ព័ត៌មានជាតិ

រដ្ឋមន្ត្រីបរិស្ថាន៖ នាពេលខាងមុខ ផ្លូវគ្រប់ខេត្តតាមក្រវាត់ព្រំដែន ត្រូវតែដាំដើមត្នោត

បានផុស

៥ ខែ មុន

នៅ

ថ្ងៃចន្ទ ១៩ សីហា ២០២៤

ដោយ

លោក អ៊ាង សុផល្លែត រដ្ឋមន្ត្រីក្រសួងបរិស្ថានបានអះអាងថា នៅពេលខាងមុខ មិនមែនតែផ្លូវនៅតាមខ្សែក្រវាត់ព្រំដែនខេត្តត្បូងឃ្មុំនោះទេដែលមានដាំដើមត្នោត គឺផ្លូវនៅគ្រប់ខេត្តទាំងអស់តាមក្រវាត់ព្រំដែនត្រូវតែដាំដើមត្នោត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងពិធីដាំកូនឈើក្នុងពេលតែមួយនៅទូទាំងខេត្តត្បូងឃ្មុំ ក្រោមប្រធានបទ «បណ្ដុះផ្នត់គំនិតពន្លកបៃតង» លោក អ៊ាង សុផល្លែត បានមានប្រសាសន៍ថា លោកព្យាយាមបំផុសគំនិតដាំដើមត្នោត នៅក្នុងព្រះរាជាណាចក្រកម្ពុជា ជារូបភាពមួយដើម្បីចូលរួមថែរក្សា កេរ្តិ៍ដំណែល ទ្រព្យសម្បត្តិ រុក្ខជាតិ ជាតិរបស់យើង។

លោករដ្ឋមន្ត្រី បានអះអាងថា «មិនត្រឹមតែព្រំប្រទល់ខេត្តត្បូងឃ្មុំទេ ខ្ញុំធ្វើការមាន ៣ ជំហានរបស់ខ្ញុំ ទី១ គឺការគូសវាស់គិតគូរនូវការធ្វើ ទី២ សាកល្បង និងទី៣ អនុវត្ត យើងគិតគូរ គូសវាស់រួចហើយ បណ្ដុះកូនត្នោតបានហើយ ៣០ ម៉ឺនដើមនៅឆ្នាំនេះ សាកល្បងបានហើយ ១ ម៉ឺនដើម យើងក៏ដាំរួចហើយដែរ អនុវត្តឆ្នាំនេះខេត្តត្បូងឃ្មុំ ឆ្នាំក្រោយៗខេត្តផ្សេងទៀត គ្រប់ផ្លូវទាំងអស់នៅតាមក្រវាត់ព្រំដែន គឺយើងត្រូវតែដាំដើមត្នោត»។

សម្រាប់ការងារដាំដើមត្នោត ដោយមានការរួមសហការផ្ទាល់ពីអភិបាលខេត្តត្បូងឃ្មុំ យើងបាននាំយកកូនត្នោតប្រមាណជា ១ម៉ឺនដើមយកទៅដាំនៅតាមដងផ្លូវខ្សែក្រវាត់ព្រំដែន ដែលបច្ចុប្បន្ននេះនៅមានការខ្វះខាតកូនត្នោតប្រមាណ ៤ម៉ឺនដើមទៀតដើម្បីយកទៅដាំនៅតាមផ្លូវ ១២០គីឡូតាមព្រំដែន។

លោកថា «បច្ចុប្បន្នយើងដាំបាន ១ម៉ឺនដើមហើយ នៅ ៣ម៉ឺនដើមទៀត ដូចនេះ ក្នុងឆ្នាំនេះ ខេត្តត្បូងឃ្មុំ ព្រំដែនកម្ពុជា–វៀតណាម ដែលមានប្រវែង ១២០គីឡូម៉ែត្រនេះ យើងត្រូវតែនាំគ្នាដាំឱ្យអស់តែម្តង»។

លោក សង្កត់ធ្ងន់ថា «ប្រសិនបើយើងអាចដាំបានមែន នៅតាមព្រំដែនកម្ពុជា-វៀតណាម ១២០គីឡូម៉ែត្រនេះ ២០ឆ្នាំក្រោយ នៅតាមសងខាងផ្លូវព្រំដែនរបស់យើង គឺមានដើមត្នោតខ្មែរ ដែលនេះជាការអភិវឌ្ឍន៍ដើម្បីរក្សាទឹកដីរបស់យើង គេគ្រាន់តែឃើញដើមត្នោត ដូចឃើញខ្មែរដែរ»។

ក្នុងឱកាសដដែលនោះដែរ លោករដ្ឋមន្ត្រីក្រសួងបរិស្ថាន បានប្រកាសផ្តល់ជូន កូនត្នោត ចំនួនជាង ៣ម៉ឺនដើម បន្ថែមទៀត ដើម្បីដាំនៅតាមខ្សែក្រវ៉ាត់ព្រំដែនកម្ពុជា-វៀតណាម ដែលមានប្រវែងប្រមាណ១២០គីឡូម៉ែត្រ នៅក្នុងភូមិសាស្ត្រខេត្តត្បូងឃ្មុំ នៅខែកញ្ញា ឆ្នាំ២០២៤ ខាងមុខ៕