ព័ត៌មានជាតិ

ឆមាសទី ១ ឆ្នាំ ២០២៤ ចិនបង្ហូរទុនវិនិយោគជាង ១ ៣០០ លានដុល្លារនៅកម្ពុជា

បានផុស

២ ខែ មុន

នៅ

ថ្ងៃអង្គារ ៣០ កក្កដា ២០២៤

ដោយ

វិនិយោគិនចិននៅតែឈានមុខគេ សម្រាប់វិនិយោគផ្ទាល់ពីបរទេសនៅកម្ពុជា។ បើតាមរបាយការណ៍ពីក្រុមប្រឹក្សាអភិវឌ្ឍកម្ពុជា នៅឆមាសទី១ ឆ្នាំ២០២៤ វិនិយោគិនចិនបានចាក់ទុនវិនិយោគប្រមាណ ១ ៣៨៩ លានដុល្លារអាម៉េរិក ស្មើនឹង ៤២,៦៤% នៃទំហំវិនិយោគសរុបនៅក្នុងសេដ្ឋកិច្ចប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកសេដ្ឋកិច្ចមើលឃើញថា ខណៈដែលទំនាក់ទំនងកម្ពុជាចិនត្រូវបានពង្រីកកាន់តែប្រសើរជាដៃគូយុទ្ធសាស្រ្តគ្រប់ជ្រុងជ្រោយ ការវិនិយោគិនពីប្រទេសចិននៅតែដើរតួនាទីសំខាន់មិនអាចខ្វះបាន ដើម្បីធានាបានភាពរីកចម្រើន និងភាពធន់សេដ្ឋកិច្ចកម្ពុជា។

ទោះបីកម្ពុជាបើកចំហជើងមេឃ សម្រាប់ទទួលការវិនិយោគពីប្រទេសផ្សេងទៀត ប៉ុន្តែវិនិយោគិនចិននៅតែហក់ឈរលំដាប់លើគេ។ នេះបើតាមការកត់សម្គាល់របស់លោក ហុង វណ្ណៈ អ្នកជំនាញផ្នែកសេដ្ឋកិច្ចនៅរាជ្យបណ្ឌិត្យសភាកម្ពុជា។

រដ្ឋាភិបាលកម្ពុជាបានបើកចំហជើងមេឃ មានន័យថាបើកទ្វារទទួលវិនិយោគគ្រប់ប្រទេស ប៉ុន្តែវិនិយោគចិននៅតែដើរតួនាទីមិនអាចខ្វះបាន ដែលបានជួយជំរុញការអភិវឌ្ឍសេដ្ឋកិច្ចរបស់ប្រទេសកម្ពុជា។

អ្នកសេដ្ឋកិច្ចរូបនេះថ្លែងយ៉ាងដូច្នេះថា «យើងមិនអាចបដិសេធបានទេ ប្រទេសកម្ពុជាកំពុងមានតម្រូវការអ្នកវិនិយោគពីគ្រប់ប្រទេសមិនថាពីប្រទេសចិន និងប្រទេសផ្សេងទៀត។ ប៉ុន្តែជាក់ស្តែងវិនិយោគិនចិននៅតែឈរលំដាប់ទី ១ ក្នុងការបណ្តាក់ទុនក្នុងប្រទេសកម្ពុជា»។

លោកបានលើកករណីខេត្តព្រះសីហនុ នៅពេលដែលវិនិយោគិនចិនចាក់ទុនវិនិយោគយ៉ាងសន្ធឹកសន្ធាប់រហូតដល់មានប្រតិកម្មពីពលរដ្ឋមួយចំនួន ប៉ុន្តែនៅពេលវិនិយោគិនចិនដកខ្លួនចេញក៏ជួបវិបត្តិ។

«ដូចដឹងស្រាប់ហើយ នៅពេលវិនិយោគិនចិនដកចេញពីប្រទេសកម្ពុជា ការវិនិយោគពីប្រទេសដទៃហាក់មិនសូវមាន។ ករណីដូចខេត្តព្រះសីហនុជាឧទាហរណ៍ស្រាប់»។ លោក ហុង វណ្ណៈ បញ្ជាក់បន្ថែម។

លោកក៏មើលឃើញក្រុមហ៊ុនឧស្សាហកម្មធំៗរបស់ចិន បានមើលឃើញសក្តានុពុលនិងបង្កើនទុនកាន់តែធំលើគម្រោងវិនិយោគផ្សេងៗដូចជា ក្រុមហ៊ុនសៃលុនដែលវិនិយោគរាប់រយលានដុល្លារលើរោងចក្រផលិតសម្បកកង់រថយន្ត រួមទាំងក្រុមហ៊ុនឧស្សាហកម្ម និងកសិកម្មផ្សេងទៀត ដែលបង្កើតការងារនិងចំណូលជាតិ។

