សម្តេចធិបតី៖ ព្រែកជីកហ្វូណនតេជោ យកលំនាំតាមព្រែកជីកបុព្វបុរសខ្មែរជាង២ពាន់ឆ្នាំមុន

“គម្រោងព្រែកជីកហ្វូណនតេជោ” មិនត្រឹមតែជាហេដ្ឋារចនាសម្ព័ន្ធផ្លូវទឹក ដែលអាចជួយសម្រួលទៅដល់ការដឹកជញ្ជូន និងកំណើនសេដ្ឋកិច្ចរបស់កម្ពុជាប៉ុណ្ណោះទេ ប៉ុន្តវាក៏មានលក្ខណៈពិសេសដែលភ្ជាប់ជាមួយនឹងលក្ខណៈភូមិសាស្រ្ត និងប្រវត្តិសាស្រ្ត ស្របជាមួយនឹងចក្ខុវិស័យបុព្វបុរសខ្មែរយើងកាលពី ២០០០ឆ្នាំមុន នាសម័យហ្វូណន។
នេះជាការថ្លែងឡើងរបស់នាយករដ្ឋមន្រ្តី សម្តេចធិបតី ហ៊ុន ម៉ាណែត ក្នុងពិធី“បើកការដ្ឋានសាងសង់ព្រែកជីកហ្វូណនតេជោ” ដែលជាថ្ងៃប្រវត្តិសាស្រ្តថ្មីមួយទៀតរបស់កម្ពុជា ថ្ងៃទី ៥ ខែសីហា ឆ្នាំ ២០២៤។

សម្តេចធិបតី បានលើកឡើងពីសារៈសំខាន់នៃគម្រោងនេះ ដែលឆ្លុះបញ្ចាំងពីចក្ខុវិស័យនៃអាណាចក្រនគរភ្នំបុរាណ ដែលជារដ្ឋដំបូងបង្អស់របស់កម្ពុជា ដែលត្រូវបានបង្កើតឡើងនៅសតវត្សទី១ ដែលការសាងសង់ប្រឡាយរបស់ព្រះរាជាណាចក្រ ក្នុងគោលបំណងលើកកម្ពស់វិស័យកសិកម្ម ពាណិជ្ជកម្ម ឧស្សាហកម្ម និងភស្តុភារ។ ការកសាងព្រែកជីកនាពេលនោះ បង្ហាញពីមានភាពរឹងមាំរបស់កម្ពុជា ជាចក្រភពមួយដែលមានមូលដ្ឋានសេដ្ឋកិច្ចខ្លាំងក្លា។
ព្រែកជីកនេះ មិនត្រឹមតែបម្រើឱ្យពាណិជ្ជកម្មអន្តរជាតិនោះទេ ប៉ុន្តែក៏ជាការធានានូវប្រព័ន្ធស្រោចស្រពធារាសាស្រ្តរបស់យើង ដែលជួយជំរុញកសិកម្ម ស្រដៀងនៅបណ្តាព្រែក ប្រឡាយ ជំនាន់អាណាចក្រនគរភ្នំ ដែលរៀបចំសម្រាប់ជំរុញកសិកម និងពាណិជ្ជកម្ម។

សម្តេចធិបតី បញ្ជាក់ថា៖«តាមរយៈការតភ្ជាប់គម្រោងនេះ ជាមួយនឹងអតីតកាល ២០០០ឆ្នាំមុន ដែលចក្ខុវិស័យរបស់បុរព្វបុរសយើង ឃើញថាសារៈសំខាន់នៃការតភ្ជាប់ប្រព័ន្ធប្រឡាយ ព្រែក បើកនូវគមនាគមន៍ផ្លូវទឹកជាចំណុចខ្លាំងមួយសម្រាប់លើកតម្កើងអាណាចក្រនាពេលនោះ»។

