ព័ត៌មានជាតិ

៧ ខែ ឆ្នាំនេះ បាតុភូតរន្ទះបាញ់បណ្តាលឱ្យមនុស្សស្លាប់-របួស ជិត ១០០ នាក់ ថយចុះជាងឆ្នាំមុន

បានផុស

១ ថ្ងៃ មុន

នៅ

ថ្ងៃអង្គារ ២០ សីហា ២០២៤

ដោយ

ក្នុងរយៈពេល ៧ ខែ ឆ្នាំ ២០២៤ នេះ បាតុភូតរន្ទះបាញ់បានកើតឡើងជាង ៩០ លើក បណ្តាលឱ្យមនុស្សស្លាប់ និងរបួសជិត ១០០ នាក់ ខូចខាតផ្ទះជាង ២០ ខ្នង និងងាប់គោក្របីជិតជាង ៣០ ក្បាល បើធៀបទៅនឹងរយៈពេល ៧ ខែ ដូចគ្នា ឆ្នាំ ២០២៣ ឃើញថាមានការថយចុះគួរឱ្យកត់សម្គាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ មានប្រសាសន៍នៅព្រឹកថ្ងៃទី ២០ សីហា នេះថា ចាប់ពីខែមករា រហូតដល់ខែកក្កដា ឆ្នាំ ២០២៤ កន្លងទៅនេះបាតុភូតរន្ទះបាញ់បានកើតឡើងចំនួន ៩១ លើក បណ្តាលឱ្យខូចខាតផ្ទះចំនួន ២៦ ខ្នង ស្លាប់មនុស្ស ៤៨ នាក់ និងរងរបួស ៤២ នាក់ ព្រមទាំងងាប់គោក្របីចំនួន ៣៣ ក្បាល។ ក្នុងនោះនៅក្នុងខែកក្កដារន្ទះបាញ់បានកើតឡើងចំនួន ៩ លើក នៅខេត្តចំនួន ៧ រួមមាន ខេត្តកំពង់ស្ពឺ សៀមរាប ព្រះសីហនុ ស្វាយរៀង រតនគីរី ឧត្តរមានជ័យ និងខេត្តកោះកុង បណ្តាលឱ្យមនុស្សស្លាប់ ៣ នាក់ រងរបួស ៦ នាក់ ងាប់គោក្របី ៧ ក្បាល ព្រមទាំងខូចខាតផ្ទះ ៤ ខ្នង។

លោកបានបន្តថា ក្នុងចំណោមអ្នកស្លាប់ និងរបួសជិត ៩០ នាក់ ក្នុងនោះនៅខេត្តសៀមរាបស្លាប់ ៨ នាក់ របួស ៨ នាក់ បាត់ដំបងស្លាប់ ៦ នាក់ របួស ៦ នាក់ បន្ទាយមានជ័យស្លាប់ ៤ នាក់ របួស ៥ នាក់ ត្បូងឃ្មុំស្លាប់ ៤ នាក់ របួស ៧ នាក់ ព្រៃវែងស្លាប់ ៤ នាក់ ព្រះសីហនុស្លាប់ ៣ នាក់ ឧត្តរមានជ័យស្លាប់ ៣ នាក់ កំពង់ចាមស្លាប់ ២ នាក់ កោះកុងស្លាប់ ២ នាក់ ប៉ៃលិនស្លាប់ ២ នាក់ តាកែវស្លាប់ ២ នាក់ ក្រចេះស្លាប់ ២ នាក់។ ក្រៅពីនេះ ស្លាប់ ១ នាក់ នៅខេត្តស្វាយរៀង កំពង់ស្ពឺ កំពង់ធំ ពោធិ៍សាត់ មណ្ឌលគីរី និងខេត្តកំពត។

លោកបានបន្តទៀតថា ចំនួននេះបើធៀបទៅនឹងរយៈពេល ៧ ខែ ដូចគ្នា កាលពីឆ្នាំ ២០២៣ កន្លងទៅ ឃើញថា មានការថយចុះគួរឱ្យកត់សម្គាល់ ដោយ ៧ ខែ ឆ្នាំមុន បាតុភូតរន្ទះបាញ់បានកើតឡើងចំនួន ១០០ លើក បណ្តាលឱ្យមនុស្សស្លាប់ចំនួន ៥៩ នាក់ រងរបួស ៤៥ នាក់ ខូចខាតផ្ទះ ៧ ខ្នង និងងាប់គោក្របីចំនួន ៨៧ ក្បាល៕

អត្ថបទ ៖ សំអឿន