ព័ត៌មានជាតិ

កសិករនៅស្រុកភ្នំព្រឹកបារម្ភពីទីផ្សារមៀនប៉ៃលិន ខណៈទិន្នផលហុចផលច្រើនជាងឆ្នាំមុន

បានផុស

១ ខែ មុន

នៅ

ថ្ងៃពុធ ២១ សីហា ២០២៤

ដោយ

Din Thary

ទិន្នផលផ្លែមៀនប៉ៃលិននៅឆ្នាំនេះមានកំណើនជាងឆ្នាំមុន ខណៈដែលកសិករកំពុងត្រៀមប្រមូលទិន្នផលមុនចូលឆ្នាំចិន ឆ្នាំ២០២៥ ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមកសិករដាំមៀននៅស្រុកភ្នំព្រឹកបានលើកឡើងដូចៗគ្នាថា ដំណាក់កាលទី២ ដែលត្រៀមនឹងប្រមូលផលមុនចូលឆ្នាំចិននេះ នៅតាមចម្ការនីមួយៗ ដើមមៀនកំពុងចេញផ្កាយ៉ាងស្រុះគ្នាគ្រប់ដើម ដែលក្រុមកសិកររំពឹងថា ទិន្នផលមៀនឆ្នាំនេះនឹងកើនជាងឆ្នាំមុន។

ស្របពេលទិន្នផលរំពឹងថានឹងហុចផលល្អ ក្រុមកសិករក៏កំពុងព្រួយបារម្ភពីបញ្ហាទីផ្សារផងដែរ ខណៈថ្មីៗនេះ ភាគីតំណាងក្រុមហ៊ុន ឆាយណា ជីនវ័រ យាន និងតំណាងសហគមន៍ផ្លែមៀនប៉ៃលិន បានចុះកិច្ចសន្យាទិញផ្លែមៀនប៉ៃលិនជាថ្មី ដើម្បីកំណត់តម្លៃដែលស្ថិតក្រោមតម្លៃកាលពីឆ្នាំមុនបន្តិច ក្នុងការទទួលទិញទាំងពីរដំណាក់កាលផ្សេងគ្នា។

ក្នុងចំណោមកសិករដាំមៀនប៉ៃលិន ក្នុងស្រុកភ្នំព្រឹក លោក រិន ដា បានឲ្យដឹងថា ដំណាំមៀនរបស់លោកបានដាំលើដីទំហំ ១០ហិកតា ស្ថិតក្នុងដំណាក់កាលទី២ ហើយការដាំដុះនិងថែទាំស្របទៅតាមស្តង់ដារបច្ចេកទេស ដើម្បីតម្រូវតាមទីផ្សារ ដែលគ្រប់រដូវកាលខាងសហគមន៍មៀនប៉ៃលិនបានទទួលស្គាល់ និងទទួលទិញយក។

លោកបន្តថា «ខ្ញុំនិងកសិករផ្សេងទៀត ដែលត្រៀមនឹងប្រមូលផលមុនចូលឆ្នាំចិន ក្នុងឆ្នាំ២០២៥ ខាងមុខ កំពុងព្រួយបារម្ភរឿងតម្លៃ ព្រោះថ្មីៗនេះខាងសហគមន៍មៀនប៉ៃលិន បានឆ្លើយតបថា ខាងសហគមន៍បានបញ្ជាទិញគ្រប់ហើយ។

លោកបានលើកឡើងទាំងការបារម្ភខ្លាចគ្មានទីផ្សារ នៅពេលដល់ពេលប្រមូលនៅពេលខាងមុខ ខណៈទទួលបានព័ត៌មានពីសហគមន៍ថាបានបញ្ជាទិញគ្រប់ហើយ។

លោកលើកឡើងថា «តើឲ្យខ្ញុំទៅរកទីផ្សារឯណា បើសព្វថ្ងៃសង្ឃឹមលើតែទីផ្សារសហគមន៍តែមួយប៉ុណ្ណោះ»។

បើទោះបីបែបនេះក្តីលោករងចាំមើលភាពជាក់ស្តែងដល់រដូវប្រមូលផលសិន ទោះបីជាការធ្វើកិច្ចសន្យាកំណត់តម្លៃចុងក្រោយនេះ ទាបជាងឆ្នាំមុនបន្តិច ក៏លោកអាចទទួលយកបានដែរឲ្យតែបានសល់ខ្លះៗ ក្រោយពីទូទាត់លើកម្លាំងពលករ បេះផ្លែមៀនរួចរាល់ ខណៈឆ្នាំមុនបើលក់ក្នុងខែនេះ ដែលជាដំណាក់កាលទី១ បានតម្លៃ ៣៦០០រៀក្នុង ១គីឡូក្រាម និង ដំណាក់កាលទី២ បានតម្លៃ ៤១០០រៀល ក្នុង ១គីឡូក្រាម។

