អគ្គនាយកដ្ឋាន​ពន្ធដារ ចេញ​បំភ្លឺ​ជុំវិញ​មាន​មន្រ្តី​ពន្ធដារ​ចុះ​ប្រមូល​លុយ​ តាម​ហាង​អាជីវកម្ម​នានា

នាពេលកន្លងមកនេះ អគ្គនាយកដ្ឋានពន្ធដារបាន​ទទួលព័ត៌មាន​ពាក់ព័ន្ធនឹងករណី​ជនខិលខូច​ ដែលក្លែងបន្លំជាមន្ត្រីពន្ធដារ​ចុះបន្លំប្រមូល​ប្រាក់តាមភោជនីយដ្ឋាន, អាហារដ្ឋាន និង​អាជីវកម្មដ្ឋាន​តូចតាចមួយ​ចំនួន ដោយមិនមានប្រើប្រាស់ឯកសណ្ឋានមន្ត្រីពន្ធដារ ឬមាន​លិខិត​បេសកកម្មត្រឹមត្រូវ។

ឆ្លើយតបនឹងករណីនេះ អគ្គនាយកដ្ឋានពន្ធដារ​បញ្ជាក់ជូនថា ករណី​ខាងលើ​នេះគឺជាករណីក្លែងបន្លំ ដើម្បីបោកបញ្ឆោតអ្នកជាប់ពន្ធ និងប្រជាពលរដ្ឋ ឱ្យមាន​ការភ័ន្ត​ច្រឡំ ជាថ្នូរនឹងប្រាក់ចូលហោប៉ៅបុគ្គលជាបក្សពួកជនខិលខូចមួយចំនួនតូច​នោះតែប៉ុណ្ណោះ។

បន្ថែមពីនេះ អគ្គនាយកដ្ឋានពន្ធដារ​បាន​អះអាង​ថា ​ពុំមាន​គោលការណ៍ ឬវិធានការឱ្យមន្ត្រីពន្ធដារដើរប្រមូលប្រាក់ពន្ធតាមភោជនីយដ្ឋាន, អាហារដ្ឋាន, អាជីវកម្មដ្ឋាន ឬនៅតាមសហគ្រាសប្រកបអាជីវកម្មនានានោះឡើយ។

អគ្គនាយកដ្ឋានពន្ធដារជម្រាបជូន អ្នកជាប់ពន្ធ និងប្រជាពលរដ្ឋទូទៅជ្រាប​ថា ដោយអនុវត្តតាមវិធានការកែទម្រង់ជាបន្តបន្ទាប់ អគ្គនាយកដ្ឋានពន្ធដារ​បានវិវត្តខ្លួន​ជារដ្ឋបាល​សារពើពន្ធឌីជីថល (Digital Tax Administration) ដែល​ប្រើប្រាស់ប្រព័ន្ធបច្ចេកវិទ្យា និងមាន​ហេដ្ឋារចនាសម្ព័ន្ធ​គ្រប់គ្រាន់ ដើម្បីប្រើប្រាស់ក្នុងការបំពេញភារកិច្ចគ្រប់គ្រង និងប្រមូល​ចំណូលពន្ធ​យ៉ាង​មានប្រសិទ្ធភាព សមស្របតាមឧត្តមានុវត្តន៍អន្តរជាតិ។

ជាក់ស្តែង នាពេលបច្ចុប្បន្ននេះ ការប្រកាសនិងបង់ប្រាក់ពន្ធគ្រប់ប្រភេទ សុទ្ធសឹងតែ​អាចប្រើប្រាស់​ប្រព័ន្ធ​និង​កម្មវិធីតាមបច្ចេកវិទ្យា​ព័ត៌មាន និងការទូទាត់តាមរយៈធនាគារឬតាមអនឡាញ​ដោយផ្ទាល់​តែ​ម្តង ក្នុងនោះជា​អាទិ៍មាន ប្រព័ន្ធគ្រប់គ្រងការ​ប្រកាសពន្ធ​អាជីវកម្មតាមអនឡាញ (E-filing), ប្រព័ន្ធ​គ្រប់គ្រង ការដាក់លិខិតប្រកាសពន្ធលើប្រាក់ចំណូលប្រចាំឆ្នាំតាមអនឡាញ (TOI E-filing), កម្មវិធីប្រកាសពន្ធអាជីវកម្មសម្រាប់អ្នកជាប់ពន្ធតូច (GDT Tax Pre-filing app), ប្រព័ន្ធ​គ្រប់គ្រង​បង់ប្រាក់ពន្ធតាមអនឡាញ (E-payment system)។

