ព័ត៌មានជាតិ

រដ្ឋមន្ត្រីការពារជាតិរុស្ស៊ីដាក់បញ្ជាបង្កើតក្រុមប្រឹក្សាការពារព្រំដែន ខណៈអ៊ុយក្រែនបន្តរុលចូល

បានផុស

៥ ខែ មុន

នៅ

ថ្ងៃសៅរ៍ ១៧ សីហា ២០២៤

ដោយ

រដ្ឋមន្ត្រីការពារជាតិរុស្ស៊ី បានបញ្ជាឲ្យយោធាក្នុងតំបន់ទាំងបីនៅជាប់ព្រំដែនជាមួយប្រទេសអ៊ុយក្រែនបង្កើតក្រុមប្រឹក្សាសម្របសម្រួលមួយដើម្បីឆ្លើយតបចំពោះបញ្ហាសន្តិសុខ ខណៈពេលដែលអ៊ុយក្រែនបន្តវាយលុកចូលកាន់កាប់កាន់តែជ្រៅនិងគ្របគ្រងកាន់តែច្រើននៅតំបន់ Kursk។

តាមសេចក្តីរាយការណ៍របស់ទីភ្នាក់ងារព័ត៌មានរុស្ស៊ី TASS លោក Andrey Belousov រដ្ឋមន្ត្រីការពារជាតិរុស្ស៊ី ដែលឡើងកាន់តួនាទីកាលពីខែឧសភា ជំនួសលោក Sergei Shoigu បានរៀបចំកិច្ចប្រជុំលើកដំបូងដោយបញ្ជាឲ្យបង្កើតក្រុមប្រឹក្សាសម្របម្រួល (Coordination Council) តាមព្រំដែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្ត្រីត្រូវបានTASS ស្រង់សម្តីដូចបាននិយាយថា៖«ខ្ញុំបញ្ជាឱ្យបង្កើតក្រុមប្រឹក្សាសម្របសម្រួលលើបញ្ហាសន្តិសុខយោធាក្នុងដែនដីជាប់ព្រំដែន មានតំបន់ Belgorod Bryansk និង Kursk។ គោលបំណងនៃការបង្កើតគឺដើម្បីធ្វើឱ្យប្រសើរឡើងនូវប្រសិទ្ធភាពនៃការគាំទ្រកាន់តែទូលំទូលាយសម្រាប់សមរភូមិ (battlegroups)ដែលត្រូវបានភ្ជាប់ក្នុងការការពារព្រំដែនរដ្ឋ ការពារទឹកដីនិងប្រជាជនតំបន់ទាំងនោះ»។

គិតត្រឹមថ្ងៃសុក្រនេះ កងទ័ពអ៊ុយក្រែនបន្តរុលទៅមុខក្នុងសមរភូមិឆ្លងដែនចូលតំបន់ Kursk ទឹកដីរុស្ស៊ី និងឈានចូលដល់ថ្ងៃទី១០ ដែលអ៊ុយក្រែនបង្ហាញភាពក្លាហានហ៊ានទម្លុះព្រំដែនមហាអំណាចរុស្ស៊ីដែលឈ្លានពានខ្លួនអស់រយៈពេលជាង២៩ខែ ចាប់តាំងពីថ្ងៃទី២៤ខែកុម្ភៈឆ្នាំ២០២២។

អ៊ុយក្រែនបានអស់ការអត់ធ្មត់ក្នុងការវាយទប់ទល់ និងការវាយបកក្នុងសង្គ្រាមត្រឹមតែក្នុងទឹកដីខ្លួន ដោយប្តូរយុទ្ធសាស្រ្តវាយចូលទឹកដីរុស្ស៊ី និងកាន់កាប់ភូមិឋានជាច្រើនក្នុងតំបន់ Kursk ជាប់ព្រំដែនភាគខាងលិចប្រទេសរុស្ស៊ី។

ទីភ្នាក់ងារព័ត៌មាន The Guardian កាលថ្ងៃទី១៦ខែសីហា ផ្សាយថា ប្រធានាធិបតី អ៊ុយក្រែន លោក Volodymyr Zelenskiy បាននិយាយថា ទាហានរបស់លោកបានបន្តរុលទៅមុខនិងកាន់កាប់បានទាំងស្រុងនូវតំបន់ប្រជុំជន Sudzha ដែលមានប្រជាជនជាង៦០០០នាក់ ក្នុងខេត្ត Kursk។

ជាមួយគ្នានោះ ប្រមុខយោធាអ៊ុយក្រែនលោក Oleksandr Syrskyi បាននិយាយថា កងទ័ពអ៊ុយក្រែនបានបង្កើតទីបញ្ជាការយោធាក្នុងតំបន់ Kursk។

ការវាយប្រហារចូលទឹកដីរុស្ស៊ីដ៏មិននឹកស្មានដល់នេះ បានធ្វើឱ្យមន្ត្រីជាន់ខ្ពស់វិមានក្រឹមឡាំង លោក Nikolay Patrushev ជំនួយការប្រធានាធិបតីរុស្ស៊ី ចោទប្រកាន់លោកខាងលិចថា «បានជួយរៀបផែនការ»វាយប្រហាររុស្ស៊ី ស្របពេលដែលអ្នកនាំពាក្យសន្តិសុខជាតិរបស់សេតវិមានវិញ បានបង្ហាញពីផែនការផ្តល់កញ្ចប់ជំនួយយោធាបន្ថែមទៀតក្នុងប៉ុន្មានថ្ងៃខាងមុខ។

លោក Nikolay Patrushev បានច្រានចោលការអះអាងរបស់ក្រសួងការបរទេសសហរដ្ឋអាមេរិកអំពីការមិនជាប់ពាក់ព័ន្ធក្នុងបញ្ហានេះ។ យោងការចេញផ្សាយរបស់ទីភ្នាក់ងារព័ត៌មានរុស្ស៊ី TASS។

ជំនួយការប្រធានាធិបតីរុស្ស៊ី លោក Nikolay Patrushev ក៏បានចោទប្រកាន់អង្គការ NATO ថាបានជួយរៀបផែនការវាយប្រហារនេះ។ លោក អះអាងដែរថា បណ្តាប្រទេសណាតូបានបញ្ជូនអាវុធ និងគ្រូបង្រៀនយោធាទៅកាន់អ៊ុយក្រែន ដោយពួកគេបន្តផ្តល់ឱ្យពួកគេនូវទិន្នន័យស៊ើបការណ៍សម្ងាត់៕

ដោយ រ៉ាន់ រើយ