ព័ត៌មានជាតិ

ក្រសួង ដាក់ឱ្យដំណើរការចុះបញ្ជី ប.ស.ស ជាបុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស តាមរយៈកម្មវិធីទូរស័ព្ទដៃ

បានផុស

២ ខែ មុន

នៅ

ថ្ងៃសុក្រ ២ សីហា ២០២៤

ដោយ

ក្រសួងការងារ និងបណ្តុះបណ្តាលវិជ្ជាជីវៈ នឹងដាក់ឱ្យដំណើរការការចុះបញ្ជីសមាជិក ប.ស.ស. ជាបុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស. តាមរយៈកម្មវិធីទូរស័ព្ទដៃ “NSSF MEMBER APP” ចាប់ពីថ្ងៃទី ១ ខែសីហា ឆ្នាំ ២០២៤ នេះតទៅ ដើម្បីសម្រួលដល់ការងារចុះបញ្ជីជាសមាជិក ប.ស.ស. ឱ្យបានឆាប់រហ័ស និងទាន់ពេលវេលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីជូនដំណឹងមួយចុះកាលពីថ្ងៃទី ០១ សីហា លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានណែនាំដល់សមាជិក ប.ស.ស. និងសាធារណជនទាំងអស់ អាចទាញយក និងដំឡើងកម្មវិធីនេះ ព្រមទាំងរបៀបប្រើប្រាស់តាមទូរស័ព្ទដែលមាន App Store ឬ Google Play។

លោករដ្ឋមន្ត្រី បានមានប្រសាសន៍ថា ជាមួយគ្នានេះ ក្រសួង ក៏មានក្រុមការងារឆ្លើយតប និងផ្តល់ព័ត៌មានផ្សេងៗ តាមរយៈប្រព័ន្ធ Hotline លេខ “១២៨៦” ឬ “១២៩៧” ដែលធ្វើការ ២៤ ម៉ោង ក្នុងមួយថ្ងៃ និង ៧ ថ្ងៃ ក្នុងមួយសប្ដាហ៍ ឬក្រុមតេឡេក្រាមផ្លូវការ “បេឡាជាតិសន្តិសុខសង្គម_Chat” របស់ ប.ស.ស. មានតំណភ្ជាប់ https://t.me/nssfcambodia_Chat ។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា គិតត្រឹមឆមាសទី ១ ឆ្នាំ ២០២៤ នេះ ប.ស.ស ផ្នែកថែទាំសុខភាពមានសមាជិកចំនួនសរុប ២ ២២៩ ៥២២ នាក់ (ស្រី ១ ២៥១ ២៣៨ នាក់) ក្នុងនោះមាន កម្មករ-និយោជិត ចំនួន ១ ៥៦៥ ២៤១ នាក់ (ស្រី ៩៦៣ ៨២៦ នាក់) មន្ត្រីរាជការ អតីតមន្ត្រីរាជការ និងអតីតយុទ្ធជន មានចំនួន ៤៣៧ ៤០៧ នាក់ (ស្រី ១៤៨ ៩៥៥ នាក់) បុគ្គលស្វ័យនិយោជន៍មានចំនួន ១៧០ ២៥៤ នាក់ (ស្រី ១០៦ ០៦២ នាក់) និងអ្នកនៅក្នុងបន្ទុកសមាជិក ប.ស.ស មានចំនួន ៥៦ ៦២០ នាក់ (ស្រី ៣២ ៣៩៥ នាក់)៕

អត្ថបទ ៖ សំអឿន