ទន្ទឹមនឹងការរៀបចំនិងដាក់ឱ្យប្រើប្រាស់ប្រព័ន្ធ និង​កម្មវិធីដើម្បីគ្រប់គ្រងនិងប្រមូលចំណូលពន្ធ អគ្គនាយកដ្ឋានពន្ធដារក៏បានរៀបចំប្រព័ន្ធ និង​កម្មវិធី​ដើម្បីសម្រួលលើការផ្តល់សេវាជូនអ្នកជាប់ពន្ធក្នុងការអនុវត្ត​កាតព្វកិច្ចសារពើពន្ធ ជាពិសេស កម្មវិធីទូរស័ព្ទដៃ​ត្រួតពិនិត្យនិងតាមដានឯកសារ (GDT Check and Track app) ដែលផ្តល់លទ្ធភាព​យ៉ាង​ពិសេសជូនដល់អ្នកជាប់ពន្ធ អាចធ្វើការត្រួតពិនិត្យប័ណ្ណសម្គាល់ខ្លួនមន្ត្រីដើម្បីបញ្ជាក់អត្តសញ្ញាណ​ជាមន្ត្រីរបស់អគ្គនាយកដ្ឋានពន្ធដារពិតប្រាកដ ដោយគ្រាន់តែស្ទែនលើបារកូដ QR កូដ លើ​លិខិតឬប័ណ្ណសម្គាល់ខ្លួន អាចទទួលបានព័ត៌មានភ្លាម, ត្រួតពិនិត្យបង្កាន់​ដៃបង់ប្រាក់ពន្ធ​ថា​ពិតជាបង្កាន់​ដៃ​ត្រឹមត្រូវឬទេ, តាមដាននិងត្រួតពិនិត្យដំណើរការឯកសារ និងអត្ថប្រយោជន៍​ផ្សេងៗ​ទៀតជាច្រើន។

អគ្គនាយកដ្ឋានពន្ធដារអំពាវនាវដល់ អ្នកជាប់ពន្ធក៏ដូចជាប្រជាពលរដ្ឋទូទៅប្រុងប្រយ័ត្ន និងសូមពិនិត្យឱ្យបានច្បាស់លាស់​ក្នុងករណីមានបុគ្គលណា ​ដែលមិនមាន​ឯក​សណ្ឋានមន្ត្រីពន្ធដារ និងមិនមានប័ណ្ណសម្គាល់ខ្លួនត្រឹមត្រូវ ចុះតាមអាជីវកម្មដ្ឋាន​របស់​អស់លោក លោកស្រី ក្នុងគោលដៅប្រមូលប្រាក់ ពិសេសលើកឡើងថាប្រមូលប្រាក់ពន្ធ និងដោយគ្មាន​លិខិតបេសកកម្ម​និងបញ្ជាក់ពីអង្គភាពច្បាស់លាស់ ដែលអាច​ផ្ទៀងផ្ទាត់បានដោយកម្មវិធីទូរស័ព្ទ​ដៃត្រួតពិនិត្យនិងតាមដានឯកសារ (GDT Check and Track app) បុគ្គល នោះគឺពុំមែនជាមន្ត្រីរបស់​អគ្គនាយកដ្ឋានពន្ធដារនោះឡើយ។

ក្នុងករណីនេះ អគ្គនាយកដ្ឋានពន្ធដារ អំពាវនាវដល់អ្នកជាប់ពន្ធក៏ដូចជាប្រជាពលរដ្ឋទូទៅចូលរួម​សហការ​ជាមួយ​អគ្គនាយកដ្ឋានពន្ធដារ ដោយផ្ដល់ព័ត៌មានតាមរយៈលេខទូរស័ព្ទ ១២៧៧ (ឥតគិតថ្លៃ) ដើម្បីអគ្គនាយកដ្ឋានពន្ធដារ​ពិនិត្យនិងចាត់វិធានការតាមផ្លូវច្បាប់លើករណីនោះ ឬជូនដំណឹង និង​ដាក់ពាក្យប្ដឹងជាបន្ទាន់ទៅកាន់អាជ្ញាធរមានសមត្ថកិច្ចពាក់ព័ន្ធចំពោះករណីក្លែងបន្លំនេះ៕