ព័ត៌មានជាតិ
១០ឆ្នាំចុងក្រោយ ទ័ពអាកាសកម្ពុជាជួបឧបទ្ទវហេតុធ្លាក់ឧទ្ធម្ភាគចក្រ២លើក ស្លាប់មនុស្ស៧នាក់
រយៈពេល១០ឆ្នាំចុងក្រោយរាប់ពីខែកក្កដា ឆ្នាំ២០១៤ មកដល់ខែកក្កដា ឆ្នាំ២០២៤ នេះ កងទ័ពអាកាសកម្ពុជា បានជួបឧបទ្ទវហេតុធ្លាក់ចំនួន២លើក បណ្ដាលឱ្យយោធាចំនួន៧រូបបាត់បង់ជីវិត និងម្នាក់រងរបួស។
លើកទី១ គឺនៅវេលាម៉ោង ៩៖ ៣០នាទីព្រឹក ថ្ងៃទី១៤ ខែកក្កដា ឆ្នាំ២០១៤ គឺមានឧបទ្ទវហេតុធ្លាក់ឧទ្ធម្ភាគចក្រយោធា បានកើតឡើង។ កាលណោះអំឡុងពេលហ្វឹកហ្វឺនឱ្យអាកាសយានិក ឧទ្ធម្ភាគចក្រយោធាម៉ាក Z9 បានធ្លាក់ចូលទៅក្នុងរណ្ដៅដីមួយកន្លែង ក្នុងសង្កាត់ព្រៃស ខណ្ឌដង្កោ រាជធានីភ្នំពេញបណ្ដាលឱ្យយោធាជាន់ខ្ពស់៥រូប នៃកងទ័ពអាកាស បាត់បង់ជីវិត និងម្នាក់ទៀតរងរបួស។
លើកទី២ គឺនៅថ្ងៃទី១២ ខែកក្កដា ឆ្នាំ២០២៤ ឧទ្ធម្ភាគចក្រម៉ាក Z9 បានបាត់ការទាក់ទងនៅតំបន់ជួរភ្នំក្រវាញខេត្តពោធិ៍សាត់។ តាមផែនការហោះហើរ គឺឧទ្ធម្ភាគចក្រយោធាមួយគ្រឿងនេះ បានចាកចេញពីទីបញ្ជាការទ័ពអាកាសកម្ពុជា នៅរាជធានីភ្នំពេញ នៅវេលាម៉ោង១១៖០០នាទី គោលដៅឆ្ពោះទៅតំបន់ថ្មដា និងខេត្តពោធិ៍សាត់ ក្នុងគោលបំណងហ្វឹកហ្វឺនសមត្ថភាពឱ្យអាកាសយានិក ដោយគ្រោងត្រឡប់មកទីបញ្ជាការទ័ពអាកាសវិញនៅវេលាម៉ោង២៖០០រសៀល។
តាមក្រសួងការពារជាតិកម្ពុជា ក្នុងពេលហោះហើរដល់តំបន់ជួរភ្នំក្រវាញក្នុងខេត្តពោធិ៍សាត់ ដែលនាពេលនោះអាកាសធាតុកំពុងតែអាប់អួរ និងមានភ្លៀងធ្លាក់ឧទ្ធម្ភាគចក្រយោធាមួយគ្រឿងនេះក៏បាត់ការទាក់ទងពីទីបញ្ជាការទ័ពអាកាសកម្ពុជា។ បន្ទាប់ពីបាត់ការទាក់ទង ក្រសួងការពារជាតិ បានបញ្ជូនកងកម្លាំងរុករកទៅទីតាំងដែលបាត់ការទាក់ទងជាបន្ទាន់។ ការរុករកធ្វើឡើងទាំងកម្លាំងថ្មើរជើងរុកព្រៃ លើដី និងតាមរយៈដ្រូន និងឧទ្ធម្ភាគចក្ររុករកពីលើអាកាស ក្រោមស្ថានភាពអាកាសធាតុដ៏អាប់អួរ។
ក្រុមកងកម្លាំងរុករកចម្រុះ បានប្រឹងរុករកយ៉ាងសស្រាក់សស្រាំ ក្រោមការចូលរួមពីសំណាក់ អភិបាលខេត្តពោធិ៍សាត់ លោក ខូយ រីដា, នាយឧត្ដមសេនីយ៍ ឥត សារ៉ាត់, លោកទេសរដ្ឋមន្ត្រី គន់ គីម ប្រធានគណកម្មាធិការជាតិគ្រប់គ្រងគ្រោះមហន្តរាយ និងលោកឧបនាយករដ្ឋមន្ត្រីក្រសួងការពារជាតិ លោក ទៀ សីហា និងសម្ដេចធិបតីនាយករដ្ឋមន្ត្រីកម្ពុជា។
ចំណាយរយៈពេល១៧ថ្ងៃ ក្រោមអាកាសធាតុត្រជាក់ ភ្លៀង ចុះអ័ព្វ និងមេឃបើកថ្ងៃ គឺនៅថ្ងៃទី២៩ ខែកក្កដា វេលាម៉ោង១៖៣៤នាទីរសៀល កម្លាំងរុករកពីលើអាកាសតាមឧទ្ធម្ភាគចក្របានរកឃើញទីតាំងដែលឧទ្ធម្ភាគចក្របានធ្លាក់នៅត្រង់ចំណុចភ្នំយ៉ាវយ៉ៃ ឃុំថ្មដា ស្រុកវាលវែង ខេត្តពោធិ៍សាត់ ប៉ុន្តែភ្លាមៗមិនទាន់ដឹងថាប្រធានក្រុមហោះហើរ និងអាកាសយានិកនៅមានជីវិតឬយ៉ាងណាឡើយ ព្រោះអ្នករុករកពីលើអាកាសមិនអាចចុះទៅទីតាំងផ្ទាល់បាន ពោលគឺបានត្រឹមបន្ទាបឧទ្ធម្ភាគចក្រមើលពីលើប៉ុណ្ណោះ ដោយប្រគល់ភារកិច្ចនេះឱ្យក្រុមថ្មើរជើងដែលស្ថិតនៅចម្ងាយពីទីតាំងធ្លាក់ប្រមាណ១០០០ម៉ែត្រ ជាអ្នកចូលទៅដល់ទីតាំងសិន។
