ព័ត៌មានជាតិ

សមាជិក ប.ស.ស បង់ភាគទានយឺតយ៉ាវ ឬ ភ្លេចបង់ អាចប្រឈមមុខការផាកពិន័យតាមផ្លូវច្បាប់

បានផុស

៦ ខែ មុន

នៅ

ថ្ងៃចន្ទ ១៩ សីហា ២០២៤

ដោយ

សមាជិក ប.ស.ស ដែលបង់ភាគទានយឺតយ៉ាវ ឬ ភ្លេចបង់ភាគទាន អាចនឹងត្រូវប្រឈមមុខនឹងការផាកពិន័យទៅតាមនីតិវិធីច្បាប់ប្រសិនបើ ប.ស.ស. ជូនដំណឹង ឬផ្ញើសារប្រាប់ហើយនៅតែមិនព្រមបង់ទៀតនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងក្នុងកិច្ចប្រជុំផ្ទៃក្នុងប្រចាំខែរបស់ប.ស.ស. ថា ដើម្បីបង្កភាពងាយស្រួលដល់សាធារណជន ម្ចាស់សហគ្រាស ឬគ្រឹះស្ថាន ក្នុងការផ្ដល់សេវាតាមប្រព័ន្ធបច្ចេកវិទ្យា ប.ស.ស. បានរៀបចំការចុះបញ្ជីបុគ្គលិក និងការបង់ភាគទានតាមរយៈប្រព័ន្ធអនឡាញ ហើយជាពិសេសបុគ្គលស្វ័យនិយោជន៍ និងអ្នកក្នុងបន្ទុក ក៏អាចចុះឈ្មោះតាមរយៈកម្មវិធីទូរស័ព្ទដៃ NSSF Member បានផងដែរ។

លោកណែនាំថា ទន្ទឹមនឹងការផ្ដល់ភាពងាយស្រួលក្នុងការចុះបញ្ជី និងបង់ភាគទាន តាមប្រព័ន្ធបច្ចេកវិទ្យានេះ នាយកដ្ឋានជំនាញ ត្រូវបន្តតាមដានចំពោះសហគ្រាស គ្រឹះស្ថាន ឬ សមាជិក ប.ស.ស. ដែលបានចុះបញ្ជីរួច ប៉ុន្តែភ្លេចបង់ភាគទាន ឬ បង់ភាគទានមានការយឺតយ៉ាវត្រូវមានយន្តការរំលឹកដាស់តឿនតាមរយៈការទាក់ទងតាមប្រព័ន្ធទូរស័ព្ទ ការផ្ញើសារ ឬចេញលិខិតដោយផ្ទាល់ ដើម្បីជូនដំណឹង មុននឹងអនុវត្តការពិន័យ ឬដាក់ពាក្យបណ្ដឹងតាមនីតិវិធីច្បាប់។

លោកបានបន្ថែមទៀតថា ជាមួយគ្នានេះដែរ នាយកដ្ឋានជំនាញ ត្រូវធ្វើការសិក្សាលើយន្តការជម្រើសក្នុងការបង់ភាគទានជាប្រចាំឆ្នាំ ឬជាប្រចាំឆមាស ឬជាស្វ័យប្រវត្តិកម្ម តាមកម្មវិធីធនាគារ ដើម្បីបង្កលក្ខណៈងាយស្រួលក្នុងការបង់ភាគទាន ជៀសវាងការភ្លេច ឬយឺតយ៉ាវ ក្នុងប្រការណាមួយ។

គួរបញ្ជាក់ថា គិតត្រឹមបំណាច់ខែកក្កដា ឆ្នាំ ២០២៤ បេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ មានសមាជិកសរុបចំនួន ២ ៤៥៣ ៩១៤ នាក់ ហើយនៅទូទាំងប្រទេស។ ក្នុងចំណោមសមាជិកសរុបចំនួន ២ ៤៥៣ ៩១៤ នាក់ ក្នុងនោះសមាជិក ប.ស.ស. ជាមន្ត្រីសាធារណៈមានចំនួន ៤៤០ ៣៦៥ នាក់ សមាជិក ប.ស.ស. ក្នុងវិស័យឯកជនមានចំនួន ១ ៦៤៣ ៩៨៧ នាក់ សមាជិក ប.ស.ស. ជាបុគ្គលស្វ័យនិយោជន៍ចំនួន ២៨៣ ៤២១ នាក់ និងសមាជិក ប.ស.ស ដែលជាអ្នកក្នុងបន្ទុកសមាជិក ប.ស.ស. មានចំនួន ៨៧ ៩០៩ នាក់៕