មន្ត្រីជាន់ខ្ពស់ព្រឹទ្ធសភា ណែនាំនិស្សិតពេទ្យសិក្សាទាំងជំនាញរឹង និងជំនាញទន់ ឈានឆ្ពោះរកភាពជោគជ័យ

មន្ត្រី​ជាន់ខ្ពស់​ព្រឹទ្ធសភា បាន​ធ្វើការ​ណែនាំ​ដល់​និស្សិត​សាកលវិទ្យាល័យ​វិទ្យាសាស្ត្រ​សុខាភិបាល ត្រូវ​ខិតខំ​សិក្សា​រៀន​សូត្រ​ទាំង​ជំនាញ​រឹង និង​ជំនាញ​ទន់ ដើម្បី​ឈាន​ឆ្ពោះ​រក​ភាព​ជោគជ័យ​ទៅ​ថ្ងៃ​អនាគត។

នា​ឱកាស​ចូលរួម​ធ្វើ​បាឋកថា​ស្ដីពី ថា​តើ​កម្ពុជា​បាន​អភិវឌ្ឍន៍​សេដ្ឋកិច្ច​បាន​ល្អ​កម្រិត​ណា​ដែរ​? ដល់​និស្សិត​សាកលវិទ្យាល័យ​វិទ្យាសាស្ត្រ​សុខាភិបាល​ប្រមាណ​ជាង ៤០០ នាក់ នៅ​ព្រឹក​ថ្ងៃ​ទី ២២ សីហា លោក​បណ្ឌិត ធន់ វឌ្ឍនា ប្រធាន​គណៈកម្មការ​សេដ្ឋកិច្ច ហិរញ្ញវត្ថុ ធនាគារ និង​សវនកម្ម ព្រឹទ្ធសភា នៃ​ព្រះរាជាណាចក្រ​កម្ពុជា បាន​លើក​ឡើង​ថា «​ដើម្បី​ឱ្យ​ជីវិត​ប្អូនៗ ទទួល​បាន​ជោគជ័យ ប្អូនៗ ត្រូវ​ចេះ​ជំនាញ​រឹង និង​ជំនាញ​ទន់។ ជំនាញ​រឹង​ប្អូនៗ រៀន​រាល់​ថ្ងៃនេះ​ដូចជា​រៀន​ជំនាញ​ឱសថ​សាស្ត្រ អេកូ​សាស្ត្រ វេជ្ជបណ្ឌិត គិលានុបដ្ឋាក គិលានុបដ្ឋាយិកា ជាដើម។ ប៉ុន្តែ​បើ​ប្អូនៗ ចេះតែ​ជំនាញ​រឹង មិន​ចេះ​ជំនាញ​ទន់ ប្អូន​ក៏​មិន​អាច​ជោគជ័យ​បាន​ដែរ ព្រោះថា​ជំនាញ​ទន់​នេះ​នាំ​ឱ្យ​ប្អូន​ជោគជ័យ ៨០ ទៅ ៨៥%»។

លោក​បណ្ឌិត បាន​បន្ត​ថា ជំនាញ​ទន់​នេះ គឺជា​ជំនាញ​មួយ​ដែល​ធ្វើ​ឱ្យ​ប្អូនៗ ចេះ​ទំនាក់ទំនង​នៅ​ក្នុង​សង្គម ទាំង​នៅ​សាលា កន្លែងធ្វើការ និង​នៅ​ខាងក្រៅ ព្រោះថា​មាន​អ្នកខ្លះ​គាត់​បើក​រកស៊ី​ជំនាញ​ខាង​ពេទ្យ តែ​គាត់​មិន​មាន​ជំនាញ​នេះ​ទេ និង​ខ្លះ​ទៀត​រកស៊ី​ផ្នែក​កសិកម្ម​ផលិត​ចំណីអាហារ តែ​មិន​ចេះ​ជំនាញ​នេះ​ទេ នេះ​មកពី​ពួកគាត់​ចេះ​ទំនាក់ទំនង​ល្អ។