ក្រោយទទួលបានទីតាំងធ្លាក់ហើយ ក្រុមអ្នករុកដែលនៅមិនឆ្ងាយពីទីតាំង បានសម្រុកសំដៅទីតាំងធ្លាក់។ ក្នុងពេលទៅដល់ទីតាំង ជាអកុសល ក្រុមអ្នករុករកបានប្រទះឃើញសាកសព អាកាសយានិក ខេង ឆៃយុទ្ធ ស្លាប់នៅលើកៅអីឧទ្ធម្ភាគចក្រ ដែលធ្លាក់នោះ ក្រោមរូបភាពមានសម្លៀកបំពាក់យោធាគ្របពីលើមុខសាកសព។ ការស្លាប់របស់លោក ខេង ឆៃយុទ្ធ ក្នុងសភាពបែបនេះ ក្រុមអ្នករុករកបានសន្និដ្ឋានថា ប្រធានក្រុមហោះហើរ គឺលោក ស៊ុន ផ្លា អ្នករស់រានមានជីវិតបន្ទាប់ឧទ្ធម្ភាគចក្រធ្លាក់ជាអ្នកយកសម្លៀកបំពាក់ទៅគ្របលើសាកសពលោក ខេង ឆៃយុទ្ធ ដែលស្លាប់ភ្លាមៗ។
ក្រោយពីរកឃើញសាកសពលោក ខេង ឆៃយុទ្ធ ម្នាក់ហើយ កម្លាំងរុករក បានបន្តស្វែងរក លោក ស៊ុន ផ្លា ម្នាក់ទៀត ក្រោមក្ដីសង្ឃឹមថាលោកនៅមានជីវិត។ ការរុករកបានផ្អាកនៅពេលយប់ចូលមកដល់។ លុះមកដល់ព្រឹកថ្ងៃទី៣០ ខែកក្កដា កម្លាំងរុករកបន្តសកម្មភាពជាថ្មី។ នៅវេលាម៉ោង១០៖៣០នាទី ក្រុមអ្នករុករក បានប្រទះឃើញសាកសព លោក ស៊ុន ផ្លា ដែលស្ថិតនៅចម្ងាយប្រមាណជា២១០ម៉ែត្រ ពីទីតាំងឧទ្ធម្ភាគចក្រ ដែលបានធ្លាក់៕
-
ចរាចរណ៍២ ថ្ងៃ ago
ចាប់វាយខ្នោះលោក ម៉ៃ សុគន្ធ បន្ទាប់ពីព្យាយាមបើករថយន្ដគេចពីសមត្ថកិច្ចរហូតបង្កគ្រោះថ្នាក់ចរាចរណ៍
-
ជីវិតកម្សាន្ដ៤ ថ្ងៃ ago
ខេត្តចំនួនបីរបស់ប្រទេសថៃ ដែលផ្តល់កន្លែងទេសចរណ៍គួរជាទីចាប់អារម្មណ៍សម្រាប់វិស្សមកាលនេះ
-
សេចក្ដីជូនដំណឹង៣ ថ្ងៃ ago
ព្រះសង្ឃគង់នៅវត្ត ជោតិវ័ន ហៅវត្តត្រពាំងក្របៅ ត្រូវរង្វាន់ ១២៥លានរៀលពីខារ៉ាបាវ
-
ព័ត៌មានជាតិ៧ ថ្ងៃ ago
មន្ត្រីជាន់ខ្ពស់កម្ពុជា៖ នៅលើពិភពលោកនេះ គេមិនដែលយក Google Map មកធ្វើជាមូលដ្ឋានបោះបង្គោលព្រំដែន
-
ព័ត៌មានអន្ដរជាតិ៣ ថ្ងៃ ago
រុស្ស៊ី វាយប្រហារយ៉ាងសាហាវលើអ៊ុយក្រែន, ស្លាប់និងរបួសមនុស្សជាង ៣០០នាក់
-
សន្តិសុខសង្គម៧ ថ្ងៃ ago
ស្នងការខេត្តកំពត ប្រកាសផ្ដល់ប្រាក់១លានរៀលដល់សាធារណជនណាដែលស្គាល់អត្តសញ្ញាណបុរសម្នាក់ឈរនោមនៅរូបសំណាកសេះសមុទ្រ
-
ព័ត៌មានអន្ដរជាតិ៣ ថ្ងៃ ago
លោក គីម កាត់ទោសប្រហារជីវិតមន្ត្រី៣០នាក់ ព្រោះទឹកជំនន់នៅកូរ៉េខាងជើង
-
ព័ត៌មានជាតិ៥ ថ្ងៃ ago
សាលារៀនគ្រូយើង បើកបវេសនកាល ២០២៤-២០២៥ ដោយនាំយកកម្មវិធីសិក្សាថ្មីៗជាច្រើន