អគារមន្ទីរសុខាភិបាលខេត្តរតនគិរី​ជាប់​បឹង​កន្សែង ផ្លាស់ប្តូរទីតាំងថ្មីមកដាក់នៅព្រលានយន្តហោះចាស់

អគារនៃមន្ទីរសុខាភិបាលខេត្តរតនគិរីបច្ចុប្បន្នដែល​ស្ថិតនៅជាប់​មាត់បឹងកន្សែង នឹង​ត្រូវបានផ្លាស់ប្តូរទីតាំងថ្មីមកដាក់នៅដីព្រលាន​យន្តហោះចាស់ ស្ថិតក្នុងភូមិ ៧ មករា សង្កាត់ឡាបានសៀក ក្រុងបានលុង លើផ្ទៃដីទំហំ​ជាង ១ ហិកតា ជាប់សាលាខេត្ត។ នេះបើតាមការបញ្ជាក់ពីលោក ញ៉ែម សំអឿន អភិបាលខេត្តរតនគិរី​ឆ្លើយប្រាប់​កម្ពុជាថ្មី​នៅ​តាមប្រព័ន្ធ​តេលេក្រាម។

អគារមន្ទីរសុខាភិបាលខេត្ត​រតនគិរី​ស្ថិត​នៅ​ជាប់​បឹងកន្សែង​ គ្រោង​រុះរើនាពេល​ខាងមុខ

លោក ញ៉ែម សំអឿន បាន​បន្ត​ថា បច្ចុប្បន្នដំំណើរការ​សាងសង់អគារមន្ទីរសុខាភិបាលថ្មី បានចាប់ផ្តើមបុកគ្រឹះ​បណ្តើរ​ៗជាងកន្លះខែមកហើយ។ បន្ទាប់ពីសាងសង់រួច សំណង់អគារមន្ទីរសុខាភិបាលចាស់​នឹង​រុះរើចេញ និងធ្វើឲ្យ​រមណីដ្ឋាន​បឹងកន្សែង ក្លាយជាកន្លែងដែលមានបរិស្ថានល្អ រមណីយដ្ឋានស្អាត សោភណ្ឌភាពស្រស់បំព្រង​ប្រកបដោយភាពទាក់ទាញ ដើម្បីស្វាគមន៍ភ្ញៀវទេសចរជាតិ-អន្តរជាតិ មកទស្សនាកម្សាន្ត​ឲ្យកាន់តែច្រើនកុះករ។

ក្នុងពិធីចែកសញ្ញាបត្រដល់និស្សិតសាកលវិទ្យាល័យពុទ្ធិសាស្ត្រ កាលថ្ងៃទី៦ ខែសីហា ឆ្នាំ២០២៤ សម្តេចបវរធិបតី ហ៊ុន ម៉ាណែត នាយករដមន្ត្រី បានជំរុញឲ្យអភិបាលខេត្តរតនគិរី លោក ញ៉ែម សំអឿន កែប្រែតំបន់បឹងកន្សែងឲ្យកាន់តែមាន​ភាពទាក់ទាញសម្រាប់ទេសចរណ៍នៅក្នុងខេត្ត និងត្រូវរក្សាបឹងកន្សែងទុកជាសម្បត្តិសាធារណៈ។

សម្តេចធិបតី ហ៊ុន ម៉ាណែត ក៏បានឯកភាពលើការដោះ​ដូរទីតាំងមន្ទីរសុខាភិបាលខេត្តរតនគិរី ចេញពីទីតាំងបច្ចុប្បន្ន គឺស្ថិត​លើមាត់បឹងកន្សែងទៅទីតាំងថ្មី ដែលមានផ្ទៃដីជាង ១ ហិកតា នៅជាប់សាលាខេត្ត ជាមួយកញ្ចប់ថវិកាជាង ៣ លានដុល្លារ៕

អត្ថបទ៖ វុទ្ធឦសាន