លោក​បណ្ឌិត បាន​ណែនាំ​ដល់​និស្សិត ត្រូវខិតខំ​រៀនសូត្រ​ទាំង​ជំនាញ​រឹង​ និង​ជំនាញ​ទន់​ ទើប​ធ្វើឱ្យ​ជីវិត​យើង​ឈានទៅរក​ភាពជោគជ័យ​។​ បើ​ប្អូនៗ​រៀន​តែ​ជំនាញ​រឹង​មិនចេះ​ជំនាញ​ទន់​ទេ ​ប្អូនៗ ​ក៏​មិន​ទទួលបាន​ជោគជ័យ​ដែរ​។​ ព្រោះថា​ប្អូន​ជា​ធនធានមនុស្ស​ដ៏​សំខាន់​ក្នុងការ​ចូលរួម​អភិវឌ្ឍន៍​ប្រទេស ពិសេស​ដើម្បីឱ្យ​កម្ពុជា​ក្លាយជា​ប្រទេស​មាន​ប្រាក់ចំណូល​មធ្យម​កម្រិត​ខ្ពស់​នៅ​ឆ្នាំ​ ២០៣០ ​និង​ប្រាក់​ចំណូល​កម្រិត​ខ្ពស់​នៅ​ឆ្នាំ​ ២០៥០។

លោក​បណ្ឌិត បាន​បន្ថែម​ថា ដើម្បី​សម្រេច​បាន​តាម​គោលដៅ​ខាងលើនេះ​ យើង​ត្រូវ​ធានា​ឱ្យបាន​សន្តិភាព និង​ស្ថិរភាព។ ផលិត​ធនធាន​ឱ្យ​បាន​ច្រើន ​ហើយ​សាកលវិទ្យាល័យ​វិទ្យាសាស្ត្រ​សុខាភិបាល​បាន​ដើរតួនាទី​សំខាន់​ណាស់​ក្នុង​ការ​ផលិត​ធនធាន​មនុស្ស​ទៅ​លើ​វិស័យ​សុខាភិបាល​ជួយ​ព្យាបាល​ជំងឺ​ប្រជាពលរដ្ឋ និង​ទប់ស្កាត់​ និង​អប់រំ​ណែនាំ​ដល់​ប្រជាពលរដ្ឋ​កុំឱ្យ​មាន​ជំងឺតម្កាត់​ផ្សេងៗ ពិសេស​ជំងឺ​ដែល​អាច​ការពារ​បាន។

ទន្ទឹមនឹងនេះ ​ប្អូនៗ ​ត្រូវ​ពង្រឹង​ភាសា​អង់គ្លេស ​ព្រោះ​ភាសា​អង់គ្លេស​ជា​ភាសា​មួយ​ដ៏​សំខាន់​ក្នុងការ​ទំនាក់​ទំនងជា​មួយ​អន្តរជាតិ​ទាំង​ការទូត និង​ពាណិជ្ជកម្ម​ ដើម្បីឱ្យ​វិនិយោគិន​បរទេស​មក​វិនិយោគ​នៅ​កម្ពុជា​ឱ្យបាន​កាន់តែច្រើន។

លោកសាស្ត្រាចារ្យ សា​ផុន​វឌ្ឍនៈ សកលវិទ្យាធិការ នៃ​សាកលវិទ្យាល័យ​វិទ្យាសាស្ត្រ​សុខាភិបាល បាន​ថ្លែងអំណរគុណ​យ៉ាង​ជ្រាលជ្រៅ​ចំពោះ​លោក​បណ្ឌិត ធន់ វ​ឌ្ឍ​នា ប្រធាន​គណៈកម្មការ​សេដ្ឋកិច្ច ហិរញ្ញវត្ថុ ធនាគារ និង​សវនកម្ម ព្រឹទ្ធសភា នៃ​ព្រះរាជាណាចក្រ​កម្ពុជា​ ដែល​បាន​ចំណាយ​ពេល​វេលា​ដ៏​មាន​តម្លៃ​ធ្វើ​បាឋកថា​ដ៏​មានតម្លៃ​ជូន​ដល់​ប្អូនៗ ​និស្សិត​ នាពេលនេះ​ សម្រាប់​យកទៅ​អនុវត្ត​នៅក្នុង​ការសិក្សា​ ក៏ដូចជា​ចេញ​ធ្វើការ​ និង​ប្រកបការងារ​ឱ្យ​ទទួលបាន​ជោគជ័យ ​ទាំង​ខ្លួនឯង ក្រុមគ្រួសារ​ និង​ជូន​ប្រទេសជាតិ​ឱ្យ​កាន់តែ​រីកចម្រើន៕

អត្ថបទ ៖ សំអឿន