ព័ត៌មានជាតិ

មន្ត្រីជាន់ខ្ពស់ ប.ស.ស ៖ មានសហគ្រាសខ្លះព្យាយាមលាក់ប្រាក់ឈ្នួលកម្មករដោយប្រកាសបង់ភាគទានមិនត្រឹមត្រូវ

បានផុស

៦ ខែ មុន

នៅ

ថ្ងៃអង្គារ ១៣ សីហា ២០២៤

ដោយ

មន្ត្រីជាន់ខ្ពស់ ប.ស.ស បានលើកឡើងថា មានសហគ្រាស គ្រឹះស្ថានមួយចំនួន ព្យាយាមលាក់បាំងប្រាក់ឈ្នួលកម្មករ-និយោជិត ដោយប្រកាសបង់ភាគទានមិនត្រឹមត្រូវ ដែលឈានដល់ការអនុវត្តនីតិវិធីទៅតាមផ្លូវច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីផ្សព្វផ្សាយស្តីពី «គោលការណ៍ បទប្បញ្ញត្តិច្បាប់ និងអត្ថប្រយោជន៍ នៃរបបសន្តិសុខសង្គម» កាលពីព្រឹកថ្ងៃទី ១៣ សីហានេះ នៅសាលប្រជុំសន្តិភាព ស្នាក់ការកណ្ដាល ប.ស.ស. រាជធានីភ្នំពេញ លោក គឹម កែវរស្មី អគ្គនាយករង ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានបន្តថា កន្លងមកមានសហគ្រាស គ្រឹះស្ថានមួយចំនួន ពុំទាន់យល់ច្បាស់គ្រប់ជ្រុងជ្រោយក្នុងការបំពេញកាតព្វកិច្ចរបស់ខ្លួន និងសហគ្រាស គ្រឹះស្ថានមួយចំនួន ព្យាយាមលាក់ប្រាក់ឈ្នួលកម្មករ-និយោជិត ដោយប្រកាសបង់ភាគទានមិនត្រឹមត្រូវ ដែលឈានដល់ការអនុវត្តនីតិវិធីទៅតាមផ្លូវច្បាប់ ហើយបច្ចុប្បន្នមានសហគ្រាសមួយចំនួនទៀត កំពុងតែជាប់បណ្ដឹងនៅតុលាការដោយសារមិនព្រមអនុវត្តកាតព្វកិច្ចរបស់ខ្លួននេះផងដែរ។

លោកអគ្គនាយករង បានជំរុញឱ្យសហគ្រាស គ្រឹះស្ថាន និងសមាគមទាំងអស់ សូមបង្កើនកិច្ចសហប្រតិបត្តិការ និងរក្សាទំនាក់ទំនងឱ្យកាន់តែរឹងមាំជាមួយ ប.ស.ស. ដើម្បីអាចប្រឹក្សា ក៏ដូចជាអាចទទួលបានព័ត៌មានច្បាស់ អំពីគោលការណ៍ បទប្បញ្ញត្តិច្បាប់របបសន្ដិសុខសង្គម ព្រមទាំងអត្ថប្រយោជន៍ នៃរបបសន្ដិសុខសង្គម សម្រាប់កម្មករ-និយោជិត។

លោកអគ្គនាយករង សង្ឃឹមយ៉ាងមុតមាំថា ម្ចាស់សហគ្រាស គ្រឹះស្ថានដែលបានចូលរួម នឹងអនុវត្តកាតព្វកិច្ចដែលមានចែងជាធរមាន នឹងបន្ដផ្សព្វផ្សាយបន្ថែមទៀតគ្រប់រូបភាព ជាពិសេសសូមបង្កើនការទំនាក់ទំនងឱ្យកាន់តែជិតស្និទ្ធប្រសើរជាងមុនជាមួយនឹងក្រុមការងារ ប.ស.ស. ដើម្បីដោះស្រាយនូវរាល់បញ្ហានានា ដែលធ្វើឱ្យប៉ះពាល់ដល់ប្រយោជន៍សហគ្រាសខ្លួន ក៏ដូចជាអត្ថប្រយោជន៍របស់កម្មករ-និយោជិត៕

អត្ថបទ ៖ សំអឿន