ព័ត៌មានជាតិ

ក្រសួងការងារ ប្រកាសជ្រើសរើសកម្លាំងពលកម្មជាង ៥ ៣០០ កន្លែង ក្នុងពិព័រណ៍ការងារ ៣ ថ្ងៃ នៅផ្សារអ៊ីអន ២

បានផុស

៧ ខែ មុន

នៅ

ថ្ងៃសុក្រ ១៦ សីហា ២០២៤

ដោយ

ក្រសួងការងារ និងបណ្ដុះបណ្ដាលវិជ្ជាជីវៈ បានរៀបចំពិព័រណ៍ការងារ និងមគ្គុទ្ទេសក៍អាជីពឆ្នាំ ២០២៤ រយៈពេល ៣ ថ្ងៃ ចាប់ពីថ្ងៃទី ១៦ ដល់ថ្ងៃទី ១៨ សីហា នៅផ្សារទំនើប AEON សែនសុខ ដោយមានការចូលរួមពីក្រុមហ៊ុន សហគ្រាស ស្ថាប័ន និងគ្រឹះស្ថានអប់រំបណ្ដុះបណ្ដាលប្រមាណ ២០ ដែលប្រមូលផ្ដុំព័ត៌មានជ្រើសរើសកម្លាំងពលកម្មប្រមាណជាង ៥ ៣០០ កន្លែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាម លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា ក្រសួងបើកដំណើរការ សាខាបេឡាជាតិសន្តិសុខសង្គម(ប.ស.ស.) និងមជ្ឈមណ្ឌលការងារ នៅផ្សារទំនើប អ៊ីអន ម៉ល សែនសុខ ស៊ីធី ដោយក្នុងនោះក៏មានការរៀបចំពិព័រណ៍ការងារ និងមគ្គុទ្ទេសក៍អាជីព ឆ្នាំ ២០២៤ ជាពិសេសក៏មានការដាក់បម្រើសេវាម៉ាស៊ីនឆុងកាហ្វេរ៉ូបូត (Robbot Coffee) ចំនួន ៣ ថ្ងៃ ចាប់ពីថ្ងៃទី ១៦-១៧-១៨ ខែសីហា ឆ្នាំ ២០២៤ ចាប់ពីម៉ោង ០៩:០០ នាទីព្រឹក រហូតដល់ម៉ោង ២០:៣០ នាទីយប់។

លោករដ្ឋលេខាធិការ បានបន្តថា ព្រឹត្តិការណ៍នេះគឺជាឱកាសមួយដើម្បីផ្សព្វផ្សាយពីបេឡាជាតិសន្តិសុខសង្គម(ប.ស.ស.) និងទីភ្នាក់ងារជាតិមុខរបរ និងការងារ (NEA) ឱ្យបានទូលំទូលាយដល់សាធារណជនទាំងអស់ជ្រាបជាព័ត៌មាន។ បន្ថែមពីនេះ កម្មវិធីពិព័រណ៍ការងារ និងមគ្គុទ្ទេសក៍អាជីពឆ្នាំនេះ មានក្រុមហ៊ុន សហគ្រាស ស្ថាប័ន និងគ្រឹះស្ថានអប់រំបណ្ដុះបណ្ដាលចំនួនប្រមាណ ២០ ដែលប្រមូលផ្ដុំព័ត៌មានជ្រើសរើសកម្លាំងពលកម្មប្រមាណជាង ៥ ៣០០ កន្លែង។ ក្នុងនោះដែរ កម្មវិធីក៏មានវេទិកាចែករំលែកចំណេះដឹង និងបទពិសោធ និង «ការត្រៀមខ្លួនចូលទីផ្សារការងារ និងឱកាសកម្មសិក្សាការងារ» ដោយវាគ្មិនចំនួន ៥ រូប ព្រមទាំងមានការប្រគំតន្ត្រី និងការចូលរួមឆ្លើយសំណួរ ដើម្បីទទួលបានរង្វាន់ផងដែរ។

លោករដ្ឋលេខាធិការ បញ្ជាក់បន្ថែមថា កម្មវិធីពិព័រណ៍ការងារ និងមគ្គុទ្ទេសក៍អាជីព ត្រូវបានរៀបចំឡើងជាវេទិកាថ្មីមួយនៅតាមផ្សារទំនើប ដើម្បីជាការជួបជុំគ្នានៅកន្លែងតែមួយ ដែលងាយស្រួលសម្រាប់និយោជក អ្នកផ្តល់ការអប់រំបណ្ដុះបណ្ដាល និងអ្នកស្វែងរកការងារ ផ្សព្វផ្សាយព័ត៌មាន ឱកាសការងារ កម្មវិធីអប់រំបណ្ដុះបណ្ដាលជំនាញវិជ្ជាជីវៈ និងកម្មសិក្សាការងារ រួមនឹងការតាំងបង្ហាញបច្ចេកវិទ្យាថ្មីៗ ដោយគ្រឹះស្ថានអប់រំបណ្ដុះបណ្ដាលបច្ចេកទេស។

លោក កត្តា អ៊ន អំពាវនាវដល់សាធារណជន យុវជន ចូលរួមក្នុងកម្មវិធីដ៏ធំនេះឲ្យបានច្រើនកុះករ ដើម្បីទទួលបានព័ត៌មានផ្ទាល់ពីបេឡាជាតិសន្តិសុខសង្គម(ប.ស.ស.), ទីភ្នាក់ងារជាតិមុខរបរ និងការងារ (NEA), ព័ត៌មានសិក្សាជំនាញវិជ្ជាជីវៈ និងបច្ចេកទេស(TVET) រួមនឹងការទទួលទានកាហ្វេ ឆុងដោយម៉ាស៊ីនកាហ្វេរ៉ូបូត (Robbot Coffee) ដែលជាស្នាដៃបង្កើតឡើងដោយកូនខ្មែរទៀតផង៕

អត្ថបទ ៖ សំអឿន