ព័ត៌មានជាតិ

ជិត ៨ ខែ រាជរដ្ឋាភិបាលឧបត្ថម្ភថវិកាជិត ៣០០ ប៊ីលានរៀល ដល់កម្មការិនីជាស្ត្រីមានផ្ទៃពោះ និងកុមារអាយុក្រោម ២ ឆ្នាំ

បានផុស

៦ ខែ មុន

នៅ

ថ្ងៃព្រហស្បតិ៍ ២២ សីហា ២០២៤

ដោយ

ក្នុងរយៈពេលជិត ៨ ខែ ឆ្នាំ ២០២៤ នេះ រាជរដ្ឋាភិបាលបានឧបត្ថម្ភថវិកាប្រមាណជិត ៣០០ ប៊ីលានរៀល ដល់កម្មការិនីជាស្ត្រីមានផ្ទៃពោះ មុន និងក្រោយសម្រាល និងកុមារអាយុក្រោម ២ ឆ្នាំ ដែលបានជួយលើកកម្ពស់សុខភាព និងជីវភាពគ្រួសារកាន់តែប្រសើរបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅរសៀលថ្ងៃទី ២២ សីហា នេះថា គិតពីខែមករា រហូតដល់ ២០ ខែសីហា ឆ្នាំ ២០២៤ នេះ រាជរដ្ឋាភិបាល បានឧបត្ថម្ភថវិកាដល់កម្មការិនីជាស្ត្រីមានផ្ទៃពោះ និងកុមារអាយុក្រោម ២ ឆ្នាំ ចំនួន ៩៨ ២៣៤ នាក់ មានកូនចំនួន ៩៥ ១៧០ នាក់ ដោយចំណាយថវិកាប្រមាណជា ៦៥,៤១ ប៊ីលានរៀល និងបានឧបត្ថម្ភថវិកាដល់កម្មការិនីជាស្ត្រីសម្រាលកូនសរុបចំនួន ៥៤៧ ៣១១ នាក់ មានកូនចំនួន ៥៣៣ ៥៦៦ នាក់ ចំណាយថវិកាសរុបចំនួន ២៥៥,៥៧ ប៊ីលានរៀល។

លោកបានបន្តថា ការផ្ដល់ប្រាក់ឧបត្ថម្ភនេះបានជួយលើកកម្ពស់សុខភាព និងជីវភាពគ្រួសារសមាជិក ប.ស.ស ជាស្ត្រីមានផ្ទៃពោះ និងកុមារអាយុក្រោម ២ ឆ្នាំ កាន់តែប្រសើរឡើងបន្ថែមទៀត។

លោកបានបន្តទៀតថា រាជរដ្ឋាភិបាលបានឧបត្ថម្ភសាច់ប្រាក់ជូនកម្មករ-និយោជិត ស្ត្រីមានផ្ទៃពោះ និងកុមារក្រោមអាយុ ២ ឆ្នាំ ក្នុងនោះមុនពេលសម្រាលកូនកម្មករ-និយោជិត ស្ត្រីមានផ្ទៃពោះទទួលបានប្រាក់ឧបត្ថម្ភចំនួន ៤ លើក ដោយ ១ លើក ទទួលបានថវិកា ៨ ម៉ឺនរៀល។ ពេលសម្រាលកូន ទទួលបានប្រាក់ឧបត្ថម្ភដោយកូន ១ ទទួលបានថវិកា ៨០ ម៉ឺនរៀល កូនភ្លោះពីរទទួលបាន ១ លាន ២ សែនរៀល និងកូនភ្លោះបីទទួលបាន ១ លាន ៦ សែនរៀល និងទទួលបានការឧបត្ថម្ភពិសេសបន្ថែមពី សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ចំនួន ៥ លានរៀល ទៀតផងដែរ។

