ឈ្មួញសម្រុកទិញស្លាខ្ចី ដឹកទៅលក់ប្រទេស​វៀតណាម ១ ថ្ងៃៗ ពី ២០ ទៅ ៣០ តោន

ផ្លែស្លាខ្ចីមូលទ្រវែងកំពុងត្រូវប៉ាន់ត្រូវ​ឈ្មួញសម្រុកទិញដឹកចេញពីខេត្តត្បូងឃ្មុំ ទៅលក់នៅប្រទេសវៀតណាមក្នុងមួយថ្ងៃៗ មិនក្រោមពី ២០ ទៅ ៣០ តោននោះទេ។

អ្នកស្រី ណុច សុខឃីម អាយុ ៥៤ ឆ្នាំ រស់នៅភូមិវាលកណ្តៀង ឃុំជប់ ស្រុក/ខេត្តត្បូងឃ្មុំបានបញ្ជាក់ឲ្យដឹងថា ជារៀងរាល់ឆ្នាំគ្រួសារ​អ្នក​ស្រីតែងទិញស្លាពីប្រជាពលរដ្ឋមកហាន់​ធ្វើស្លារចំណិត ដែលក្នុង១គីឡូក្រាមស្លាស្រស់តម្លៃ ១ ២០០ រៀល ហើយពេលស្លាគ្រាមលក់ចេញបានតម្លៃ ២៧ ០០០ រៀល។

ឆ្នាំនេះស្លាថោកជាងឆ្នាំទៅលក់បានតម្លៃ ៣ ម៉ឺនរៀល។ នេះបើតាមអ្នកស្រី សុខឃីម។

ក្នុងស្លាស្រស់ ៥០០ គីឡូក្រាម ហាលគ្រាមចំណិតបានតែ​ ៣៦ គីឡូក្រាមតែប៉ុណ្ណោះ។ មុខរបរនេះ អាចរកចំណូលបាន ៥ ទៅ ៦ លានរៀលដែរក្នុង១ឆ្នាំៗ ជាចំណូលសំខាន់សម្រាប់ដោះស្រាយជីវភាពគ្រួសារបានដែរ។

អ្នកស្រី​បន្ថែម​ថា បើកសិករមានដីទំហំធំ ដាំស្លារអាចរស់ស្រួលមែនទែន។

លោក ស៊ាន សឿន អាយុ ៣២ ឆ្នាំ រស់នៅភូមិចុងព្រែក ឃុំក្រែក ស្រុកពញាក្រែក ខេត្តត្បូងឃ្មុំបានឲ្យដឹងដែរថា រាល់ថ្ងៃលោក​បានដើរទិញស្លាខ្ចីក្នុងខេត្តត្បូងឃ្មុំ ខេត្តកំពង់ចាម ក្រចេះ និងខេត្តកំពង់ធំ យកមកលក់ឲ្យឈ្មួញកណ្តាល ក្នុង ១ គីឡូក្រាមបាន ២៧០០ រៀល ខណៈទិញពីគល់តម្លៃ ២០០០រៀល។

លោក​ថា គិតទៅក្នុង១ថ្ងៃអាចរកប្រាក់ចំណូលបាន ៤ ទៅ ៥ ម៉ឺនរៀលដែរ ហើយក្រុមលោក​ដែលនាំគ្នាដើរទិញពីគ្រប់មូលដ្ឋានទាំង ៣ ខេត្ត មានគ្នាចំនួន ២០ នាក់ ទិញរាល់ថ្ងៃ អាចរកចំណូលបានតាមលទ្ធភាពរៀងៗខ្លួន។

លោក ភិន វណ្ណៈ អាយុ ៣០ ឆ្នាំ ជាឈ្មួញ​មួយ​រូបរស់នៅភូមិជប់ ឃុំជប់ ស្រុក/ខេត្តត្បូងឃ្មុំបាន​ទទួលទិញស្លាខ្ចី ក្នុង ១ គីឡូក្រាមតម្លៃពី ២ ទៅ ៣ ពាន់រៀល។

លោក​ប្រាប់​ថា លោក​ទិញតែប្រភេទស្លាមូលទ្រវែងទេ ហើយ​មូលអត់ទិញទេ ព្រោះទីផ្សារវៀតណាមស៉ីតែស្លាមូលវែងហើយ​ខ្ចីទៀត ដែល​​ក្នុង១ថ្ងៃៗ លោក​អាចប្រមូលទិញបានពី ៣ ទៅ ៤ តោន ដឹកយកទៅលក់នៅប្រទេស​វៀតណាម។

លោកបញ្ជាក់ទៀតថា ឈ្មួញមានច្រើន រាល់ថ្ងៃស្លាដឹកទៅលក់នៅប្រទេសវៀតណាមមិនក្រោមពី ២០ ទៅ៣០តោននោះទេ។

ផ្លែស្លាមានពីរប្រភេទ គឺប្រភេទផ្លែរាងមូលទ្រវែង និងប្រភេទផ្លែមូល។ ពេលផ្លែចាស់ល្មមអាចហាន់ជាចំណិតហាលឲ្យគ្រាម គេថា ស្លាចំណិត គុណប្រយោជន៍ ប្រជាពលរដ្ឋខ្មែរយើង ចាស់ៗតែង ពិសារទាំងខ្ចី ទាំងចំណិតជាមួយម្លូរគ្រាន់កំដរមាត់ ពិសេសស្លាចំណិតគេអាចរៀបធ្វើជា ស្លាធម៌ មានលាយ ទៀន ធូប និងពិធីប្រពៃណីខ្មែរយើង មិនអាចអត់ស្លាបានឡើយ ហើយបច្ចុប្បន្នក៏នៅបន្តនិយមដែរ ។ បងប្អូនកសិករយើងដាំស្លាក៏អាចរកចំណូលបានមួយផ្នែកធំសម្រាប់ជួយសេដ្ឋកិច្ចគ្រួសារបានដែរ ។ ផលស្លាល្អ ស្រួលលក់ ពោលគឺ មានម៉ូយចូលទិញដល់ផ្ទះតែម្តង ទាំងផ្លៃស្លាខ្ចី និងស្លាចំណិត ។
សាន វិឡែម ១៣.៨.២០២៤