោធា

បុរសម្នាក់បានបាត់បង់ជីវិតនៅនឹងកន្លែង ចំណែកម្នាក់ទៀតមិនទាន់រកឃើញឡើយ ក្នុងហេតុការណ៍ធ្លាក់ឧទ្ធម្ភាគចក្រនៅភ្នំយ៉ាវយ៉ៃ ឃុំថ្មដា ស្រុកវាលវែង ខេត្តពោធិ៍សាត់។ នេះបើតាមមន្ត្រីជាន់ខ្ពស់ក្រសួងការពារជាតិ ប្រាប់នៅរសៀលថ្ងៃទី២៩ ខែកក្កដា នេះ។

កម្លាំងរុករក បានទៅដល់ទីតាំងដែលធ្លាក់ ដោយប្រទះឃើញសាកសពអាកាសយានិកម្នាក់គឺ លោក ខេង ឆៃយុទ្ធ​។ កម្លាំងរុករក ក៏បានបន្តរុករកលោក ស៊ុន ផ្លា ដែលជាប្រធានក្រុមហោះហើរ ដែលបានបាត់ខ្លួនផងដែរ។

គួរឱ្យដឹងថា តាមផែនការហោះហើររបស់កងទ័ពអាកាសកម្ពុជា គឺ ឧទ្ធម្ភាគចក្រមួយគ្រឿងនេះ​ បានហោះចេញពីរាជធានីភ្នំពេញនៅវេលាម៉ោង១១ ៖០០ នាទីព្រឹក ថ្ងៃទី១២ ខែកក្កដា​ តាមទិសដៅទៅតំបន់ថ្មដា ខេត្តពោធិ៍សាត់ និងគ្រោងត្រឡប់មកភ្នំពេញវិញនៅវេលាម៉ោង២រសៀល។

ដំណើរការរុករកឧទ្ធម្ភាគចក្រនេះ បានចាប់ផ្ដើមភ្លាមៗដោយមិនបង្អង់យូរឡើយពោលគឺនៅ ព្រឹកថ្ងៃទី១៣ ខែកក្កដា ក្រសួងការពារជាតិបានបញ្ជូនកម្លាំងជាបន្តបន្ទាប់ទៅកាន់តំបន់ជួរភ្នំក្រវាញទីដែលឧទ្ធម្ភាចក្របាត់ដាន។ ការរុករកនេះ ធ្វើឡើងជាមួយនឹងកម្លាំងថ្មើរជើងសរុបប្រមាណ១០០០នាក់ រួមជាមួយដ្រូន និងឧទ្ធម្ភាគចក្រ ដើម្បីរុករកពីលើអាកាសបន្ថែមទៀត៕