សហគ្រាស​នៅ​កម្ពុជា ​បែងចែកជាបួនទម្រង់ធំៗ​ ​មាន​ចរិតលក្ខណៈខុសៗគ្នា

ក្រសួង​សេដ្ឋកិច្ច​និង​ហិរញ្ញវត្ថុ​ បាន​ចេញផ្សាយ​សៀវភៅ​មគ្គុទ្ទេសក៍​ ស្តី​ពី​ដំណើរការ​ចុះ​បញ្ជី​អាជីវកម្ម​តាម​ប្រព័ន្ធ​បច្ចេកវិទ្យា​ព័ត៌មាន​។

សៀវភៅ​មគ្គុទ្ទេសក៍​ស្តី​ពី​ដំណើរការ​ចុះ​បញ្ជី​អាជីវកម្ម​តាម​ប្រព័ន្ធ​បច្ចេកវិទ្យា​ព័ត៌មាន បាន​បែងចែក​ទម្រង់​សហគ្រាស​នៅ​កម្ពុជា​ជា​បួន​ទម្រង់​ធំៗ ដែល​ទម្រង់​នីមួយៗ​មាន​ចរិត​លក្ខណៈ​ខុសៗ​គ្នា។

១. ក្រុមហ៊ុន​មូលធន៖ មានពីរ​ទ្រង់ទ្រាយ គឺក្រុមហ៊ុន​ឯកជន​ទទួលខុស​ត្រូវ​មាន​កម្រិត និង​ក្រុមហ៊ុនមហាជន​ទទួលខុស​ត្រូវមាន​កម្រិត។

លក្ខណៈ​របស់​ក្រុមហ៊ុន​មូលធន មាន​ដូច​ខាងក្រោម៖

-ជា​ក្រុមហ៊ុន​ទទួលខុសត្រូវ​មានកម្រិត
-ម្ចាស់​ភាគហ៊ុន​ទទួលខុសត្រូវ​ត្រឹម​ចំនួន​ភាគហ៊ុន​ដែលខ្លួន​បានទិញ
-ជា​នីតិបុគ្គល​ដាច់ដោយឡែក​ពី​ម្ចាស់
-គ្រប់គ្រង និង​ដឹកនាំ​ដោយ​ក្រុម​ប្រឹក្សាភិបាល
-បង្កើត​ដោយ​លក្ខន្តិកៈ។

ភាព​ខុសគ្នា​រវាង​ក្រុមហ៊ុន​ឯកជន​ទទួលខុសត្រូវ​មានកម្រិត និង​ក្រុមហ៊ុន​មហាជន​ទទួលខុស​ត្រូវ​មាន​កម្រិត​គឺ​ស្ថិតនៅត្រង់​ថា​ក្រុមហ៊ុន​មហាជន​ទទួលខុស​ត្រូវ​មានកម្រិត អាច​បោះ​ចេញ​មូលបត្រ​លក់​ជា​សាធារណៈ​បាន។

២. ក្រុមហ៊ុន​បរទេស៖ មាន​បី​ទ្រង់ទ្រាយគឺ សាខា​ក្រុមហ៊ុន​បរទេស ការិយាល័យ​តំណាង​ពាណិជ្ជកម្ម និង​បុត្រសម្ព័ន្ធ។ ក្រុមហ៊ុន​បរទេសគឺ

-ជា​ក្រុមហ៊ុន​បង្កើត​ឡើង​ក្រោម​ច្បាប់​នៃប្រទេស​ដទៃ
-មាន​ទីតាំង​ពាណិជ្ជកម្ម​នៅក្នុង​ព្រះរាជាណាចក្រ​កម្ពុជា
-ជា​ភ្នាក់ងារ​ក្រុមហ៊ុន​ដើម
-ពុំមាននីតិបុគ្គលិកលក្ខណៈដាច់ដោយឡែក​ពីក្រុមហ៊ុន​ដើមឡើយ​ចំពោះ​សាខាក្រុមហ៊ុនពាណិជ្ជកម្ម និង​ការិយាល័យ​តំណាងពាណិជ្ជកម្ម
-ត្រូវ​ចុះ​បញ្ជី​ក្នុងទម្រង់​ក្រុមហ៊ុន​សហកម្មសិទ្ធិ ឬក្រុមហ៊ុនមូលធនចំពោះបុត្រសម្ព័ន្ធ។

៣. សហគ្រាសឯកបុគ្គល៖ ជាប្រភេទសហគ្រាសដែល

-មានម្ចាស់តែម្នាក់
-ទទួលខុសត្រូវគ្មានកម្រិត
-គ្មាននីតិបុគ្គល
-ទ្រព្យនិងបំណុលរបស់សហគ្រាស និងទ្រព្យនិងបំណុលបុគ្គលគឺជាទ្រព្យតែមួយ។

៤. ក្រុមហ៊ុនសហកម្មសិទ្ធិ៖ មានពីរទ្រង់ទ្រាយដូចជា ក្រុមហ៊ុនសហកម្មសិទ្ធិទូទៅ និងក្រុមហ៊ុន សហកម្មសិទ្ធិមានកម្រិត​។ ក្រុមហ៊ុនសហកម្មសិទ្ធិគឺ

-ជាក្រុមហ៊ុនទទួលខុសត្រូវគ្មានកម្រិត
-បង្កើតឡើងដោយកិច្ចសន្យាដែលមានបុគ្គលពីរនាក់ឡើងទៅ
-ជានីតិបុគ្គល
-គ្រប់គ្រងដោយសហកម្មសិទ្ធករទូទៅទាំងអស់។

អត្ថបទក្រោយ កម្ពុជា​ថ្មីនឹង​បន្ត​ចែករំលែក​ពី​ដំណើរការ​ចុះបញ្ជី​អាជីវកម្ម និង​ផលប្រយោជន៍​នៃ​ការ​ចុះ​បញ្ជី​ពាណិជ្ជ​បន្តទៀត៕