កម្ពុជា-ហ្វីលីពីន នឹងរៀបចំកិច្ចប្រជុំគណៈកម្មការចម្រុះទ្វេភាគី នៅទីក្រុម៉ានីល

ប្រមុខការទូតកម្ពុជា លោកឧបនាយករដ្ឋមន្ត្រី សុខ ចិន្តាសោភា នឹងធ្វើជាសហប្រធានដឹកនាំកិច្ចប្រជុំគណៈកម្មការចម្រុះ កម្ពុជា-ហ្វីលីពីន សម្រាប់កិច្ចសហប្រតិបត្តិការទ្វេភាគី នៅទីក្រុងម៉ានីល។

លោកឧបនាយករដ្ឋមន្ត្រី សុខ ចិន្តាសោភា នឹងដឹកនាំគណៈប្រតិភូអញ្ជើញចូលរួមកិច្ចប្រជុំ លើកទី៤ នៃគណៈកម្មការចម្រុះកម្ពុជា-ហ្វីលីពីន សម្រាប់កិច្ចសហប្រតិបត្តិការទ្វេភាគី ដែលនឹងប្រព្រឹត្តទៅនៅថ្ងៃទី២៧-២៨ ខែសីហា ឆ្នាំ២០២៤ នៅទីក្រុងម៉ានីល តបតាមការអញ្ជើញរបស់លោក Enrique A. Manalo រដ្ឋមន្ត្រីការបរទេសហ្វីលីពីន។ នេះបើតាមសេចក្ដីប្រកាសព័ត៌មានរបស់ក្រសួងការបរទេស នៅថ្ងៃទី២៦ ខែសីហានេះ។

កិច្ចប្រជុំនេះ នឹងធ្វើការតាមដាន និងពិនិត្យឡើងវិញនូវវឌ្ឍនភាពនៃការអនុវត្តកិច្ចព្រមព្រៀង ដែលបានឯកភាពក្នុងកិច្ចប្រជុំលើកទី៣ នៃគណៈកម្មការចម្រុះកម្ពុជា-ហ្វីលីពីន សម្រាប់កិច្ចសហប្រតិបត្តិការទ្វេភាគី កាលពីឆ្នាំ២០២១ និងដាក់ចេញផែនការសកម្មភាពថ្មី ដើម្បីបន្តពង្រឹងទំនាក់ ទំនងដ៏យូរអង្វែងរវាងប្រទេសទាំងពីរ។ រដ្ឋមន្ត្រីទាំងពីរ ក៏នឹងពិភាក្សាអំពីការវិវត្តក្នុងតំបន់ និងបញ្ហាអន្តរជាតិដែលជាផលប្រយោជន៍ និងកង្វល់រួម។

ក្នុងទស្សនកិច្ចនេះ លោកឧបនាយករដ្ឋមន្ត្រី នឹងជួបសម្តែងការគួរសមជាមួយលោក Ferdinand Romualdez Marcos Jr., ប្រធានាធិបតីហ្វីលីពីន និងអញ្ជើញចូលរួមកម្មវិធីអាហារថ្ងៃត្រង់ដែលរៀបចំឡើងដោយ លោកស្រី Sara Duterte អនុប្រធានាធិបតីហ្វីលីពីន។

គួរជម្រាបថា គណៈកម្មការចម្រុះកម្ពុជា-ហ្វីលីពីន សម្រាប់កិច្ចសហប្រតិបត្តិការទ្វេភាគី បានរៀបចំកិច្ចប្រជុំ លើកទី៣ កាលពីឆ្នាំ២០២១ ដែលកាលនោះ រៀបចំឡើងតាមរយៈប្រព័ន្ធវីដេអូ ដែលដឹកនាំដោយលោក ប្រាក់ សុខុន អតីតប្រមុខការទូតកម្ពុជា និងលោក Teodoro L. Locsin Jr. រដ្ឋលេខាធិការក្រសួងការបរទេសហ្វីលីពីន៕