លោកបានបន្ថែមថា ជាមួយគ្នានេះដែរ ក្រោយពេលសម្រាលកូនកម្មករ-និយោជិតស្ត្រីមានផ្ទៃពោះទទួលបានប្រាក់ឧបត្ថម្ភចំនួន ១០ លើក ដោយ ១ លើក ទទួលបាន ៨ ម៉ឺនរៀល ក្នុងនោះ ៣ លើក នៅពេលទៅទទួលសេវាពិនិត្យសុខភាព ក្រោយពេលសម្រាលកូន និង ៧ លើកទៀត នៅពេលយកកូនទៅទទួលថ្នាំបង្ការរហូតដល់អាយុ ២ ឆ្នាំ។

លោកបានបន្ថែមថា «ការទទួលបានប្រាក់ឧបត្ថម្ភនេះ នឹងជួយឱ្យស្ត្រីមានសុវត្ថិភាព និងសុខភាពតាំងពីពពោះរហូតដល់សម្រាលកូន។ មានន័យថាគាត់ទៅពិនិត្យសុខភាពទៀងទាត់ ថែទាំសុខភាពបានល្អ ក្រោមការត្រួតពិនិត្យរបស់គ្រូពេទ្យ ហើយពេលសម្រាលកូនសម្រាលដោយក្រុមគ្រូពេទ្យ ឬឆ្មបមានវិជ្ជាជីវៈ និងបច្ចេកទេសត្រឹមត្រូវ ធានាសុវត្ថិភាពពេលសម្រាល ហើយពេលកូនកើតមកបាន ២ ឆ្នាំ ទទួលបានការចាក់វ៉ាក់សាំង និងពិនិត្យសុខភាពក្រោយពេលសម្រាល»។

លោកបានបញ្ជាក់ថា ស្ត្រីមានផ្ទៃពោះជាសមាជិក ប.ស.ស មិនខ្វល់ពីការខ្វះខាតប្រាក់ក្នុងការពិនិត្យផ្ទៃពោះពេលសម្រាល និងចាក់វ៉ាក់សាំងដល់កូនឡើយ ព្រោះ ប.ស.ស.ធានារ៉ាប់រងទាំងអស់ និងថែមទាំងទទួលបានប្រាក់ឧបត្ថម្ភពីរាជរដ្ឋាភិបាលទៀតផង ដែលនឹងជួយលើកស្ទួយជីវភាពគ្រួសារកាន់តែប្រសើរ។

លោក កត្តា អ៊ន បានបន្ថែមទៀតថា ប៉ុន្តែមុននឹងទទួលបានប្រាក់ឧបត្ថម្ភរបស់រាជរដ្ឋាភិបាលសម្រាប់ស្ត្រីមានផ្ទៃពោះ និងកុមារអាយុក្រោម ២ ឆ្នាំ ត្រូវបំពេញលក្ខខណ្ឌមួយចំនួនដូចជា ៖ ត្រូវមានប័ណ្ណសមាជិក ប.ស.ស. ដែលមានសុពលភាព។ ត្រូវទៅទទួលសេវាសុខភាពនៅមូលដ្ឋានសុខាភិបាលសាធារណៈ (មន្ទីរពេទ្យរដ្ឋ) តាមតារាងកម្មវិធី។ កុមារដែលម្តាយបានចុះឈ្មោះរួចក្នុងកម្មវិធី កុមារនោះ ត្រូវចូលក្នុងកម្មវិធីដោយស្វ័យប្រវត្តិ ដោយត្រូវភ្ជាប់មកជាមួយនូវប័ណ្ណសុខភាពកុមារ។

លោកបានឱ្យដឹងទៀតថា ពេលមកស្នើសុំប្រាក់ឧបត្ថម្ភរបស់រាជរដ្ឋាភិបាលនៅ ប.ស.ស. ត្រូវភ្ជាប់មកជាមួយនូវ អត្តសញ្ញាណប័ណ្ណសញ្ជាតិខ្មែរ (មានសុពលភាព) ប័ណ្ណសមាជិក ប.ស.ស. (មានសុពលភាព) លេខទូរស័ព្ទ និងលេខគណនីធនាគារអេស៊ីលីដា កាណាឌីយ៉ា និង អេប៊ីអេ សៀវភៅសុខភាពមាតាបញ្ជាក់ពីអាយុគភ៌ដំបូង ដែលចេញដោយមន្ទីរពេទ្យរដ្ឋ៕

អត្ថបទ ៖ សំអឿន