ស្ថាប័នប្រឆាំងអំពើពុករលួយថៃ សម្លឹងឃើញគុណតម្លៃយន្តការច្រកចេញចូលតែមួយរបស់កម្ពុជា

ប្រធានស្ថាប័នប្រឆាំងអំពើពុករលួយរបស់ថៃ សម្លឹងឃើញពីគុណតម្លៃនៃយន្តការច្រកចេញចូលតែមួយរបស់កម្ពុជាដែលអាចធានាបានតម្លាភាព គណនេយ្យភាព និងវិជ្ជាជីវៈក្នុងការផ្ដល់សេវាសាធារណៈ ពិសេសកាត់បន្ថយអំពើពុករលួយ។

ឆ្លៀតក្នុងឱកាសអញ្ជើញមកចូលរួមកិច្ចប្រជុំស្ថាប័នប្រឆាំងអំពើពុករលួយនៅលើទឹកដីខេត្តសៀមរាប គណៈប្រតិភូស្ថាប័នប្រឆាំងអំពើពុករលួយរបស់កម្ពុជា ថៃ និងឡាវ​ បានទៅបំពេញទស្សនកិច្ចនៅអង្គភាពច្រកចេញចូលតែមួយរបស់រដ្ឋបាលខេត្តសៀមរាប។ ក្នុងឱកាសនោះ លោក ម៉ត សំអាត ប្រធានអង្គភាពច្រកចេញចូលតែមួយខេត្តសៀមរាប បានធ្វើបទបង្ហាញជូនគណៈប្រតិភូ អំពីនីតិវិធីនៃការផ្តល់សេវាសាធារណៈ ដែលចាប់ផ្តើមពីការផ្តល់ព័ត៌មាន ការដាក់ពាក្យស្នើសុំ បង់កម្រៃសេវា ពិនិត្យ និងបញ្ជូនពាក្យស្នើសុំ ពិនិត្យ និងផ្តល់យោបល់បច្ចេកទេស ពិនិត្យសម្រេច ផ្តល់លទ្ធផលសម្រេច និងព័ត៌មានត្រឡប់។

បន្ទាប់ពីស្ដាប់នូវបទបង្ហាញនេះ លោក អេកាវីត វ៉ាកវ៉ាល់គូ ស្នងការគណៈកម្មការប្រឆាំងអំពើពុករលួយថៃ បានសម្ដែងការចាប់អារម្មណ៍ចំពោះការបង្កើតយន្តការច្រកចេញចូលតែមួយរបស់ខេត្តសៀមរាប ដោយលោក បានកត់សម្គាល់ថា យន្តការនេះពិតជាបានកាត់បន្ថយអំពើពុករលួយ និងភាពចន្លោះប្រហោងក្នុងចំណោមមន្ត្រីសាធារណៈ។ លោកស្នងការគណៈកម្មការប្រឆាំងអំពើពុករលួយថៃ បន្តថា ការិយាល័យនេះបានផ្តល់នូវការបម្រើសេវាកម្មប្រកបដោយតម្លាភាព និងធ្វើឱ្យប្រសើរឡើងនូវគណនេយ្យភាព និងវិជ្ជាជីវៈ។

ក្នុងន័យនេះ លោក អេកាវីត វ៉ាកវ៉ាល់គូ ស្នងការគណៈកម្មការប្រឆាំងអំពើពុករលួយថៃ ក៏បានបង្ហាញបំណងចង់យកគំរូនៃអង្គភាពច្រកចេញចូលតែមួយខេត្តសៀមរាប ទៅអនុវត្តតាមផងដែរ។

គួរជម្រាបថា យន្តការច្រកចេញចូលតែមួយ ត្រូវបានរាជរដ្ឋាភិបាល ដាក់ឱ្យអនុវត្ដសាកល្បងនៅខេត្តបាត់ដំបង និងខេត្តសៀមរាប ក្នុងឆ្នាំ២០០៣ ដែលគិតមកពេលពេលនេះ អង្គភាពច្រកចេញចូលតែមួយមាននៅគ្រប់រាជធានី-ខេត្ត ខណៈយន្តការនេះ ក៏បានពង្រាយដល់ស្រុក ក្រុង ខណ្ឌជាច្រើន ដែលហៅថា ការិយាល័យច្រកចេញចូលតែស្រុក ក្រុង ខណ្ឌ ខណៈនៅថ្នាក់ឃុំ សង្កាត់ ក៏បានដាក់ឱ្យអនុវត្តយន្តការនេះផងដែរ៕