ស្រុករុក្ខគីរី នឹងមានតំបន់ទេសចរណ៍ថ្មី​ ១ បន្ថែមទៀត ត្រៀម​ទទួល​អ្នកទេសចរមក​កម្សាន្ត

ស្រុករុក្ខគីរី​បច្ចុប្បន្នមានតំបន់ទេសចរណ៍ធម្មជាតិ និងប្រវត្តិសាស្ត្រចំនួន ៣ កន្លែង ស្រប​ពេល​ទំនប់ដូនទ្រីដែល​កំពុង​សាងសង់​ក្រោយ​រួចរាល់នឹង​ក្លាយ​ជាគោលដៅទេសចរណ៍ថ្មី​មួយ​ទៀត​នៅ​​ស្រុកទើប​បង្កើត​ថ្មីមួយនេះ។

មន្រ្តី​មន្ទីរ​ទេសចរណ៍​ខេត្ត​បាត់ដំបង លោក ហម អរុណ បានឲ្យដឹងថា ​តំបន់​ទេសចរណ៍​ក្នុងស្រុក​រុក្ខគិរីបច្ចុប្បន្ន​រួម​មាន តំបន់ទេសចរណ៍​ភ្នំកាច់ផ្កា តំបន់ទេសចរណ៍ភ្នំព្រះ តំបន់ទេសចរណ៍ទំនប់បាសាក់ និង​​ទំនប់ដូនទ្រីដែលនឹងក្លាយជា​គោលដៅ​ទេសចរណ៍​ថ្មីមួយ​ទៀតនៅពេល​ខាងមុខ។

បើតាមលោក ហម អរុណ តំបន់​ភ្នំកាច់ផ្កា ឬ(ភ្នំសៀមឆ្ការ) ជារមនីយដ្ឋានបែបធម្មជាតិ ដែលស្ថិតនៅប៉ែកខាងត្បូងនៃខេត្តបាត់ដំបង មានចម្ងាយប្រមាណ ៧០ គីឡូម៉ែត្រពីក្រុងបាត់ដំបង។ ភ្នំកាច់ផ្កាមានទីតាំងស្ថិតក្នុងភូមិស្រះថត ឃុំព្រះត្រឡាច ស្រុករុក្ខគីរីនៃខេត្តបាត់ដំបង​។

ភ្ញៀវទេសចរអាចឡើងកម្សាន្តទៅលើភ្នំកាច់ផ្កាតាមកាំជណ្ដើរដែលមាន ៥៧១កាំ ដែលបានរៀបចំដោយគណៈកម្មការវត្តភ្នំកាច់ផ្កា។ នៅលើខ្នងភ្នំមាន​អណ្តូង​ ១ ជាអណ្ដូងដ៏សក្ដិសិទ្ធដែលប្រជាជនតែងតែទៅបន់ស្រន់ និងសុំទឹកដោយមានជំនឿថា​អាចព្យាបាលជំងឺរោគាទាំងឡាយ ខណះអណ្តូងនេះក៏មានម្រាម​សម្រាប់ស្ត្រីផងដែរ។

ក្រៅពីនេះមាន “អណ្តើកពាន់ឆ្នាំ” ដែលជាថ្មមួយដុំមានសណ្ឋានប្រៀបដូចសត្វអណ្តើក ជាទីកន្លែងដែលប្រជាពលរដ្ឋតែងតែទៅបន់ស្រន់បួងសួងសុំបំណងប្រាថ្នាផងដែរ។ “ល្អាង៧ដំណាក់” ដែលស្ថិតនៅក្នុងរូងភ្នំជាទីតាំងស្ងប់ស្ងាត់​ល្អសម្រាប់ការធ្វើសម្មាធិ និងលំហាត់ផ្លូវចិត្ត។

នៅលើភ្នំ​មានផ្ទាំងថ្មធំៗតម្រៀបលើគ្នាជាមួយរុក្ខជាតិស្រស់បំព្រង បង្កើតបានជាទីតាំងដ៏គួរឱ្យចង់ទស្សនា និងថតរូបកម្សាន្ត និងខ្យល់អាកាសបរិសុទ្ធ អមដោយទេសភាពស្រស់បំព្រង បើមើលពីខ្នងភ្នំនឹងឃើញវាលស្រែ និងធម្មជាតិបៃតងស្រស់ ដែលគួឲ្យគយ គន់ផងដែរ។ អ្វីដែលគួរឱ្យចាប់អារម្មណ៍នោះគឺយើងចូលទៅរូងភ្នំ ដោយធ្វើដំណើរពីលើកំពូលភ្នំមកវិញ។

