រដ្ឋបាលខេត្តតាកែវ ប្រារព្ធពិធីអបអរសាទរពិធី​បើកការដ្ឋាន ព្រែកជីកហ្វូណនតេជោ នៅសួនច្បារ​មាត់បឹងតាកែវ

ព្រឹកថ្ងៃទី៥ ខែសីហា ឆ្នាំ២០២៤ លោក យស ណាស៊ី ប្រធានក្រុមប្រឹក្សាខេត្ត និងលោក ម៉ម កាយ អភិបាលរងខេត្ត តំណាង លោកអភិបាលខេត្តតាកែវ បានអញ្ជើញដឹកនាំមន្រ្តីរាជការ កងកម្លាំងទាំងបី សិស្សានុសិស្ស លោកគ្រូ អ្នកគ្រូ យុវជន និងប្រជាពលរដ្ឋ ប្រមាណជាង ៣ពាន់នាក់ ចូលរួមអបអរសាទរពិធីបើកការដ្ឋាន ព្រែកជីកហ្វូណនតេជោ ដែលប្រារព្ធធ្វើឡើងនៅបរិវេណសួនច្បារមាត់បឹងតាកែវ ស្ថិតក្រុងដូនកែវ ខេត្តតាកែវ។

យោងតាមសារាចរ លេខ ១០ ស.រ ចុះថ្ងៃទី០៥ ខែកក្កដា ឆ្នាំ២០២៤ របស់រាជរដ្ឋាភិបាលកម្ពុជា ស្ដីពីការអបអរសាទរការបើកការដ្ឋានសាងសង់ព្រែកជីកហ្វូណនតេជោ នៅថ្ងៃទី០៥ ខែសីហា ឆ្នាំ២០២៤ នៅគ្រប់រាជធានី ខេត្ត ក្រុង ស្រុក ខណ្ឌ ឃុំ សង្កាត់ មន្ទីរ អង្គភាព វត្តអារាម និងគ្រឹះស្ថានសាធារណៈរដ្ឋ និងឯកជន ត្រូវរៀបចំពិធីអបអរសាទរ ការបើកការដ្ឋានសាងសង់ព្រែកជីកហ្វូណនតេជោ ដែលជាសមិទ្ធផលប្រវត្តិសាស្ត្ររបស់កម្ពុជា។ ពិសេសដើម្បីបង្ហាញ ចលនាជាតិគាំទ្រខ្លាំងក្លាចំពោះគម្រោងផ្តល់ផលប្រយោជន៍មហាសាលដល់សង្គម និងសេដ្ឋកិច្ចទាំងមូលទុកជាមរតក ប្រវត្តិ​សាស្ត្រដល់កូនចៅជំនាន់ក្រោយ។

គម្រោងព្រែកជីកហ្វូណន មានប្រវែង ១៨០គីឡូម៉ែត្រ ផ្ដើមចេញពីព្រែកតាកែវ នៃទន្លេមេគង្គ ឆ្លងកាត់ព្រែកតាឯក នៃទន្លេបាសាក់ រួចចូលតាមព្រែកតាហ៊ីង នៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប។ គម្រោងនេះគ្រោងចំណាយថវិកា ១៧០០លានដុល្លារ និងប្រើពេលសាងសង់៤ឆ្នាំ។ គម្រោងនេះ នឹងផ្តល់ប្រយោជន៍ដោយផ្ទាល់ដល់ពលរដ្ឋប្រមាណ ១,៦លាននាក់ ដែលរស់នៅអមសងខាងផ្លូវទឹកព្រែកជីកនេះ ក្នុងភូមិសាស្ត្រខេត្តកណ្តាល តាកែវ កំពត និងខេត្តកែប៕

អត្ថបទ៖ វីរៈ