ក្រសួងកំពុងអនុវត្តវិធានការគ្រប់គ្រងសាកសពអ្នកជំងឺ​កូវីដ១៩

ក្រសួងសុខាភិបាលកំពុងបន្តអនុវត្តវិធានការគ្រប់គ្រងសាកសពក្នុងបរិបទកូវីដ១៩ ដោយពិភាក្សាជាមួយស្ថានទូតចិនប្រចាំកម្ពុជា បន្ទាប់ពីបុរសជនជាតិចិនម្នាក់ បានស្លាប់អំឡុងពេលព្យាបាលជំងឺកូវីដ១៩ ដោយសារធាតុញៀន។

ជនជាតិចិននៅកម្ពុជាម្នាក់ដែលកើតជំងឺកូវីដ-១៩ បានស្លាប់នៅក្នុងមណ្ឌលចត្តាឡីស័ករាជធានីភ្នំពេញ ដោយសាររើមេថ្នាំញៀន បណ្តាលឲ្យគាំងបេះដូង កាលពីព្រឹកថ្ងៃទី ៤ ខែមីនា នៅក្នុងមណ្ឌលចត្តាឡីស័ករាជធានីភ្នំពេញ ស្ថិតក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។

លោកស្រីឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានបញ្ជាក់ថា ជនជាតិចិនដែលមានផ្ទុកមេរោគកូវីដ១៩ ហើយទៅសម្រាកព្យាបាលនៅមណ្ឌលចត្តាឡីស័ករាជធានីភ្នំពេញនោះគឺស្លាប់ដោយសាររើមេថ្នាំញៀន គាំងបេះដូង ដោយសារតែជនរងគ្រោះប្រើថ្នាំញៀនច្រើនពេក មិនមែនស្លាប់ដោយសារជំងឺកូវីដ១៩នោះទេ ដោយសារ​តែក្រុមការងារបានពិនិត្យ និងធ្វើកោសល្យ​វិច័យនៅក្នុងទឹកនោម គឺជនរងគ្រោះប្រើថ្នាំញៀនខ្ពស់បណ្តាលឲ្យគាំងបេះដូងស្លាប់។

លោកស្រីបញ្ជាក់ថា ជនជាតិចិនដែលមានផ្ទុកមេរោគកូវិដ១៩ មុនស្លាប់គឺមិនមានចេញរោគសញ្ញាអ្វីពាក់ពាន់ទៅនិងជំងឺកូវីដនោះឡើយ គឺជនរងគ្រោះពេលយកសំណាកទៅពិនិត្យគឺមានផ្ទុគមេរោគកូវិដ១៩ធម្មតាប៉ុណ្ណោះ ហើយសូមបងប្អូនសាធារណជនកុំមានការភ័ន្តច្រឡំនូវករណីនេះ។

ក្រសួងបញ្ជាក់ថា ពេលនេះ កំពុងបន្តអនុវត្តវិធានការគ្រប់គ្រងសាកសពអ្នកឆ្លងជំងឺកូវីដ១៩ ដោយពិភាក្សាជាមួយស្ថានទូតចិនប្រចាំកម្ពុជា៕