សម្តេចតេជោ៖ ខ្ញុំមិនទាន់អស់អំណាចទេ ខ្ញុំត្រូវការពារប្រជាជនរបស់ខ្ញុំ និងទឹកដីដ៏កម្សត់

មិនអាចប្រកែកបានទេថា គណបក្សប្រជាជនកម្ពុជា ទទួលបានសំឡេងបោះឆ្នោតគាំទ្រភ្លូកទឹកភ្លូកដី តាមរយៈការបោះឆ្នោតជ្រើសតាំងតំណាងរាស្រ្តនីតិកាលទី ៧ រហូតដល់ជាង ៨២ភាគរយ ។ ជាមួយនឹងការគាំទ្រដ៏លើសលប់នេះ គណបក្សប្រជាជន បានបង្ហាញពីការប្តេជ្ញាចិត្តរបស់ខ្លួនក្នុងការការពារប្រជាពលរដ្ឋ និងធានាបាននូវសុខុមាលភាពរបស់ប្រជាជន។
សម្តេចតេជោ ហ៊ុន សែន ប្រធានព្រឹទ្ធសភា នៅថ្ងៃទី​១២ ខែសីហានេះ មានប្រសាសន៍ថា៖«អ្នកត្រូវប្រមើលឱ្យបានពិតប្រាកដ ជាមួយនឹងភាពរឹងមាំ និងការឈរជើង និងការគាំទ្ររបស់ប្រជាជន ចំពោះទឹកដីដ៏កម្សត់របស់យើង ជាមួយនឹងការដឹកនាំរបស់ខ្ញុំ ជាមួយរាជរដ្ឋាភិបាលបច្ចុប្បន្ន»។

សម្តេចតេជោ បន្តថា៖« ហ៊ុន សែន មិនទាន់អស់អំណាចទេ ហ៊ុន សែន នៅសល់អំណាចនៅក្នុងនីតិបញ្ញត្តិ ក៏ដូចជាអំណាចរបស់គណបក្សប្រជាជន ដែលត្រូវមានការទទួលខុសត្រូវពលរដ្ឋរបស់ខ្លួន ដែលខ្លួនបានសន្យាស្តីពីការការពារនូវសន្តិភាព ស្ថិរភាពខាងនយោបាយ និងសេចក្តីសុខជូនប្រជាជន»។

ការបញ្ជាក់នេះ ដើម្បីឆ្លើយតបទៅនឹងក្រុមជ្រុលនិយមក្រៅប្រទេសដែលមានបំណងផ្តួលរំលំរាជរដ្ឋាភិបាលស្របច្បាប់។ ជាមួយនឹងការធានាអះអាងការពារប្រជាជនខ្លួន សម្តេចក៏បានព្រមានថា រាជរដ្ឋាភិបាលកម្ពុជាស្របច្បាប់ដែលកើតចេញពីការបោះឆ្នោត នឹងចាត់គ្រប់វិធានការ ដើម្បីរក្សាឱ្យខាងតែបាននូវសុខសន្តិភាព អាយុជីវិតរបស់ប្រជាជន។
យ៉ាងណាមិញ សម្តេចអំពាវនាវដល់បងប្អូនដែលខ្វះការពិចារណា ឱ្យពិចារណាឡើងវិញ ចៀសវាងចូលរួមធ្វើបាតុកម្ម បង្កអសន្តិសុខ និងសណ្តាប់ធ្នាប់សង្គម។

សម្តេចបានបន្ថែមទៀតថា បងប្អូនត្រូវគិតឱ្យហ្មត់ចត់មុនពេលដែលបងប្អូនធ្វើដំណើរមកកាន់បាតុកម្ម ឬមហាបាតុកម្ម ឬឈានទៅដល់ការផ្តួលរំលំ ព្រោះប​ន្ទាត់ក្រហមនៅទីនេះគឺមាន រដ្ឋធម្មនុញ្ញចែងហើយអំពីបញ្ហាសិទ្ធិបញ្ចេញមតិ។ សម្តេចតេជោថ្លែងថា៖« យើងទទួលយកនូវការកង្វល់របស់បងប្អូនស្តីពីការបាត់បង់ទឹកដី យើងកង្វល់អំពីបងប្អូនស្តីអំពីឯករាជ អធិបតេយ្យភាព ប៉ុន្តែបងប្អូនត្រូវមើលឱ្យច្បាស់ទៅដូចអ្វីដែលពួកប្រឆាំងនៅបរទេសកំពុងតែញុះញង់ឱ្យបងប្អូនធ្វើនោះទេ»៕