ធនាគារ ABA គាំទ្រមន្ទីរពេទ្យកុមារអង្គរ ដើម្បីពង្រឹងសេវាសុខភាពកុមារនៅកម្ពុជាឲ្យកាន់តែប្រសើរ

ABA ដែលជាធនាគារពាណិជ្ជធំជាងគេនៅកម្ពុជា បានចុះហត្ថលេខាលើអនុស្សរណៈយោគយល់គ្នា (MoU) ជាមួយ មន្ទីរពេទ្យកុមារអង្គរ (AHC) ដើម្បីបរិច្ចាគថវិកាចំនួន 60 000 ដុល្លាអាមេរិក សំដៅគាំទ្រការប្តេជ្ញាចិត្ត របស់មន្ទីរពេទ្យ ក្នុងការយកចិត្តទុកដាក់លើសុខភាព និងសុខុមាលភាពកុមារនៅកម្ពុជា។

ពិធីចុះហត្ថលេខាលើ អនុស្សរណៈនេះ ត្រូវបានធ្វើឡើងនៅការិយាល័យកណ្តាលរបស់ធនាគារ ABA នាថ្ងៃទី16 ខែសីហា ឆ្នាំ2024 ក្រោមវត្តមានរបស់ វេជ្ជបណ្ឌិត ងួន ច័ន្ទភក្ត្រា នាយកមន្ទីរពេទ្យកុមារអង្គរ លោក Igor Zimarev នាយកទីផ្សារ និងកិច្ចការទំនួលខុសត្រូវសង្គម នៃធនាគារ ABA រួមទាំងតំណាងជាន់ខ្ពស់របស់ស្ថាប័នទាំងពីរ។

ក្រោមកិច្ចសហការដែលមានរយៈពេល 3 ឆ្នាំនេះ ធនាគារ ABA នឹងផ្តល់ថវិកាចំនួន 20 000 ដុល្លារអាមេរិក ក្នុងមួយឆ្នាំ ជូនដល់គម្រោង Endowment Fund របស់មន្ទីរពេទ្យកុមារអង្គរ។ ការគាំទ្រនេះ នឹងធានាផ្តល់នូវមូលនិធិគ្រប់គ្រាន់ សម្រាប់រយៈពេលវែងដល់មន្ទីរពេទ្យ ដើម្បីជួយសម្រួល និងពង្រីកសេវាសុខភាព ជូនដល់កុមារ​ឲ្យ​កាន់​តែ​មានគុណភាពខ្ពស់ ទៅថ្ងៃអនាគត។

ជំនួយហិរញ្ញវត្ថុនេះ នឹងអាចជួយបង្កើនសេវាព្យាបាល និងសេវាទាំសុខភាពដល់កុមារគ្រប់រូប គ្រប់ស្ថានភាពគ្រួសារ នៅទូទាំងប្រទេសកម្ពុជា។

លោក Igor Zimarev នាយកទីផ្សារ និងកិច្ចការទំនួលខុសត្រូវសង្គម នៃធនាគារ ABA មានប្រសាសន៍ថា “យើងខ្ញុំ នៅធនាគារ ABA មានសេចក្តីសោមនស្ស ក្នុងការចូលរួមបរិច្ចាគទឹកប្រាក់ចំនួន 60 000 ដុល្លាអាមេរិក ជូនដល់ គម្រោង Endowment Fund របស់មន្ទីរពេទ្យកុមារអង្គរ ដើម្បីគាំទ្រការងារដ៏សំខាន់របស់មន្ទីរពេទ្យ។ កិច្ចសហការនេះមិនត្រឹមតែផ្តល់ជំនួយហិរញ្ញវត្ថុទេ គឺជាការចូលរួមចំណែកក្នុងដំណើរជីវិតកាន់តែប្រសើររបស់កុមារក្នុង​សហគមន៍​យើង។ យើងខ្ញុំជឿជាក់ថា កុមារគ្រប់រូបគួរទទួលបានការថែទាំសុខភាព ដែល​មាន​គុណភាពខ្ពស់ ហើយយើងខ្ញុំបានប្តេជ្ញាចិត្តគាំទ្រការងារដ៏សំខាន់នេះឲ្យទទួលបានជោគជ័យ។”

