ស្ថានការណ៍ក្តៅ! កងទ័ពចិន ធ្វើតេស្តសមត្ថភាពប្រយុទ្ធ នៅសមុទ្រចិនខាងត្បូង 

ស្របពេលស្ថានការណ៍កាន់តែក្តៅ ស្រាប់តែប្រទេសចិន បានធ្វើសមយុទ្ធតេស្តសមត្ថភាពវាយប្រហារនិងការល្បាត នៅក្បែរដែនទឹកមានជម្លោះក្នុងសមុទ្រចិនខាងត្បូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការរបស់ South China Morning Post កាលពីថ្ងៃពុធទី៧ខែសីហា, បញ្ជាការដ្ឋានភូមិភាគខាងត្បូង របស់យោធាចិន ប្រកាសថា កងទ័ពខ្លួនបានធ្វើសមយុទ្ធសាកល្បងសមត្ថភាពវាយប្រហារនេះ នៅដែនទឹក Scarborough Shoal ឬចិនហៅថា កោះ ហ័ងយាន។

ដែនទឹកមួយនេះ ត្រូវបានទាមទារយកមកគ្រប់គ្រងទាំងពីសំណាក់ភាគីចិននិងហ្វីលីពីន ខណៈវាមានចម្ងាយប្រហែល ២២០គីឡូម៉ែត្រ នៅភាគខាងលិចកោះ Luzon របស់ហ្វីលីពីន។

ទីក្រុងប៉េកាំង អះអាងថា «រាល់សកម្មភាពយោធាដែលរំខានដល់សមុទ្រចិនខាងត្បូង បង្កើតជាចំណុចក្តៅ និងបំផ្លាញដល់សន្តិភាពនិងស្ថិរភាពក្នុងតំបន់ ត្រូវតែគ្រប់គ្រងឲ្យបាន”។

សមយុទ្ធសាកល្បងសមត្ថភាពវាយប្រហារនេះ ធ្វើឡើងនៅថ្ងៃតែមួយ ដែលសហរដ្ឋអាមេរិក អូស្ត្រាលី កាណាដា និងហ្វីលីពីន ក៏ធ្វើសមយុទ្ធយោធារួមគ្នាផងដែរ ក្នុងសមុទ្រចិនខាងត្បូង។

នៅក្នុងសេចក្តីថ្លែងការណ៍រួម ប្រមុខយោធានៃប្រទេសទាំងបួន បានប្តេជ្ញារក្សាសិទ្ធិសេរីភាពនៃការធ្វើនាវាចរណ៍និងហោះហើរ ហើយប្រើប្រាស់សមុទ្រនិងដែនអាកាសតាមការអនុញ្ញាតក្រោមច្បាប់អន្តរជាតិ។

ជាយូរមកហើយ សមុទ្រចិនខាងត្បូង គឺជាកម្មវត្ថុនៃការទាមទារត្រួតស៊ីគ្នា ដោយប្រទេសក្នុងតំបន់យ៉ាងច្រើន ខណៈក្រៅពីចិននិងហ្វីលីពីន, វៀតណាម ម៉ាឡេស៊ី ឥណ្ឌូណេស៊ី និងព្រុយណេ ក៏ទាមទារផ្នែកខ្លះផងដែរ។

ភាព​តានតឹង​ក្នុង​តំបន់​ កាន់តែ​ធ្ងន់ធ្ងរ​ឡើងៗ​ដោយសារ​សកម្មភាព​របស់​អាមេរិក​និង​សម្ព័ន្ធមិត្ត​ដែល​តែងតែ​បំពេញបេសកកម្មនូវអ្វី​ហៅខ្លួនហៅថា ជា​សេរីភាព​នៃ​ការធ្វើ​នាវាចរណ៍​ឆ្លងកាត់​តំបន់​ដែល​ទី​ក្រុង​ប៉េកាំង ទាមទារ​ជា​តំបន់​សេដ្ឋកិច្ច​ផ្តាច់មុខ។

ជុំវិញបញ្ហានេះដែរ ប្រទេសចិនបានព្រមានហ្វីលីពីនម្តងហើយម្តងទៀតកុំឲ្យ ពង្រឹងកិច្ចសហប្រតិបត្តិការយោធាជាមួយសហរដ្ឋអាមេរិកឲ្យសោះ ដោយនិយាយថា ទីក្រុងម៉ានីល នឹងត្រូវទីក្រុងវ៉ាស៊ីនតោន យកទៅប្រើដើម្បីបម្រើរបៀបវារៈភូមិសាស្ត្រនយោបាយ ហើយចុងក្រោយនឹងធ្វើឲ្យខូចដល់សន្តិសុខផ្ទាល់របស់ខ្លួនជាក់ជាមិនខានឡើយ៕

អត្ថបទ៖ សុខ សុវណ្ណ

ចុចអាន៖ ប្រទេសចំនួន​៤ ធ្វើ​សមយុទ្ធ​រួម​គ្នា​លើក​ដំបូង​លើ​សមុទ្រ​ចិន​ខាង​ត្បូង