ព័ត៌មានជាតិ

អាកាសយានដ្ឋានសៀមរាបអង្គរ មានក្រុមហ៊ុនចំនួន ១០ ភ្ជាប់ជើងហោះហើរចុះឡើងជាប្រចាំ

បានផុស

២ ខែ មុន

នៅ

ថ្ងៃសុក្រ ២ សីហា ២០២៤

ដោយ

បើតាមប្រភពពីមន្រ្តីនៅអាកាសយានដ្ឋានសៀមរាបអង្គរបានឲ្យកម្ពុជាថ្មីដឹងថា បច្ចុប្បន្នមានក្រុមហ៊ុនអាកាសចរណ៍ទាំងក្នុងស្រុកនិងក្រៅស្រុកចំនួន ១០ កំពុងប្រតិបត្តិការភ្ជាប់ការហោះហើរជាប្រចាំមកអាកាសយានដ្ឋានអន្តរជាតិសៀមរាបអង្គរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក យឹម សានីរាន មន្ត្រីសម្របសម្រួលនៅអាកាសយានដ្ឋានសៀមរាបអង្គរបានប្រាប់កម្ពុជាថ្មីតាមតេឡេក្រាមថា ក្រុមហ៊ុនទាំង ១០ ដែលកំពុងប្រតិបត្តិការតភ្ជាប់ការហោះហើរត្រង់មកអាកាសយានដ្ឋានសៀមរាបអង្គរ ក្នុងនោះមានក្រុមហ៊ុនក្នុងស្រុកចំនួន ២ និងក្រៅស្រុកចំនួន ៨។

ក្រុមហ៊ុនទាំងនោះមានក្រុមហ៊ុន Cambodia Angkor Air (K6), Vietnam Airlines (VN), Bangkok Airway (PG), Lao Airlines (QV), China Eastern Airlines (MU), Viet Jet Airlines (VJ), AirAsia Airlines (AK), Thai AirAsia(FD), AirAsia Cambodia (KT), Singapore Airlines(SQ)។

ក្រៅពីមានក្រុមហ៊ុនប្រតិបត្តិការហោះហើរជាប្រចាំ ក៏មានក្រុមហ៊ុនប្រតិបត្តិការហោះហើរផ្សេងទៀតលក្ខណៈ Charter or Private Jet។ នេះបើតាមលោក យឹម សានីរាន។

ទាក់ទងក្រុមហ៊ុនអាកាសចរណ៍ឡាវ ដែលប្រកាសបញ្ឈប់ប្រតិបត្តិការហោះហើរត្រង់ពីទីក្រុងវៀងច័ន្ទ-មកទីក្រុងភ្នំពេញ កាលពីពាក់កណ្តាលខែមិថុនា បើតាមលោក សានីរាន គិតត្រឹមចុងខែកក្កដាក្រុមហ៊ុននេះនៅតែបន្តប្រតិបត្តិការហោះហើរមកអាកាសយានដ្ឋានសៀមរាបអង្គរនៅឡើយ។

មន្រ្តីសម្របសម្រួលនៅស្ថានីយអ្នកដំណើររូបនេះ ក៏លើកឡើងពីស្ថានភាពនៅអាកាសយានដ្ឋានសៀមរាបអង្គរបច្ចុប្បន្ន ទទួលជើងហោះហើរជាមធ្យមមានឡើងចុះប្រមាណ ៤០ ជើងក្នុងមួយថ្ងៃ ហើយអាចលើសខ្វះតិចតួច។

លោក សានីរាន ក៏បង្ហើបឲ្យដឹងថា នៅចុងឆ្នាំនេះមានក្រុមហ៊ុនអាកាសចរណ៍ថ្មីៗជាច្រើនទៀត នឹងភ្ជាប់ជើងហោះហើរមកអាកាសយានដ្ឋានសៀមរាបអង្ករ ស្របពេលជារដូវ high season ដែលមានមានភ្ញៀវទេសចរមកកម្សាន្តច្រើន។

នៅក្នុងជំនួបជាមួយនាយករដ្ឋមន្រ្តីកម្ពុជា លោក John KC LEE ប្រធានប្រតិបត្តិនៃតំបន់រដ្ឋបាលពិសេសហុងកុង ក្នុងដំណើរទស្សនកិច្ចមកកម្ពុជាកាលពីពេលថ្មីៗនេះ បានលើកឡើងអំពីការពង្រីកកិច្ចសហការលើវិស័យដ៏សក្តានុពលមានទាំងផ្នែកធុរកិច្ច ការវិនិយោគ និងការតភ្ជាប់រវាងប្រជាជននិងប្រជាជន រួមទាំងពិនិត្យលទ្ធភាពក្នុងការបង្កើតជើងហោះហើរត្រង់ពីទីក្រុងហុងកុងមកខេត្តសៀមរាបប្រទេសកម្ពុជា។

ដោយអមដំណើរលោក John KC LEE ក្នុងដំណើរទស្សនកិច្ចមកកម្ពុជា តំណាងក្រុមហ៊ុនអាកាសចរណ៍ Cathay Pacific ដែលមានមូលដ្ឋាននៅទីក្រុងហុងកុង បានចុះអនុស្សរណៈនៃការយោគយល់គ្នា (MoU) ជាមួយអាកាសយានដ្ឋានកម្ពុជា ដើម្បីបង្កើនការតភ្ជាប់ជើងហោះហើរពីកម្ពុជានិងទីក្រុងហុងកុង។

លោក Ronald Lam នាយកប្រតិបត្តិក្រុមហ៊ុន Cathay Pacific បានគូសបញ្ជាក់ថា ការបង្កើនជើងហោះហើរបន្ថែមនឹងផ្តល់ជម្រើសកាន់តែច្រើននិងងាយស្រួលសម្រាប់អ្នកដំណើរ អាចភ្ជាប់ការហោះហើរទៅកាន់ទីក្រុងហុងកុង និងគោលដៅទៅកាន់ប្រទេសចិនដីគោក រួមទាំងប្រទេសនៅតំបន់អាស៊ីខាងជើង អឺរ៉ុប និងទ្វីបអាមេរិក។

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATACC) បានប្រាប់កម្ពុជាថ្មីនៅថ្ងៃទី ០១ ខែសីហា ឆ្នាំ ២០២៤ នេះថា ទីក្រុងហុងកុងជាតំបន់ស្នូលអន្តរជាតិ ដែលជាច្រកចេញចូលរបស់ភ្ញៀវចិន និងអន្តរជាតិផ្សេងទៀត។ ការបង្កើនជើងហោះហើរនេះជាសញ្ញាល្អ ដែលនឹងជួយកែប្រែស្ថានភាពនិងពង្រឹងវិស័យអាកាសចរណ៍ប្រទេសកម្ពុជាកាន់តែល្អប្រសើរ។

យោងតាមរបាយការណ៍ក្រសួងទេសចរណ៍ នៅក្នុងឆមាសទី ១ ឆ្នាំ ២០២៤ កម្ពុជាទទួលបានជើងហោះហើរអន្តរជាតិសរុប ១២ ៣៨៦ ជើង ក្នុងនោះអាកាសយានដ្ឋានអន្តរជាតិភ្នំពេញមាន ៨៩៦០ ជើង អាកាសយានដ្ឋានសៀមរាបអង្គរមាន ៣ ២១៤ ជើង និងអាកាសយានដ្ឋានអន្តរជាតិព្រះសីហនុមាន ២១២ ជើង៕