វេជ្ជបណ្ឌិត ងួន ច័ន្ទភក្ត្រា នាយកមន្ទីរពេទ្យកុមារអង្គរ មានប្រសាសន៍ថា “តំណាងឲ្យមន្ទីរពេទ្យកុមារអង្គរ ខ្ញុំពិតជាមានសេចក្តីរំភើបរីករាយជាមួយទំនាក់ទំនងកាន់តែប្រសើរ រវាងមន្ទីរពេទ្យយើង និងធនាគារ ABA ក្នុងនាមជាដៃគូដែលតែងតែផ្ដល់ការគាំទ្រ។ អនុស្សរណៈនេះ នឹងជួយពង្រឹងទំនាក់ទំនងរបស់យើងឲ្យកាន់តែប្រសើរឡើង ដែលអនុញ្ញាតឲ្យមន្ទីរពេទ្យកុមារអង្គរ បន្តផ្តល់ការពិនិត្យ ព្យាបាល និងថែទាំសុខភាពប្រកបដោយគុណភាពខ្ពស់បានកាន់តែច្រើន និងក្នុងរយៈពេលវែង ដល់កុមារពីគ្រប់មជ្ឍដ្ឋានដែលមកទទួលសេវាសុខភាពនៅមន្ទីរពេទ្យកុមារអង្គរ។”

កន្លងមកធនាគារ ABA បានសហការគាំទ្រមន្ទីរពេទ្យកុមារអង្គរជាច្រើនគម្រោងរួចមកហើយ។ ក្រៅពីជំនួយហិរញ្ញវត្ថុ ABA បានបញ្ចូលមុខងារបរិច្ចាគតាម ABA Mobile ដែលបង្កើនភាពងាយស្រួលដល់អតិថិជន ABA ក្នុងការបរិច្ចាគ​ជូនដល់​មន្ទីរ​ពេទ្យ​។

តាមរយៈការគាំទ្រដល់មន្ទីរពេទ្យកុមារអង្គរ ABA មិនត្រឹមតែរួមចំណែកជួយដល់តម្រូវការបន្ទាន់ផ្នែក​ថែទាំ​សុខភាព​​របស់​កុមារ​ប៉ុណ្ណោះ​ទេ ប៉ុន្តែកាយវិការនេះ ក៏ជាការវិនិយោគលើសេវាថែទាំសុខភាពកុមាររយៈពេលវែងផងដែរ ដែលសមស្រប​ទៅ​នឹង​គោល​ការណ៍​ទំនួលខុសត្រូវសង្គម (CSR) របស់ធនាគារ។

អំពីមន្ទីរពេទ្យកុមារអង្គរ៖

មន្ទីរពេទ្យកុមារអង្គរ គឺជាអង្គភាពសុខភាពមិនស្វែងរកប្រាក់ចំណេញ ដែលផ្តល់សេវាសុខភាពកុមារ មានទីតាំងស្ថិតនៅក្នុងខេត្តសៀមរាប។ ចាប់តាំងពីឆ្នាំ១៩៩៩មក មន្ទីរពេទ្យកុមារអង្គរបានជួយសង្គ្រោះជីវិតកុមាររាប់លាននាក់ ផ្តល់ការអប់រំបង្ការសុខភាពដល់ប្រជាពលរដ្ឋនៅក្នុងសហគមន៍ សាលារៀន មណ្ឌលសុខភាព និង អប់រំបណ្តុះបណ្តាលវេជ្ជសាស្ត្រដល់មន្ត្រីសុខាភិបាល និស្សិតវេជ្ជសាស្ត្រ គិលានុបដ្ឋាក និងឆ្មប។ ជាទូទៅមន្ទីរពេទ្យកុមារអង្គរ ទទួលពិនិត្យ ព្យាបាល ថែទាំកុមារប្រមាណ ៣០០ ទៅ៤០០នាក់ ក្នុងមួយថ្ងៃៗ និងត្រូវការជំនួយ ប្រមាណ ៦លានដុល្លារ ជារៀងរាល់ឆ្នាំដើម្បីដំណើរការមន្ទីរពេទ្យ និងសកម្មភាពអប់រំនានា។

ព័ត៌មានលម្អិត៖ www.angkorhospital.org  

ABA ជាធនាគារពាណិជ្ជកម្ពុជាដ៏ធំបំផុតគិតលើទ្រព្យសកម្ម, ប្រាក់បញ្ញើ, កម្ចីដុល, ប្រាក់បញ្ញើអតិថិជន និងប្រាក់ចំណេញ ផ្អែកលើរបាយការណ៍ត្រួតពិនិត្យរបស់ធនាគារជាតិនៃកម្ពុជាប្រចាំឆ្នាំ 2021-2023៕