ព័ត៌មានជាតិ

៧ ខែ ឆ្នាំនេះ អគ្គិភ័យកើតឡើងជាង ៥៥០ លើក បណ្តាលឱ្យមនុស្សស្លាប់-របួស ជាង ៥០ នាក់ កើនឡើងជាងឆ្នាំមុន

បានផុស

៤ ខែ មុន

នៅ

ថ្ងៃពុធ ២១ សីហា ២០២៤

ដោយ

គ្រោះអគ្គិភ័យក្នុងរយៈពេល ៧ ខែ ឆ្នាំ ២០២៤ នេះ បានកើតឡើងជាង ៥៥០ លើក នៅទូទាំងប្រទេស បណ្តាលឱ្យមនុស្សស្លាប់ និងរបួសជាង ៥០ នាក់ បំផ្លាញផ្ទះសម្បែងជាង ៥៧០ ខ្នង និងហេដ្ឋារចនាសម្ព័ន្ធជាច្រើនទៀត។

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅព្រឹកថ្ងៃទី ២១ សីហា នេះថា ចាប់ពីខែមករា រហូតដល់ ខែកក្កដា ឆ្នាំ ២០២៤ នេះ គ្រោះអគ្គិភ័យបានកើតឡើងចំនួន ៥៥៦ លើក នៅទូទាំងប្រទេស បណ្តាលឱ្យឆេះផ្ទះចំនួន ៥៧៥ ខ្នង តូបផ្សារ ១១៨ តូប ឃ្លាំងទំនិញចំនួន ១៥ កន្លែង រោងចក្រសិប្បកម្មចំនួន ១៩ កន្លែង អគាររដ្ឋបាល ១៣ កន្លែង បង្កឱ្យស្លាប់មនុស្សចំនួន ១៤ នាក់ និងរបួសចំនួន ៤០ នាក់។

លោក សុទ្ធ គឹមកុលមុនី បានបន្តថា ចំណោមអ្នកស្លាប់ និងបួសជាង ៥០ នាក់ ក្នុងនោះនៅរាជធានីភ្នំពេញច្រើនជាងគេ ដោយមានអគ្គិភ័យកើតឡើងចំនួន ៨៩ លើក បណ្តាលឱ្យឆេះផ្ទះចំនួន ១០៧ ខ្នង តូបផ្សារចំនួន ២០ តូប ឃ្លាំងទំនិញចំនួន ៥ រោងចក្រសិប្បកម្មចំនួន ៥ កន្លែង ស្លាប់មនុស្សចំនួន ២ នាក់ និងរបួសចំនួន ៩ នាក់។ ក្រៅពីនេះ នៅខេត្តកណ្តាល ស្លាប់ ១ នាក់ ខេត្តតាកែវស្លាប់ ១ នាក់ ខេត្តស្វាយរៀងស្លាប់ ២ នាក់ ក្រចេះស្លាប់ ១ នាក់ កំពង់ធំស្លាប់ ១ នាក់ កំពង់ឆ្នាំងស្លាប់ ១ នាក់ បាត់ដំបងស្លាប់ ១ នាក់ សៀមរាបស្លាប់ ៣ នាក់ និងខេត្តព្រះវិហារស្លាប់ ១ នាក់។

លោកបានបន្តថា តួលេខនេះបើធៀបទៅនឹងរយៈពេល ៧ ខែ ដូចគ្នា កាលពីឆ្នាំ ២០២៣ កន្លងទៅ ឃើញថា មានការកើនឡើង ខណៈ ៧ ខែ ឆ្នាំមុន អគ្គិភ័យកើតឡើងចំនួន ៣០៩ លើក បណ្តាលឱ្យឆេះផ្ទះចំនួន ៤២៧ ខ្នង តូបផ្សារចំនួន ៦១ តូប ឃ្លាំងទំនិញចំនួន ៨ សាលារៀន ១ ខ្នង រោងចក្រសិប្បកម្មចំនួន ៨ កន្លែង អគាររដ្ឋបាលចំនួន ៧ ស្លាប់មនុស្សចំនួន ២៣ នាក់ និងរបួសចំនួន ២៧ នាក់។

បើតាមលោកឧត្ដមសេនីយ៍ឯក នេត វាន់ថា ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ ធ្លាប់បានបញ្ជាក់ឱ្យដឹងថា ដើមចមដែលនាំឱ្យមានគ្រោះអគ្គិភ័យកើតឡើង បណ្ដាលមកពីការឆ្លងចរន្តអគ្គិសនីចំនួន ៤១,៥៥ ភាគរយ ប្រើប្រាស់ភ្លើងចំនួន ៣៨,២៤ ភាគរយ និងក្ដាប់មិនបានចំនួន ២០,២១ ភាគរយ៕

អត្ថបទ ៖ សំអឿន