ព័ត៌មានជាតិ

ថ្នាក់ដឹកនាំក្រសួងការងារ ៖ ស្ថានភាពការងារ និងលក្ខខណ្ឌការងារនៅរោងចក្រក្នុងខណ្ឌមានជ័យ រាជធានីភ្នំពេញ អនុវត្តបានត្រឹមត្រូវតាមច្បាប់ការងារ

បានផុស

១០ ម៉ោង មុន

នៅ

ថ្ងៃព្រហស្បតិ៍ ៨ សីហា ២០២៤

ដោយ

នៅថ្ងៃទី៨ ខែសីហា ឆ្នាំ២០២៤នេះ ថ្នាក់ដឹកនាំចំនួន៣រូប ជាតំណាងដ៏ខ្ពង់ខ្ពស់លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានចុះពិនិត្យមើលការងារ សំណេះសំណាល និងទទួលទានអាហារថ្ងៃត្រង់ជាមួយបងប្អូនកម្មករនិយោជិត និងតំណាងនិយោជករោងចក្រចំនួន៣ទីតាំង ក្នុងខណ្ឌមានជ័យ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្មវិធីចុះសំណេះសំណាល និងទទួលទានអាហារថ្ងៃត្រង់ជាមួយបងប្អូនកម្មករនិយោជិតនេះ មានរោងចក្រ MAKALOT GARMENTS (CAMBODIA) CO., LTD. ដឹកនាំដោយ លោក ងុយ រិទ្ធ រដ្ឋលេខាធិការ, រោងចក្រ W & D (CAMBODIA) CO., LTD. ដឹកនាំដោយ លោក ទេព ណាវី រដ្ឋលេខាធិការ, រោងចក្រ 8 STAR SPORTSWEAR LTD. ដឹកនាំដោយ លោក វឹត សុវណ្ណឧត្តម អនុរដ្ឋលេខាធិការ។

នៅក្នុងឱកាសជួបពិភាក្សាជាមួយតំណាងនិយោជករោងចក្រ និងបានពិនិត្យមើលស្ថានភាពការងាររបស់បងប្អូនកម្មករនិយោជិកជាង ១ ១០០នាក់ ដែលកំពុងបម្រើការងារនៅក្នុងរោងចក្រ MAKALOT GARMENTS (CAMBODIA) CO., LTD. ស្ថិតក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ លោក ងុយ រិទ្ធ បានវាយតម្លៃថា ទំនាក់ទំនងវិជ្ជាជីវៈរវាងនិយោជកនិងកម្មករនិយោជិតមានភាពល្អប្រសើរ រីលក្ខខណ្ឌការងារ និងអត្ថប្រយោជន៍ដែលខាងនិយោជករោងចក្រផ្តល់ជូនបងប្អូនកម្មករនិយោជិកបានត្រឹមត្រូវតាមច្បាប់ការងារ។

លោក កត់សំគាល់ឃើញថា ស្ថានភាពនៃការបំពេញការងាររបស់ងប្អូនកម្មករនិយោជិតមានភាពសកម្ម ប៉ុន្តែអ្វីដែលខាងរោងចក្រកំពុងត្រូវការបន្ថែមគឺកម្លាំងពលកម្មរបស់កម្មករនិយោជិត ខណៈដែលចំនួននៃការបញ្ជាទិញសម្លៀកបំពាក់មានការកើនឡើង។

ដោយឡែក ក្នុងការចុះជួបពិភាក្សាការងារជាមួយតំណាងនិយោជក និងសាកសួរសុខទុក្ខផ្ទាល់ជាមួយបងប្អូនកម្មករនិយោជិតប្រមាណ ១ ០០០នាក់ នៅរោងចក្រ នៅរោងចក្រ W & D (CAMBODIA) CO., LTD. ដែលមានទីតាំងស្ថិតក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ឯកឧត្តម ទេព ណាវី បានពិនិត្យដោយផ្ទាល់ពីដំណើរការផលិតកម្មក្នុងរោងចក្រ និងបានទទួលទានអាហាថ្ងៃត្រង់ជាមួយបងប្អូនកម្មករនិយោជិតនៅក្នុងបរិយាកាសដ៏មានភាពស្និទ្ធស្នាល។

