អភិបាលក្រុងស្រុកចំនួន៤ នៃខេត្តពោធិ៍សាត់ ត្រូវបានផ្ទេរ និងតែងតាំងថ្មី ខណៈដំឡើងជាអភិបាលរងខេត្តម្នាក់

មន្ត្រីចំនួន៤រូប ត្រូវបានផ្ទេរ និងតែងតាំងតំណែងជាអភិបាលស្រុកក្រុង នៃខេត្តពោធិ៍សាត់ ខណៈអតីតអភិបាលស្រុកមួយរូប ត្រូវបានដំឡើងឱ្យទៅកាន់តំណែងជាអភិបាលរងខេត្តពោធិ៍សាត់។ នេះបើយោងតាមអនុក្រឹត្យរបស់ប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត។

អនុក្រឹត្យរបស់សម្ដេចធិបតី ប្រមុខរាជរដ្ឋាភិបាល បានសម្រេចផ្ទេរភារកិច្ចលោក ឆាយ គឹមម៉ុង ឋានន្តរស័ក្តិឧត្តមមន្រ្តី ថ្នាក់លេខ៥ ពីអភិបាលស្រុកកណ្តៀង ឱ្យកាន់មុខតំណែងជាអភិបាលស្រុកបាកាន ហើយអភិបាលស្រុកបាកានចាស់ លោក ផាយ ឡេង ដែលមានឋានន្តរស័ក្តិឧត្តមមន្ត្រី ថ្នាក់លេខ៦ ផ្ទេរឱ្យកាន់មុខតំណែងជាអភិបាលក្រុងពោធិ៍សាត់។

ចំណែក លោក ណារ៉ា ចំរើន ឋានន្តរស័ក្តិឧត្តមមន្រ្តី ថ្នាក់លេខ៦ នាយករដ្ឋបាលសាលាខេត្តពោធិ៍សាត់ ត្រូវបានសម្ដេចធិបតី សម្រេចតែងតាំងមុខតំណែងជាអភិបាលស្រុកកណ្តៀង និងលោក ធាម សុផាត ឋានន្តរស័ក្តិវរមន្រ្តី ថ្នាក់លេខ២ ដែលជាអភិបាលរងក្រុងពោធិ៍សាត់ ត្រូវបានតែងតាំងជាអភិបាលស្រុកភ្នំក្រវាញ។ ដោយឡែក អភិបាលស្រុកភ្នំក្រវាញចាស់ លោក ហេង សុភាណា ឋានន្តរស័ក្តិវរមន្ត្រី ថ្នាក់លេខ១ ត្រូវបានដំឡើងឱ្យមកកាន់មុខតំណែងជាអភិបាលរងខេត្តពោធិ៍សាត់៕