ព្រឹត្តិការណ៍ក្បួនរថយន្តអន្តរជាតិ Gumball 3000 Rally នឹងរួមចំណែកលើកកម្ពស់វិស័យទេសចរណ៍របស់កម្ពុជា

ព្រឹត្តិការណ៍ជួបជុំក្បួនរថយន្តអន្តរជាតិ Gumball 3000 Rally នឹងឆ្លងកាត់កម្ពុជា ដែលព្រឹត្តិការណ៍អន្តរជាតិមួយនេះ ត្រូវបានប្រមុខរាជរដ្ឋាភិបាលកម្ពុជា ចាត់ទុកថា នឹងចូលរួមចំណែកលើកកម្ពស់វិស័យទេសចរណ៍របស់កម្ពុជា ជាពិសេសទេសចរណ៍ក្នុងខេត្តសៀមរាប។

ដំណឹងត្រូវបានទម្លាយឱ្យដឹងនៅក្នុងជំនួបរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជាមួយនឹងលោក Maximillion Cooper ស្ថាបនិក និងជានាយកប្រតិបត្តិនៃក្រុមហ៊ុន Gumball 3000 នាព្រឹកថ្ងៃទី៩ ខែសីហា ឆ្នាំ២០២៤ នៅវិមានសន្តិភាព។

នៅចំពោះមុខសម្ដេចធិបតី, លោក Maximillion Cooper ស្ថាបនិក និងជានាយកប្រតិបត្តិនៃក្រុមហ៊ុន Gumball 3000 បានបង្ហាញការចាប់អារម្មណ៍ចំពោះវប្បធម៌ដ៏សម្បូរណ៍បែប ភាពស្រស់ស្អាតនៃប្រាង្គប្រាសាទនានារបស់កម្ពុជា និងសុខសន្តិភាពនៅកម្ពុជា។ បើតាមលោក Maximillion Cooper ក្នុងឱកាសប្រារព្ធខួប២៥ឆ្នាំ ព្រឹត្តិការណ៍ជួបជុំក្បួនរថយន្តអន្តរជាតិ Gumball 3000 Rally ដែលអ្នកចូលរួមសុទ្ធសឹងជាបុគ្គលល្បីៗ មកពីជាង៥០ប្រទេស នឹងឆ្លងកាត់ប្រទេសកម្ពុជា ក្នុងខែកញ្ញា ឆ្នាំ២០២៤ ខាងមុខ។ ព្រឹត្តិការណ៍នេះនឹងរួមចំណែកក្នុងការផ្សព្វផ្សាយវប្បធម៌ ប្រពៃណី​ និងសក្តានុពលទេសចរណ៍របស់កម្ពុជា។

សម្តេចធិបតី ហ៊ុន ម៉ាណែត បានស្វាគមន៍ និងគាំទ្រការរៀបចំព្រឹត្តិការណ៍អន្តរជាតិដ៏ធំនេះនៅកម្ពុជា។ សម្ដេចធិបតី បានប្រាប់លោក Maximillion Cooper ថា អាជ្ញាធរ និងដៃគូពាក់ព័ន្ធកម្ពុជាបានត្រៀមខ្លួនជាស្រេចក្នុងការសម្របសម្រួល និងចូលរួមក្នុងព្រឹត្តិការណ៍នេះ​ ពិសេសការត្រៀមបដិសណ្ឋារកិច្ច​ដ៏កក់ក្តៅ និងការស្វាគមន៍យ៉ាងរាក់ទាក់​​របស់ប្រជាជនខ្មែរ​​។ 

សម្តេចធិបតី ក៏បានអរគុណមូលនិធិ Gumball 3000 Rally ដែលបានចូលរួមចំណែកក្នុងការគាំទ្រដល់មន្ទីរពេទ្យកុមារអង្គរ ខេត្តសៀមរាប និងគ្រោងជួយសាលាបណ្តុះបណ្តាលកីឡានៅកម្ពុជា​ផងដែរ។

គួរជម្រាបថា ក្រុមហ៊ុន Gumball 3000 ត្រូវបានបង្កើតឡើងក្នុងឆ្នាំ១៩៩៩ ដោយជនជាតិអង់គ្លេស គឺជាម៉ាកយីហោដ៏ល្បីផ្តោតលើការរៀបចំព្រឹត្តិការណ៍នៃការកម្សាន្ត និងរបៀបរស់នៅបែបប្រណិតភាព លំដាប់ពិភពលោក៕