យ៉ាងណាមិញ លោក ហុង វណ្ណៈ ទទួលស្គាល់ថា ការវិនិយោគរបស់ប្រទេសចិនមួយចំនួន អាចបង្កផលប៉ះពាល់ដល់សហគមន៍និងសណ្ដាប់ធ្នាប់សង្គមជាដើម តែអាស្រ័យលើអាជ្ញាធរនិងសមត្ថភាពពាក់ព័ន្ធត្រូវគ្រប់គ្រងយ៉ាងដូចម្ដេច ដើម្បីធានាបានទាំងប្រភពចំណូលពីអ្នកវិនិយោគ និងសុខសុវត្ថិភាពដល់ពលរដ្ឋ។

លោកលើកឡើងថា «កាលបើកឲ្យការវិនិយោគដោយខ្វះការគ្រប់គ្រង អាចនាំបាតុភាពអវិជ្ជមានបង្កផលប៉ះពាល់ដល់សង្គម និងនាំឲ្យវិនិយោគិនដទៃទៀតខ្លាចរអាមិនហ៊ានមកវិនិយោគនៅប្រទេសយើង»។

ដើម្បីជំរុញទាក់ទាញអ្នកវិនិយោគមិនថាតែពីប្រទេសចិន និងពីប្រទេសដទៃទៀត លោក ហុង វណ្ណៈ ក៏ជំរុញឲ្យរដ្ឋាភិបាលត្រូវសម្រួលនីតិវិធីក្នុងការទាក់ទាញអ្នកវិនិយោគ ដោយកាត់បន្ថយរនាំងឧបសគ្គដែលនាំឲ្យប៉ះពាល់ដល់សតិអារម្មណ៍របស់វិនិយោគិន។

ឆ្នាំ ២០២៤ រដ្ឋាភិបាលកម្ពុជានិងចិនបានកំណត់យកជា “ឆ្នាំនៃការផ្លាស់ប្ដូរប្រជាជន និងប្រជាជន ដើម្បីលើកកម្ពស់វិស័យទេសចរណ៍ ការតភ្ជាប់រវាងប្រទេសទាំងពីរ និងការជំរុញកិច្ចសហប្រតិបត្តិការឱ្យកាន់តែរឹងមាំរីកចម្រើនថែមទៀត”។

កាលពីថ្ងៃទី ២២ ខែមេសា ឆ្នាំ២០២៤ គណៈកម្មការប្រទេសទាំងពីរបានបើកកិច្ចប្រជុំលើកទី ៧ ដើម្បីពិនិត្យវឌ្ឍនភាពការងារលើវិស័យអាទិភាពមួយចំនួន ដើម្បីពង្រឹងក្របខណ្ឌកិច្ចសហប្រតិបត្តិការត្បូងពេជ្រ សំដៅសម្រេចឱ្យបាននូវការកសាងសហគមន៍ វាសនារួមកម្ពុជា-ចិន ប្រកបដោយគុណភាពនិងស្តង់ដារខ្ពស់។

ថ្លែងនៅក្នុងពិធីសម្ពោធផ្លាកឈ្មោះមហាវិថី «ស៊ី ជីនពីង» កាលពីថ្ងៃ ១៩ ខែកក្កដា ឆ្នាំ ២០២៤ លោក ស៊ុន ចាន់ថុល ឧបនាយករដ្ឋមន្រ្តី និងជាអនុប្រធានទី ១ ក្រុមប្រឹក្សាអភិវឌ្ឍកម្ពុជាបានឲ្យដឹងថា ចិនឈរជាប្រទេសលំដាប់ទី ១ ដែលបានកំពុងផ្តល់ឥណទានសម្បទាន និងជំនួយសរុបជាង ៣ ពាន់លានដុល្លារអាម៉េរិកនៅក្នុងក្របខណ្ឌនៃការកសាងនិងអភិវឌ្ឍហេដ្ឋារចនាសម្ព័ន្ធដឹកជញ្ជូននៅកម្ពុជា ក្នុងនោះប្រទេសចិនបានជួយស្ថាបនាផ្លូវសរុបជិត ៤ ពាន់គីឡូម៉ែត្រ ថែមទាំងគម្រោងស្ពានធំៗចំនួន ១៦ កន្លែង សរុបជាង ១៤ ពាន់ម៉ែត្រ។

គម្រោងធំៗដែលកើតចេញពីការវិនិយោគពីប្រទេសចិនមានដូចជា៖ តំបន់សេដ្ឋកិច្ចពិសេសខេត្តព្រះសីហនុ ផ្លូវល្បឿនលឿនភ្នំពេញ-ក្រុងព្រះសីហនុ អាកាសយានដ្ឋានអន្តរជាតិសៀមរាប-អង្គរ ព្រលានយន្តហោះអន្តរជាតិតេជោក្រុងតាខ្មៅ និងផ្លូវល្បឿនលឿនភ្នំពេញ-ក្រុងបាវិត ដែលកំពុងដំណើរការសាងសង់៕