ស្រូវជាង៣៦០០ហិកតានៅខេត្តកំពង់ធំ និងក្រចេះ រងការខូចខាតដោយជំនន់ទឹកភ្លៀង

ដំណាំស្រូវប្រមាណជាង៣៦០០ហិកតានៅខេត្តកំពង់ធំ និងខេត្តក្រចេះ បានទទួលរងការខូចខាតដោយសារជំនន់ទឹកភ្លៀង ក្នុងនោះខេត្តកំពង់ធំរងគ្រោះខ្លាំងជាងគេរហូតដល់ទៅជាង៣ពាន់ហិកតា។

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានមានប្រសាសន៍នៅរសៀលថ្ងៃទី៦សីហានេះថា ក្នុងចំណោមដំណាំស្រូវ៣៦៦៤ហិកតា រងការខូចខាតដោយជំនន់ទឹកភ្លៀង ក្នុងនោះនៅខេត្តក្រចេះប៉ះពាល់ដំណាំរួមផ្សំចំនួន៧៣៩ហិកតា ខូចខាត ២៧៨ហិកតា និងប៉ះពាល់ស្រូវសន្ទូង និងស្រូវពង្រោះ ចំនួនចំនួន១.៩៥៤ហិកតា ខូចខាត ៣៩០ហិកតា។

ក្រៅពីនេះជំនន់ទឹកភ្លៀងប៉ះពាល់លិចផ្លូវប្រវែង១.១០០ម៉ែត្រ និងលិចផ្លូវលំជនបទប្រវែង៣៦.៥៤២ម៉ែត្រ ខូចខាត​៩៤ម៉ែត្រ។ លោកបានបន្តទៀតថា ចំណែកខេត្តកំពង់ធំរងគ្រោះធ្ងន់ធ្ងន់ជាងគេដោយប៉ះពាល់ដំណាំស្រូវចំនួន​៦៨០៦ហិកតា ខូចខាត៣២៧៤ហិកតា ក្នុងនោះមានស្រូវវារប៉ះពាល់១១ហិកតា ស្រូវធ្ងន់ប៉ះពាល់​១៤៣៧​ហិកតា ខូចខាត១៤៤ហិកតា ស្រូវកណ្តាលប៉ះពាល់៦៦៥ហិកតា ខូចខាត៥៦ហិកតា និងស្រូវស្រាលប៉ះពាល់៤៦៩៣​ហិកតា​ខូចខាត៣០៧៤ហិកតានិងប្រមូលផលបាន១៦៥២៤ហិកតា។

លោកបានបញ្ជាក់ថា ភ្លៀងធ្លាក់ជាប់គ្នាកាលពីចុងខែកក្កដារហូតមកដល់ខែសីហានេះបានបង្កឱ្យមានជំនន់ទឹកភ្លៀងនៅតាមបណ្តាខេត្តមួយចំនួនក្នុងនោះខេត្តខ្លះទឹកបានស្រកចុះអស់ខេត្តខ្លះទឹកបន្តស្រកចុះជាបណ្តើរៗដែលធ្វើឱ្យប៉ះពាល់ដល់ហេដ្ឋារចនាសម្ព័ន្ធនិងផលដំណាំរបស់ប្រជាពលរដ្ឋដូចជាដំណាំរួមផ្សំ ស្រូវ ពោតក្រហមដំឡូងមីនិងល្ងជាដើម៕

អត្ថបទ៖ សំអឿន