រដ្ឋមន្ត្រីសុខាភិបាលបង្ហាញគន្លឹះសំខាន់ៗជួយឲ្យថ្នាក់​ដឹកនាំគ្រប់គ្រងអង្គភាពរបស់ខ្លួនទទួលបានជោគជ័យ

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាលបានបង្ហាញគន្លឹះសំខាន់ៗមួយចំនួនជួយឱ្យថ្នាក់ដឹកនាំគ្រប់គ្រងអង្គភាពរបស់ខ្លួនប្រកបដោយប្រសិទ្ធភាព និងទទួលបានជោគជ័យ។

នៅក្នុងការធ្វើបឋកថាស្តីពីកត្តាកំណត់ភាពជាអ្នកដឹកនាំសម្រាប់មន្រ្តីរាជការក្រោមឱវាទតាមប្រព័ន្ធវីដេអូសន្និសីទ
កាលពីរសៀលថ្ងៃទី០៦សីហា លោករដ្ឋមន្ត្រីបានចែករំលែកបទពិសោធន៍ និងគន្លឹះនៃអ្នកដឹកនាំថា តើគួរមានចំណេះដឹងបែបណាដើម្បីដឹកនាំនៅក្នុងមូលដ្ឋានរបស់ខ្លួនបានជោគជ័យ។ ជារួមអ្នកដឹកនាំគ្រប់រូបត្រូវមានចំណេះដឹងទូលំទូលាយឱ្យបានច្រើនមុខជំនាញដោយការសិក្សាស្វែងយល់ និងត្រូវដឹងត្រូវស្គាល់ការងារដែលខ្លួនធ្វើ និងទទួលបន្ទុកឱ្យបានច្បាស់លាស់ដែលមានការសួរនាំដល់សមាជិកក្រុមទាំងអស់ដើម្បីបង្កើតក្រុមការងារដែលមានប្រសិទ្ធិភាព។ អ្នកដឹកនាំត្រូវមានយុទ្ធសាស្រ្តកសាងក្រុម និងចេះបង្កើតភាពស្និទ្ធស្នាលជាមួយក្រុមការងារដើម្បីធ្វើការរួមគ្នាសម្រេចផែនការយុទ្ធសាស្រ្តរបស់អង្គភាពរបស់ខ្លួន។

ជាមួយគ្នានេះដែរលោករដ្ឋមន្ត្រីបានវាយតម្លៃខ្ពស់ចំពោះការខិតខំប្រឹងប្រែងរបស់មន្រ្តីសុខាភិបាល និងបានលើកទឹកចិត្ត
គាំទ្រជំរុញឱ្យគ្រប់បណ្តាថ្នាក់ដឹកនាំមូលដ្ឋានបន្តខិតខំធ្វើការងាររបស់ខ្លួនហើយនឹងចេះជួយគ្នាទៅវិញទៅមកតាមឋានានុក្រមសម្រាប់ធ្វើជាគំរូល្អនៅក្នុងការគាំទ្រកំណែទម្រង់ អនុវត្តយុទ្ធសាស្រ្តបញ្ចកោណរបស់រាជរដ្ឋាភិបាលសម្រាប់នីតិកាលទី៧ នៃរដ្ឋសភា។

សូមបញ្ជាក់ផងដែរថា វគ្គបណ្តុះបណ្តាលនេះត្រូវបានរៀបចំឡើងនៅរៀងរាល់ថ្ងៃអង្គារដែលមានវត្តមាន ថ្នាក់ដឹកនាំអង្គភាពថ្នាក់ជាតិចាប់ពីអនុប្រធានការិយាល័យថ្នាក់កណ្តាលរហូតដល់រដ្ឋខាធិការក្រសួងសុខាភិបាលអង្គភាពថ្នាក់ក្រោមជាតិ ចាប់ពីប្រធានមណ្ឌលសុខភាពរហូតដល់ប្រធានមន្ទីរសុខាភិបាលរាជធានី-ខេត្ត និងសមាជិកក្រុមប្រឹក្សាគណៈវិជ្ជាជីវៈទាំង ៥ ចាប់តាំងពីថ្នាក់រាជធានី-ខេត្តរហូតដល់ថ្នាក់ជាតិសរុបចំនួន៤០៧៧រូប៕

អត្ថបទ៖ សំអឿន