ដោយឡែក​រមនីយដ្ឋានទេសចរណ៍ “ភ្នំព្រះ” ស្ថិតនៅក្នុងភូមិបាសាក់ ឃុំបាសាក់ មានលក្ខណៈទេសភាពល្អត្រកាល មានទីវាលយ៉ាងធំក្រាលដោយថ្ម ដែលកើតឡើងដោយធម្មជាតិ មានផ្ទាំងថ្មធំៗដែលមានរូបរាងដួចសត្វអណ្តើក កង្កែប និងដូចកំណាត់ឈើដែលគេកាត់ជាកង់ៗជាដើម មានរូបចំលាក់មេទ័ពឆ្លាក់ជាប់នឹងថ្ម ដែលយើងសន្មត់ថាជាចំលាក់តាំងពីសម័យអង្គរ មា នវត្តមួយដែលប្រជាពលរដ្ឋតែងតែទៅធ្វើបុណ្យទាននៅទីនោះយ៉ាងច្រើនកោះករផង។

ចំណែក​ទំនប់អាងបាសាក់ គឺជារមណីយដ្ឋានប្រវត្តិសាស្រ្តមួយស្ថិតនៅភូមិបាសាក់ ឃុំបាសាក់ ស្រុករុក្ខគីរី បានកើតឡើងនៅសម័យរបប ប៉ុល ពត ចន្លោះឆ្នាំ១៩៧៦-១៩៧៨ ដោយបានសង់ទំនប់បេតុងចំនួន ២ កន្លែង ទីមួយ ទំនប់ក្បាលហុង និង ទីពីរ ទំនប់អាងបាសាក់ សម្រាប់​ទប់ទឹកស្រោចស្រពដំណាំកសិកម្មឲ្យ​មានជាប្រចាំគ្រប់រដូវកាល។ ទំនប់ទឹកបេតុងដ៏ធំមួយនេះ មានបរិស្ថានធម្មជាតិល្អប្រសើរ និងមានព្រៃធម្មជាតិដុះជុំវិញគួរអោយចង់គួយគន់។ នៅរដូវប្រាំងមានចរន្តទឹកហូរខ្សោយល្មម រីឯរដូវវស្សាមានទឹកហូរខ្លាំងបាញ់ជាពពុះទឹកគួរអោយគយគន់ ទឹកថ្លាល្អមានលក្ខណៈ ងាយស្រួលដល់ភ្ញៀវទេសចរងូតកំសាន្ត។នៅក្នុងឱកាសបុណ្យទានម្តងៗគេសង្កេតឃើញប្រជាពលរដ្ឋទៅកំសាន្តទីនោះយ៉ាងច្រើនកុះករ អមដោយសម្លេងសើចលេងយ៉ាងសប្បាយ ក្រោមសង្គមមួយដែលពោរពេញដោយសេរីភាព និងសន្តិភាព។

ស្រុករុក្ខគីរី គឺជាស្រុកថ្មីមួយដោយកាត់ឃុំចំនួន ២ នៃស្រុកមោងឫស្សី។

ប្រជាពលរដ្ឋរស់នៅក្នុងឃុំព្រៃត្រឡាច និង ឃុំព្រែកជីក បានលើកឡើងប្រាប់កម្ពុជាថ្មីថា ស្រុករុក្ខគីរី​បច្ចុប្បន្ន​មានមនុស្សរស់នៅច្រើនគួរសម និងមានការអភិវឌ្ឍន៍ជាបន្តបន្ទាប់។ ស្រុកបង្កើតថ្មីមួយនេះមិនសូវមានចំនួនមនុស្សមកពីទីឆ្ងាយរស់នៅ​នោះទេ គឺភាគច្រើនប្រជាពលរដ្ឋដែលទៅរស់នៅចេញពី ស្រុកមោងឫស្សីតែម្តង ហើយបច្ចុប្បន្នក៏មានភ្ញៀវទេសចរណ៍ក្នុងស្រុកច្រើន តែងទៅលេងតាមរមនីយដ្ឋានធម្មជាតិ និងប្រវត្តសាស្ត្រច្រើនមិនសូវស្ងាត់នោះទេ។

បើយោងតាមឯកសារ ស្រុករុក្ខគីរី ជាស្រុកបង្កើតថ្មី កាត់ឃុំចំនួន២ គឺឃុំព្រៃត្រឡា និង ឃុំព្រែកជីក នៃស្រុកមោងឫស្សី ខេត្តបាត់ដំបង យោងតាមព្រះរាជក្រិត្យលេខនស/រកត/០៩០៨/១០៥៥ចុះថ្ងៃទី ២៥ ខែកញ្ញា ឆ្នាំ២០០៧៕

អត្ថបទ៖ សៅ សារិទ្ធ