Breaking News៖ អាកាសយានិកម្នាក់ទៀតបានប្រទះឃើញសាកសពចម្ងាយពីកន្លែងយន្តហោះធ្លាក់២១០ម៉ែត្រ

នៅព្រឹកថ្ងៃទី៣០ ខែកក្កដា ឆ្នាំ២០២៤នេះ អាកាសយានិកម្នាក់ទៀត ឈ្មោះ ស៊ុន ផល្លា ត្រូវបានរកឃើញសាកសពនៅចម្ងាយប្រមាណ ២១០ម៉ែត្រពីកន្លែងឧទ្ធម្ភាគចក្រធ្លាក់។

តាមការឱ្យដឹងរបស់នាយឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិ គឺនៅវេលាម៉ោង១០៖៣០នាទីព្រឹក ថ្ងៃទី៣០ ខែកក្កដា ឆ្នាំ២០២៤នេះ កម្លាំងប្រតិបត្តិការរុករកនៃកងយោធពលខេមរភូមិន្ទ បានប្រទះឃើញអាកាសយានិកម្នាក់ទៀត ឈ្មោះ ស៊ុន ផល្លា ដែលគាត់បានពលីនៅចំណុចជើងភ្នំយ៉ាវយ៉ៃចម្ងាយប្រមាណ២១០ម៉ែត្រពីចំណុចឧទ្ធម្ភាគចក្រធ្លាក់។

កាលពីម្សិលមិញ ពោលគឺនៅថ្ងៃទី២៩ ខែកក្កដា ឆ្នាំ២០២៤ កម្លាំងប្រតិបត្តិការរុករក បានរកឃើញចំណុចដែលឧទ្ធម្ភាគចក្រយោធា ដែលបានធ្លាប់រយៈពេល១៧ថ្ងៃមកហើយ នៅចង្កេះភ្នំយ៉ាវយ៉ៃ ស្ថិតក្នុងភូមិសាស្រ្តឃុំថ្ម ស្រុលវាលវែង ខេត្តពោធិ៍សាត់។ ប៉ុន្តែនៅពេលកម្លាំងថ្មើរជើងចូលទៅដល់កន្លែងកើតហេតុ គឺឃើញថា អាកាសយានិកម្នាក់ ឈ្មោះ ខេង ឆៃយុទ្ធ បានបាត់បង់ជីវិតទៅហើយនៅលើកៅអីយន្តហោះតែម្ដង ខណៈអាកាសយានិកម្នាក់ទៀត គឺលោក ស៊ុន ផល្លា ត្រូវបានបាត់ខ្លួន។

តមកដល់ព្រឹកថ្ងៃទី៣០ ខែកក្កដានេះ កម្លាំងរុករកក៏បានបន្តតាមរកលោក ស៊ុន ផល្លា តែជាអកុសល អាកាសយានិករូបនេះ ត្រូវបានប្រទះថា ស្លាប់បាត់បង់ជីវិតផងដែរ៕