អភិបាលខណ្ឌច្បារអំពៅ ដាក់គ្រឿងចក្រកាយប្រឡាយបង្ហូទឹករំដោះបាន ៤ភូមិ បន្ទាប់ពីភ្លៀងធ្លាក់ខ្លាំងនាប៉ុន្មានថ្ងៃនេះ

នៅព្រឹកថ្ងៃទី១០ ខែសីហានេះ លោក ចេង មុនីរ៉ា អភិបាលខណ្ឌច្បារអំពៅ បានដាក់គ្រឿងចក្រចុះកាយប្រឡាយដើម្បីរំដោះទឹកចេញពីតំបន់លិចលង់ផ្ទះសំបែងរបស់ប្រជាពលរដ្ឋ ក្នុងអំឡុងភ្លៀងធ្លាក់ខ្លាំងនាប៉ុន្មានថ្ងៃនេះ ហើយក្នុងនោះទឹកបានស្រកធ្វើឱ្យប្រជាពលរដ្ឋសប្បាយចិត្តឡើងវិញ។

លោកស្រី យន់ សុផល ចៅសង្កាត់វាលស្បូវ បានប្រាប់កម្ពុជាថ្មីថា នៅថ្ងៃទី១០ ខែសីហានេះ លោក ចេង មុនីរ៉ា អភិបាលខណ្ឌច្បារអំពៅ បានដឹកនាំមន្ត្រីជំនាញ រួមទាំងអាជ្ញាធមូលដ្ឋាន ដើម្បីដាក់គ្រឿងចក្រចុះកាយប្រឡាយបង្ហូទឹកភ្លៀងដែលបង្កឱ្យលិចលង់លំនៅឋានរបស់ប្រជាពលរដ្ឋចំនួន ៤ភូមិ ក្នុងសង្កាត់វាលស្បូវ ខណ្ឌច្បារអំពៅ រាជធានីភ្នំពេញ ក្នុងអំឡុងពេលដែលភ្លៀងធ្លាក់ខ្លាំងប៉ុន្មានថ្ងៃនេះ។

លោកស្រីចៅសង្កាត់ បានបន្តថា កន្លងមកភូមិចំនួន៤ ដែលលិចលង់ គឺពុំបានលិចលង់ទេលុះដល់ពេលធ្លាក់ខ្លាំងកាលពីថ្ងៃទី៨ និងទី៩ ខែសីហា នេះបង្កឱ្យមានការលិចលង់រហូតដល់ លោកអភិបាលខណ្ឌច្បារអំពៅ បញ្ជាឱ្យយកគ្រឿងចក្រជាច្រើនគ្រឿងចុះកាយប្រឡាយបង្ហូទឹកចេញពីសង្កាត់វាលស្បូវឆ្ពោះទៅ ព្រែកប្រាចូលទៅព្រែកដែលកំពុងស្តាទើបទឹកបានស្រកយ៉ាងលឿនរហូតដល់រីងស្ងួតចំនួន ៤ភូមិ។

ជំនួសមុខឱ្យជាពលរដ្ឋក្នុងមូលដ្ឋានសង្កាត់វាលស្បូវ លោកស្រីចៅសង្កាត់ បានថ្លែងអំណរគុណដល់លោក ចេង មុនីរ៉ា អភិបាលខណ្ឌច្បារអំពៅដែលបានដាក់គ្រឿងចក្រកាយប្រឡាយបង្ហូទឹកឱ្យបានរីងស្ងួតដូចដើមវិញ៕

ដោយ៖នរា