ជាមួយគ្នានេះ សម្តេច ស្នើដល់បងប្អូនប្រជាពលរដ្ឋកុំឱ្យមានការមន្ទិលសង្ស័យ ពោលបើ២ពាន់ឆ្នាំមុនព្រែកជីកនេះបានផ្តល់ផលប្រយោជន៍ធំទៅដល់អាណាចក្រហ្វូណន ២ពាន់ឆ្នាំក្រោយ ព្រែកជីកនៅតែផ្តល់នូវកម្លាំងសេដ្ឋកិច្ចជាតិ។
ផ្អែកតាមទិដ្ឋភាពប្រវត្តិសាស្រ្ត លំនាំរបស់ដូនតា ពីមុនព្រែកជីកហ្វូណនដែលតភ្ជាប់ពីអង្គរបុរី ទៅកំពង់ផែអូរកែវ មានទំហំទទឹងត្រឹមតែ ៣០ម៉ែត្រ បណ្តោយ​៨០គីឡូម៉ែត្រ។ ប៉ុន្តែព្រែកជីកនេះ ត្រូវបានពង្រីកទទឹង ១០០ម៉ែត្រ បណ្តោយ ១៨០ គីឡូម៉ែត្រ ហើយជម្រៅកន្លែងខ្លះរហូតដល់ ៣០ ម៉ែត្រ ដោយសារបច្ចេកវិទ្យារីកចម្រើន ប៉ុន្តែចក្ខុវិស័យដូចគ្នា។

សម្តេចធិបតី មានប្រសាសន៍ថា៖«ទ្រង់ទ្រាយធំជាងមុន ប៉ុន្តែបុព្វហេតុមិនខុសពី ២០០០ឆ្នាំមុនទេ គឺធ្វើប្រព័ន្ធនេះដើម្បីលើកកិត្យានុភាពឯករាជភាព អធិបតេយ្យភាព ​និងភាពរីកចម្រើនរបស់កម្ពុជា»។
គួរជម្រាបថា ដើម្បីជាការគាំទ្រ និងអបអរសាទរការបើកការដ្ឋានសាងសង់ព្រែកជីកជាប្រវត្តិសាស្ត្រនេះ ព្រឹត្តិការណ៍អមជាច្រើនក៏ត្រូវបានរៀបចំនៅទូទាំងប្រទេសយ៉ាងអធិកអធម។  

គ្រប់រដ្ឋបាលរាជធានី-ខេត្តទាំង២៥ បានរៀបចំនូវទីកន្លែងសម្រាប់រៀបចំពិធីអបអរសាទរ ដោយមានការរៀបចំការអុជកាំជ្រួច និងការសម្ដែងទស្សនីយអបអរសាទរនានាដែលពាក់ព័ន្ធនឹងអត្ថប្រយោជន៍ព្រែកជីកហ្វូណនតេជោ នាវេលាម៉ោង៧យប់ ដើម្បីជាការចូលរួមអបអរសាទរក្នុងព្រឹត្តិការណ៍ជាប្រវត្តិសាស្ត្រនេះ។

គម្រោងព្រែកជីកហ្វូណនតេជោ មានប្រវែង ១៨០គីឡូម៉ែត្រ (ទទឹងមុខកាត់ផ្នែកខាងលើប្រវែង ១០០ម៉ែត្រ ផ្នែកខាងក្រោម ៨០ម៉ែត្រ) តភ្ជាប់ពីព្រែកតាកែវ នៃទន្លេមេគង្គ រួចចូលតាមបណ្តាព្រែក នៃទន្លេបាសាក់ ស្រុកកោះធំ និងបន្តរហូតដល់សមុទ្រ ដោយឆ្លងកាត់ខេត្តចំនួន៤ រួមមាន៖ ខេត្តកណ្តាល តាកែវ កំពត និងកែប។ ព្រែកជីកនេះនឹងផ្តល់ប្រយោជន៍ដ៏មហាសាលដល់សង្គម-សេដ្ឋកិច្ច ដូចជាពង្រីកការតភ្ជាប់ប្រព័ន្ធដឹកជញ្ជូន ពហុមធ្យោបាយ ចំណេញចម្ងាយផ្លូវ ពេលវេលា និងថ្លៃដឹកជញ្ជូនប្រកបដោយភាពប្រកួតប្រជែងត្រង់ទៅសមុទ្រ បង្កើនវិសាលភាពនៃប្រព័ន្ធស្រោចស្រព និងរំដោះទឹកជំនន់ ជួយពង្រីកនិងបង្កើនផលិតភាពនៃការដាំដុះនៅភាគនិរតី៕