សមាគមឧកញ៉ាកម្ពុជា÷ បុគ្គល គុយ វ៉ាត ដែលសមត្ថកិច្ចឃាត់ខ្លួន គ្មានគោរមងារជា”ឧកញ៉ា” ឡើយ

នៅរសៀលថ្ងៃទី២៥ ខែសីហា នេះ សមាគមឧកញ៉ាកម្ពុជា បានចេញមកបញ្ជាក់ថា ជនសង្ស័យ គុយ វ៉ាត ម្ចាស់ភោជនីយដ្ឋាន Park Cafe ដែលត្រូវបានសមត្ថកិច្ចឃាត់ខ្លួន គឺគ្មានគោរមងារជា “ឧកញ៉ា” ដូចសារព័ត៌មានមួយចំនួនបានចុះផ្សាយថា បុគ្គល គុយ វ៉ាត មានគោរមងារជាឧកញ៉ា ឡើយ។ នេះបើតាមសេចក្តីប្រកាសព័ត៌មានរបស់សមាគមឧកញ៉ាកម្ពុជា។

សមាគមឧកញ៉ាកម្ពុជា ចាត់ទុក ការសរសេរ និងហៅបុគ្គល គុយ វ៉ាត ថាជា ឧកញ៉ា របស់សារព័ត៌មានមួយចំនួន គឺជាចេតនាចង់បានចំណាប់អារម្មណ៍ និងមានបំណងផ្សេង ដែលនាំឱ្យមានការបញ្ចេញមតិយោបល់ផ្សេងៗ ធ្វើឱ្យមានការភាន់ច្រឡំ និងយល់ខុសជាសាធារណ: នឹងធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយស កេរ្តិ៍ឈ្មោះ សេចក្ដីថ្លៃថ្នូរ និងគុណតម្លៃនៃគោរមវន្តឧកញ៉ាដទៃ។

លោក​ឧត្ដមសេនីយ៍​ឯក ង៉េង ជួរ ប្រធាន​នាយកដ្ឋាន​នគរបាល​ព្រហ្មទណ្ឌ ក្រសួងមហាផ្ទៃបានឱ្យដឹងថា គុយ វ៉ាត ត្រូវបានសមត្ថកិច្ចឃាត់ខ្លួនពីបទចេញសែកគ្មានប្រាក់ និងឆបោកទឹកប្រាក់រាប់សិបលានដុល្លារ។

តាមលោកប្រធាននាយកដ្ឋាននគរបាលព្រហ្មទណ្ឌ សមត្ថកិច្ចបានឃុំខ្លួន បុគ្គល គុយ វ៉ាត តាមដីការបង្គាប់របស់តុលាការ ហើយគ្រោងបញ្ជូនបុគ្គលនេះ ទៅតុលាការនៅថ្ងៃចន្ទ ទី២៦ ខែសីហា៕