ពាក់ព័ន្ធបញ្ហាខាងលើ «កម្ពុជាថ្មី» មិនអាចសុំការឆ្លើយតបពីខាងសហគមន៍មៀនប៉ៃលិនបានថាយ៉ាងណានោះទេ។

កសិករដាំមៀននៅខេត្តប៉ៃលិនម្នាក់ទៀត ដែលបានដឹងជុំវិញការកំណត់តម្លៃរបស់ភាគីក្រុមហ៊ុន និងតំណាងសហគមន៍ បានប្រាប់ដែរថា ការធ្វើកិច្ចសន្យាបញ្ជាទិញផ្លែមៀននៅឆ្នាំនេះ គេធ្វើឡើង២ ដំណាក់កាលផ្សេងគ្នា ហើយតម្លៃក៏ប្រែប្រួលដែរ។

ប្រភពដដែលបន្តថា «តាមខ្ញុំដឹង ដំណាក់កាលទី១ ចាប់ពីខែសីហា ដល់ ខែវិច្ឆិកា ក្រុមហ៊ុនទិញក្នុងតម្លៃ ៣០០០ រៀល ក្នុងមួយគីឡូក្រាម។ ចាប់ពីខែធ្នូ រហូតដល់ ខែមិថុនា ឆ្នាំ២០២៥ ខាងមុខ គេកំណត់ជាដំណាក់កាលទី២ គឺក្រុមហ៊ុនទិញក្នុងតម្លៃ ៣៥០០ រៀល ក្នុងមួយគីឡូក្រាម ហើយមៀនខ្ញុំក៏ឋិតក្នុងរយៈពេលដំណាក់កាលទី២ ដែរ ខ្ញុំអាចទទួលយកបាន បើទោះតម្លៃទាបជាងបន្តិចពីឆ្នាំមុនក៏ដោយ»។

មន្ត្រីកសិកម្មខេត្តបាត់ដំបង លោក ហេង សិទ្ធ បានលើកឡើងថា បញ្ហាខាងក្រុមហ៊ុន និងតំណាងសហគមន៍ធ្វើកិច្ចកុងត្រាលើតម្លៃថ្មីក្នុងឆ្នាំនេះ គឺគេពឹងផ្អែកលើបរិមាណ និងគុណភាពផ្លែមៀន គឺជារឿងត្រឹមត្រូវ ហើយខាងមន្ទីរមិនមានការជ្រៀតជ្រែកណាមួយ ក្រៅពីការជួយសម្របសម្រួលរវាងតំណាងអ្នកទិញ និងកសិករប៉ុណ្ណោះ ហើយតម្លៃដែលតំណាងអ្នកទិញបានកំណត់ក្នុងឆ្នាំនេះក៏សមរម្យដែរ ព្រោះក្រុមហ៊ុនគេពិនិត្យមើលជាក់ស្តែងលើបរិមាណ និងគុណភាពទិន្នផលផ្លែមៀន បានសមស្របដែលកសិករទទួលយកបាន ខាងមន្ទីរបានត្រឹមសម្របសម្រួលថា តើក្រុមហ៊ុនតម្រូវទិញយកផ្លែមៀនក្នុងទំហំណា? និងមានកុងត្រា ហើយតើទិញយកតាមការកំណត់ដែរ ឬទេ?

លោកបញ្ជាក់ថា «នេះសម្រាប់តែកសិករដាំ និងថែបានតាមបច្ចេកទេសស្តង់ដារ តាមតម្រូវការទីផ្សារប៉ុណ្ណោះ តែបើកសិករណាដាំដោយខ្វះបច្ចេកទេស គឺក្រុមហ៊ុន និងសហគមន៍មិនទទួលទិញនោះទេ គឺរកទីផ្សារដោយខ្លួនឯង»។

លោកបន្តថា ដំណាំមៀនប៉ៃលិនឆ្នាំនេះ អាចកើនជាងឆ្នាំមុនបន្តិចបន្តួចប៉ុណ្ណោះ ជាពិសេសទិន្នផលដែលត្រៀមប្រមូលក្នុងដំណាក់កាលទី២ នឹងមានច្រើនជាងការប្រមូលទិន្នផលក្នុងខែនេះ ដែលជាដំណាក់កាលទីមួយ៕

អត្ថបទ៖ សៅ សារិទ្ធ