និស្សិត៦០នាក់ បានជ្រើសរើសសម្ភាសក្នុងកម្មវិធីជជែកដេញដោលពី «ស្រ្តី និងផ្នត់គំនិតយេនឌ័រក្នុងសតវត្សទី២១»

ក្រុមការងាររៀបចំកម្មវិធីជជែកដេញដោល «ទស្សនៈយុវជន» បានឱ្យដឹងថា បេក្ខជនដែលជានិស្សិតជាង៦០នាក់ ក្នុងចំណោមបេក្ខជន៩១នាក់ ដែលបានដាក់ពាក្យប្រកួតក្នុងកម្មវិធីជជែកដេញដោលពី «ស្រ្តី និងផ្នត់គំនិតយេនឌ័រក្នុងសតវត្សទី២១» ត្រូវបានជ្រើសរើសសម្ភាសនៅថ្ងៃទី១១ ខែសីហា ឆ្នាំ២០២៤ ដោយ RULErs និង NGO-CEDAW។

ក្រុមការងាររៀបចំកម្មវីបញ្ជាក់ថា កម្មវិធីជជែកដេញដោលស្តីពី «ស្រ្តី និងផ្នត់គំនិតយេនឌ័រក្នុងសតវត្សទី២១» ដែលរៀបចំដោយ RULErs មានបេក្ខជនដាក់ពាក្យរហូតដល់៩១នាក់ ក្នុងនោះមានបេក្ខជន ៦០នាក់ត្រូវបានជ្រើសរើសមកសម្ភាស ដោយមើលឃើញថា ពួកគេជាអ្នកចូលចិត្តការជជែកដេញដោល និងពិភាក្សាវែកញែកពីប្រធានបទពាក់ព័ន្ធនឹងសមភាពយេនឌ័រ និងការលុបបំបាត់ការរើសអើងគ្រប់រូបភាពលើស្រ្តី។

បេក្ខជនទាំងអស់បានចូលរួមវគ្គរង្វាយតម្លៃដែលក្រុមការងារបានណែនាំពីសាវតានៃគម្រោងទស្សនៈយុវជន ព្រមទាំងលក្ខន្តិកមួយចំនួនដើម្បីឱ្យបេក្ខជនអាចត្រៀមលក្ខណៈរួចរាល់ក្នុងការសម្ភាស។ អ្វីដែលពិសេសជាងនេះទៅទៀត បេក្ខជនទាំងអស់គ្នាបានទទួលឱកាសក្នុងការស្វែងយល់ពីប្រធានបទពាក់ព័ន្ធនឹងសមភាពយេនឌ័រតាមរយៈការបណ្តុះបណ្តាលដោយ NGO-CEDAW ផងដែរ។

បន្ទាប់ពីទទួលបានការបណ្តុះបណ្តាល និងការណែនាំលក្ខន្តិកមួយចំនួន បេក្ខជនបានចូលសម្ភាសដើម្បីបង្ហាញពីសមត្ថភាព និងឆន្ទៈរបស់ពួកគេទៅកាន់គណៈកម្មការ ។ នៅក្នុងចំណោមប្រមាណបេក្ខជនចំនួន ៦០ នាក់ មានតែបេក្ខជន ១៦ នាក់តែប៉ុណ្ណោះនឹងត្រូវបានជ្រើសរើសទៅវគ្គបន្តទៀតដើម្បីបង្វឹកពីរបៀបដេញដោល និងបណ្តុះបណ្តាលចំណេះដឹងពាក់ព័ន្ធនឹងយេនឌ័រ។

សូមរម្លឹកថា ឆ្នាំ២០២៤នេះ ជាលើកទី៤ហើយដែលក្រុមការងារ RULErs និង NGO-CEDAW បានសហការគ្នាក្នុងការរៀបចំការប្រកួតជជែកដេញដោលលើប្រធានបទជុំវិញសិទ្ធិស្រ្តី និងសមភាពយេនឌ័រ៕