លោក បានពិនិត្យឃើញថា ម្ចាស់រោងចក្របានអនុវត្តលក្ឌខណ្ឌការងារ រួមនិងផ្តល់អត្ថប្រយោជន៍ផ្សេងៗជូនបងប្អូនកម្មករនិយោជិកបានត្រឹមត្រូវ និងលើសពីច្បាប់ការងារបានកំណត់ទៀតផង។

ក្នុងនោះ រោងចក្រផ្តល់ជូនកម្មករនិយោជិក ដូចជា ប្រាក់ខែគោលអប្បបរមាតាមច្បាប់ប្រកាស ២០៤ដុល្លារ, ប្រាក់ថែមម៉ោង, ប្រាក់រង្វាន់ធ្វើការទៀងទាត់, ប្រាក់រង្វាន់អតីតភាពការងារ, និងសោហ៊ុយធ្វើដំណើរ, ថ្ងៃឈប់សម្រាកប្រចាំឆ្នាំ ជាដើម។ លោក ថ្លែងអំណរគុណទៅដល់ម្ចាស់រោងចក្រ ដែលបានគោរពតាមច្បាប់ការងារយ៉ាងខ្ជាប់ខ្ជួន និងអនុវត្តនូវស្តង់ដារការងារបានយ៉ាងល្អ ថែមទាំងបានផ្តល់អត្ថប្រយោជន៍ជាច្រើនទៅតាមគោលការណ៍របស់រាជរដ្ឋាភិបាលបានកំណត់ក្នុងការផ្តល់អត្ថប្រយោជន៍ដល់បងប្អូនកម្មករនិយោជិកផងដែរ។

ទន្ទឹមនេះ នៅក្នុងឱកាសជួបពិភាក្សាការងារជាមួយតំណាងនិយោជក និងជួបសាកសួរសុខទុក្ខបងប្អូនកម្មករនិយោជិកជាង ១ ០០០នាក់ ដែលកំពុងបំពេញការងារនៅរោងចក្រ 8 STAR SPORTSWEAR LTD. ដែលមានទីតាំងស្ថិតក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ លោក វឹត សុវណ្ណឧត្តម បានដើរពិនិត្យមើលស្ថានភាពការងារនៅតាមផ្នែកនីមួយៗក្នុងរោងចក្រ និងបានទទួលទានអាហារជាមួយបងប្អូនកម្មករនិយោជិកដើម្បីឆ្លៀតពេលសាកសួរសុខទុក្ខ រួមនិងអត្ថប្រយោជន៍ផ្សេងៗដែលកម្មករនិយោជិកទទួលបានផងដែរ។

លោកគូសបញ្ជាក់ថា ការចុះសួរសុខទុក្ខបងប្អូនកម្មករនិយោជិកដោយផ្ទាល់នៅតាមរោងចក្រនេះ គឺជាការគិតគូរយកចិត្តទុកដាក់ពីសំណាក់រាជរដ្ឋាភិបាលកម្ពុជាអាណត្តិទី៧ ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ទៅលើបងប្អូនកម្មករនិយោជិកនៅតាមរោងចក្រ សហគ្រាសទាំងអស់នៅទូទាំងប្រទេស ធ្វើយ៉ាងណាផ្សារភ្ជាប់ទំនាក់ទំនងកាន់តែជិតស្និទ្ធរវាងរដ្ឋាភិបាល ជាមួយបណ្តាម្ចាស់រោងចក្រ សហគ្រាស ជាពិសេសនោះគឺសុខទុក្ខរបស់បងប្អូនកម្មករនិយោជិកដែលរដ្ឋាភិបាលតែងតែគិតគូរជានិច្ច៕