ព័ត៌មានជាតិ

កូរ៉េ ផ្ដល់ឧបករណ៍ជំនួយមានតម្លៃ ២៥ ម៉ឺនដុល្លារ ដល់ក្រសួងអប់រំ សម្រាប់សិស្សមានបញ្ហាក្នុងការមើល

បានផុស

៧ ខែ មុន

នៅ

ថ្ងៃពុធ ១៤ សីហា ២០២៤

ដោយ

កាលពីថ្ងៃទី ១២ ខែសីហា ឆ្នាំ ២០២៤ សេវាលទ្ធកម្មសាធារណៈ នៃសាធារណរដ្ឋកូរ៉េ បានផ្តល់ឧបករណ៍រួមមាន Dot Pads ចំនួន ៤០ គ្រឿង កុំព្យូទ័រយួរដៃចំនួន ៥ គ្រឿង និងកុំព្យូទ័របន្ទះចំនួន ១០ គ្រឿង ជូនដល់ក្រសួងអប់រំ យុវជន និងកីឡា សម្រាប់ជំនួយដល់សិស្សដែលមានបញ្ហានៅក្នុងការមើល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំនួយនេះ នឹងត្រូវចែកជូនដល់សាលា និងវិទ្យាស្ថានអប់រំពិសេស ក្នុងរាជធានីភ្នំពេញ បាត់ដំបង សៀមរាប និងកំពង់ចាម។

អ្នកស្រី Moon Jung Choi ប្រធានការិយាល័យ KOICA ប្រចាំប្រទេសកម្ពុជា មានប្រសាសន៍ថា “ឧបករណ៍ទាំងនេះ អាចជាគន្លឹះសម្រាប់សិស្សដែលមានបញ្ញាមើល ឲ្យពួកគាត់មានឱកាសសិក្សាច្រើនជាងមុន”។

Dot Pad គឺជាឧបករណ៍ជំនួយសម្រាប់អ្នកមានបញ្ហាក្នុងការមើល។ វាអាចបកស្រាយមិនត្រឹមតែអត្ថបទប៉ុណ្ណោះទេ ប៉ុន្តែថែមទាំងក្រាហ្វ គំនូសតាង ឬដ្យាក្រាមទៅជាអក្សរ Braille ដែលជាទម្រង់ នៃភាសាសរសេរសម្រាប់មនុស្សមានបញ្ហាក្នុងការមើល។

លោក ពុត សាមិត្ត អនុរដ្ឋលេខាធិការក្រសួងអប់រំ យុវជន និងកីឡា បានអរគុណដល់សាធារណរដ្ឋកូរ៉េ ហើយលោករំពឹងថា ជំនួយនេះ នឹងជួយដល់សិស្សចំនួន ២១៣ នាក់ និងគ្រូចំនួន ២០ នាក់ ដែលមានបញ្ហាក្នុងការមើល និងគាំទ្រពួកគាត់ឲ្យទទួលព័ត៌មានបន្ថែមទៀត។ ប្រភេទ នៃបច្ចេកវិទ្យានេះ នឹងពង្រីកជម្រើសរបស់យើងក្នុងការលើកកម្ពស់ការអប់រំដែលរួមបញ្ចូល៕

អត្ថបទ ៖ សំអឿន