ព័ត៌មានជាតិ

អ្នកជំនាញការជប៉ុន ចែករំលែកបទពិសោធន៍ការរៀបចំដែនដី និងនគរូបនីយកម្មនៅកម្ពុជា

បានផុស

១ ខែ មុន

នៅ

ថ្ងៃសៅរ៍ ១៧ សីហា ២០២៤

ដោយ

សិក្ខាសាលាបណ្តុះបណ្តាលមួយ បានធ្វើឡើងពេញមួយថ្ងៃកាលពីម្សិលមិញនេះ។ សិក្ខាសាលានេះមានការចូលរួមពីសិស្សនិស្សិតរាប់រយនាក់ ដែលមានការធ្វើបទបង្ហាញពីមន្រ្តីនៅក្រសួងរៀបចំដែនដី នគរូបនីយកម្មនិងសំណង់ និងមន្រ្តីជំនាញរបស់ជប៉ុន ស្តីពីច្បាប់ពាក់ព័ន្ធនឹងការរៀបចំដែនដី និងនគរូបនីយកម្ម។

លោក តឹករ៉េត សំរេច រដ្ឋលេខាធិការប្រចាំការក្រសួងរៀបចំដែនដី នគរូបនីយកម្មនិងសំណង់បានគូសបញ្ជាក់ថា វគ្គបណ្ដុះបណ្ដាលនេះឆ្លើយតបទៅនឹងគោលនយោបាយរបស់រាជរដ្ឋាភិបាល ពាក់ព័ន្ធនឹងវិស័យរៀបចំដែនដី នគរូបនីយកម្ម និងសំណង់។

កម្មវិធីបណ្ដុះបណ្ដាលនេះ អ្នកចូលរួមនឹងទទួលបានចំណេះដឹងពាក់ព័ន្ធគោលការណ៍ទូទៅនៃការរៀបចំដែនដី និងនគរូបនីយកម្ម តាមរយៈការបង្ហាញពីមន្រ្តីជំនាញក្រសួងនិងអ្នកជំនាញការជប៉ុន ដើម្បីធ្វើជាមូលដ្ឋានសម្រាប់ផែនការរៀបចំដែនដីនៅក្នុងប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គោលនយោបាយជាតិរៀបចំដែនដីរបស់រាជរដ្ឋាភបាលសំដៅធានាថា ដែនដីនៅទូទាំងព្រះរាជាណាចក្រកម្ពុជាត្រូវបានគ្រប់គ្រង ប្រើប្រាស់ ការពារ និងអភិវឌ្ឍតាមរយៈការធ្វើសមាហរណកម្មនូវផែនការយុទ្ធសាស្ត្ររៀបចំដែនដី និងការធ្វើឲ្យរលូននូវវិធាន និងឧបករណ៍ចាំបាច់នានាតាមវិស័យប្រកបដោយភាពសុខដុមរមនានៅតាមតំបន់ភូមិសាស្ត្រនីមួយៗ។

លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្មនិងសំណង់បានបញ្ជាក់ថា សេចក្តីព្រាងច្បាប់រៀបចំដែនដី គ្រោងដាក់ឲ្យប្រើប្រាស់នៅពេលខាងមុខ។

ការបែងចែកតំបន់ភូមិសាស្ត្រសម្រាប់រៀបចំដែនដី ត្រូវធ្វើឡើងដោយផ្អែកលើកត្តាធម្មជាតិ ភូមិសាស្ត្រ សេដ្ឋកិច្ច សង្គម វប្បធម៌ និងបរិស្ថាន និងត្រូវមានតុល្យភាពឆ្លើយតបតាមតម្រូវការនៃការអភិវឌ្ឍទាំងសម្រាប់ពេលបច្ចុប្បន្ននិងអនាគត។

បើតាមលោក ប៉ែន សុផល ការរៀបចំដែនដីនៅទូទាំងព្រះរាជាណាចក្រកម្ពុជាទាំងនៅតាមតំបន់ និងនៅថ្នាក់ខេត្ត ត្រូវសិក្សា វិភាគ និងកំណត់អំពីសក្តានុពល បញ្ហាប្រឈម និងដំណោះស្រាយ ដើម្បីការអភិវឌ្ឍប្រកបដោយប្រសិទ្ធភាព ចីរភាព តុល្យភាព និងការធ្វើសមាហរណកម្ម តាមតំបន់ភូមិសាស្ត្រនីមួយៗទាំងក្នុងប្រទេស ក្នុងតំបន់ និងក្នុងក្របខណ្ឌអន្តរជាតិ។

ក្នុងន័យនេះ លោក ប៉ែន សុផល បានបញ្ជាក់បន្ថែមថា គោលនយោបាយជាតិរៀបចំដែនដី គប្បីបញ្ចៀសឱ្យបាននូវការខ្វែងគំនិតយោបល់គ្នា ដោយត្រូវគោរពទៅតាមឋានានុក្រមនៃផែនការ (ថ្នាក់ជាតិ-ថ្នាក់ក្រោមជាតិ) ហើយត្រូវមានបញ្ញត្តិកំណត់ជាក់លាក់៕