ព័ត៌មានជាតិ

អាជ្ញាធរស្រុកល្វាឯម ចុះចាប់ឧបករណ៍នេសាទខុសច្បាប់ នារដូវបិទនេសាទ

បានផុស

៣ ខែ មុន

នៅ

ថ្ងៃសុក្រ ២ សីហា ២០២៤

ដោយ

កាលពីរសៀលថ្ងៃទី ០១ ខែសីហា ឆ្នាំ ២០២៤ ដោយអនុវត្តតាមប្រសាសន៍ណែនាំ និងបទបញ្ជាយ៉ាងម៉ឺងម៉ាត់របស់ លោក គួច ចំរើន អភិបាល នៃគណៈអភិបាលខេត្តកណ្ដាល លោក កន សុខកាយ អភិបាល នៃគណៈអភិបាលស្រុក និងជាប្រធានគណៈបញ្ជាការឯកភាពរដ្ឋបាលស្រុកល្វាឯម បានដឹកនាំកម្លាំងគណៈបញ្ជាការឯកភាពរដ្ឋបាលស្រុក ធ្វើការចុះបង្ក្រាបបទល្មើសនេសាទខុសច្បាប់ ការលួចដាក់ស្បៃមុងយកកូនត្រី នៅចំណុចស្ពានថ្ម ស្ថិតនៅព្រំប្រទល់រវាងភូមិព្រែករៃ ឃុំព្រែករៃ ស្រុកល្វាឯម និងសង្កាត់ព្រែកក្មេង ក្រុងអរិយក្សត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសកម្មភាពចុះបង្ក្រាបនេះដែរ កម្លាំង នៃគណៈបញ្ជាការឯកភាពរដ្ឋបាលស្រុក បង្ក្រាបបានវត្ថុតាង និងឧបករណ៍នេសាទខុសច្បាប់មួយចំនួន រួមមាន ៖ លូស្បៃមុង ចំនួន ៥ មាត់, របាំងស្បៃមុង ៣០០ ម៉ែត្រ, បង្គោលឫស្សី ចំនួន ២០០ ដើម។ បន្ថែមពីនោះ ឧបករណ៍នេសាទខុសច្បាប់ដែលបង្ក្រាបបាន ត្រូវធ្វើការដុតបំផ្លាញចោលនៅនឹងកន្លែង។

សូមរំលឹកថា កាលពីថ្ងៃទី ២០ ខែឧសភា ឆ្នាំ ២០២៤ កន្លងទៅ ក្រសួងកសិកម្ម រុក្ខាប្រមាញ់ និងនេសាទ រដ្ឋបាលជលផល បានចេញសេចក្ដីជូនដំណឹងពីរដូវបិទនេសាទ ឆ្នាំ ២០២៤ មានដូចខាងក្រោម ៖

-ចាប់ពីថ្ងៃទី ១ ខែមិថុនា ដល់ថ្ងៃទី ៣០ ខែកញ្ញា ចំពោះដែននេសាទទឹកសាប រួមមាន ខេត្តកំពង់ឆ្នាំង ពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ សៀមរាប កំពង់ធំ ព្រះវិហារ រតនគិរី មណ្ឌលគិរី ក្រចេះ ត្បូងឃ្មុំ កំពង់ចាម និងមួយផ្នែក នៃរាជធានីភ្នំពេញ និងខេត្តកណ្តាល ដែលស្ថិតនៅខាងជើងខ្សែស្របទន្លេចតុមុខ។

-ចាប់ពីថ្ងៃទី ១ ខែកក្កដា ដល់ថ្ងៃទី ៣១ ខែតុលា រួមមាន ខេត្តព្រៃវែង ស្វាយរៀង តាកែវ ខេត្តកំពង់ស្ពឺ និង មួយផ្នែក នៃរាជធានីភ្នំពេញ និងខេត្តកណ្ដាល ដែលស្ថិតនៅខាងត្បូងខ្សែស្របទន្លេចតុមុខ។

នៅក្នុងរយៈពេលបិទនេសាទនេះ អ្នកនេសាទទាំងអស់ ត្រូវប្រើតែឧបករណ៍នេសាទគ្រួសារ ដែលមានចែងក្នុងប្រកាសលេខ ៤៥៨ ប្រក.កសក ចុះថ្ងៃទី ២២ ខែតុលា ឆ្នាំ ២០១២៕

អត្ថបទ ៖ សំណាង