អភិបាលខេត្តថ្មី៣រូប ប្រកាសបរិច្ចាគប្រាក់ខែពាក់កណ្តាលរយៈពេល៥ខែ ចូលរួមនិធិកសាងហេដ្ឋារចនាសម្ព័ន្ធ​តាមព្រំដែន

ក្រោយពីសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជាបានប្រកាសបង្កើត«មូលនិធិកសាងហេដ្ឋារចនាសម្ព័ន្ធ​តាមបណ្ដោយព្រំដែន» មន្រ្តីរាជការ និងប្រជាពលរដ្ឋទូទៅ បានសម្តែងនូវការគាំទ្រយ៉ាងខ្លាំង។ ក្នុងនោះ អភិបាលខេត្តថ្មីចំនួន៣រូប​ គឺខេត្តកណ្តាល ខេត្តតាកែវ និងខេត្តស្ទឹងត្រែង មិនត្រឹមតែប្រកាសគាំទ្រទេ ថែមទាំងប្រកាសបរិច្ចាគប្រាក់ខែរបស់ខ្លួនចំនួនពាក់កណ្តាលរយៈពេល៥ខែ ដើម្បីចូលរួមនៅក្នុងមូលនិធិនេះថែមទៀតផង។

លោក គួច ចំរើន អភិបាលខេត្តកណ្តាល បានប្រកាសតាមរយៈទំព័រហ្វេសប៊ុកថា៖ «ខ្ញុំបរិច្ចាគ ប្រាក់បៀវត្សប្រចាំខែ​ ៥០%​ រយៈពេល​ ៥ខែ​ (សីហា-ធ្នូ ២០២៤)​ចូលរួមគាំទ្រ​ ​”មូលនិធិកសាងហេដ្ឋារចនាសម្ព័ន្ធ​ តាមបណ្ដោយព្រំដែន”​ គាំទ្រសម្ដេចមហាបវរធិបតី​»។ លោក គួច ចំរើន គឺជាអតីតអភិបាលខេត្តព្រះសីហនុ ហើយទើបនឹងមកកាន់ជាអភិបាលខេត្តកណ្តាលនាពេលថ្មីៗកន្លងនេះ។

ចំណែក លោក វ៉ី សំណាង ដែលជាអតីតអភិបាលខេត្តកំពង់ស្ពឺ និងទើបទៅកាន់តំណែងជាអភិបាលខេត្តតាកែវថ្មី ក៏មិនខុសពីអភិបាលខេត្តកណ្តាលដែរ។ តាមរយៈហ្វេសប៊ុកដូចគ្នា លោក វ៉ី សំណាង បានប្រកាសថា៖«ខ្ញុំបាទសូមគាំទ្រពេញទំហឹង នឹងសូមចូលរួមតាមរយៈការកាត់ប្រាក់ខែរបស់ខ្ញុំបាទ ចំនួនពាក់កណ្តាល (ពីខែសីហា ដល់ខែធ្នូ ឆ្នាំ២០២៤) នៃខែនីមួយៗ»។

ដូចគ្នាដែរ លោក សរ សុពុត្រា អភិបាលថ្មីនៃខេត្តស្ទឹងត្រែង ក៏បានប្រកាសគាំទ្រយ៉ាងពេញទំហឹងចំពោះ«មូលនិធិកសាងហេដ្ឋារចនាសម្ព័ន្ធ​តាមបណ្ដោយព្រំដែន» នេះដែរ។ លោក សរ សុពុត្រា ចាត់ទុកថា នេះ គឺជាគំនិតផ្តួចផ្តើមដ៏មានសារៈសំខាន់ដែលបានគិតដល់ឧត្តមប្រយោជន៍ជាតិ និងប្រជាជនរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ ដោយសារតែបែបនេះហើយ លោកបានប្រកាសតាមហ្វេសប៊ុកថា៖ «សូមចូលរួមចំណែកតាមរយៈការកាត់បៀរវត្សប្រចាំខែរបស់ខ្ញុំបាទ ចំនួន៥០% គិតចាប់ពីខែសីហា ដល់ខែធ្នូ ឆ្នាំ២០២៤នេះតទៅ»។

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រកាសបង្កើត«មូលនិធិកសាងហេដ្ឋារចនាសម្ព័ន្ធ​តាមបណ្ដោយព្រំដែន​» កាលពីថ្ងៃទី២២ ខែសីហា ឆ្នាំ២០២៤ កន្លងទៅ។ សម្តេចនាយករដ្ឋមន្រ្តី បានបញ្ជាក់ឱ្យដឹងថា ការបង្កើតមូលនិធីនេះ មានគោលដៅ២​ គឺទី១ ដើម្បីកៀរគរថវិកាបន្ថែម និងទី២ ដើម្បីអនុញ្ញាតឱ្យប្រជាពលរដ្ឋបានចូលរួមដោយផ្ទាល់ជាមួយរាជរដ្ឋាភិបាលកម្ពុជាក្នុងការសាងហេដ្ឋារចនាសម្ព័ន្ធ​តាមបណ្ដោយព្រំដែន។ ប្រមុខរាជរដ្ឋាភិបាលកម្ពុជា ក៏បានអំពាវនាវដល់ប្រជាពលរដ្ឋទាំងអស់ចូលរួមនៅក្នុងមូលនិធិនេះ ដើម្បីកសាងផ្លូវគ្រវាត់ព្រំដែន និងជាការចូលរួមក្នុងបុព្វហេតុការពារបូរណភាពទឹកដីកម្ពុជា។

ដោយឡែក នៅថ្ងៃទី២៦ ខែសីហា នេះ សម្តេចធិបតី ហ៊ុន ម៉ាណែត បានបង្ហាញនូវលេខគណនីធនាគារនីមួយៗ ដើម្បីអាចឱ្យមន្រ្តីរាជការ និងប្រជាពលរដ្ឋចូលរួមបរិច្ចាគថវិកានៅក្នុង«មូលនិធិកសាងហេដ្ឋារចនាសម្ព័ន្ធ​តាមបណ្ដោយព្រំដែន» នេះ។ សម្តេចនាយករដ្ឋមន្រ្តី បានលើកឡើងថា៖ «រួមគ្នាកសាងហេដ្ឋារចនាសម្ព័ន្ធតាមបណ្តោយព្រំដែនរបស់យើង តាមរយៈមូលនិធិកសាងហេដ្ឋារចនាសម្ព័ន្ធតាមព្រំដែន។ សូមបងប្អូនប្រជាពលរដ្ឋខ្មែរទាំងក្នុង និងក្រៅប្រទេសចូលរួមឱ្យបានច្រើនកុះករ ដើម្បីជាស្មារតីជាតិខ្មែរក្នុងការចូលរួមពង្រឹង និងអភិវឌ្ឍតំបន់ព្រំដែនរបស់យើង»។

ក្រោយការអំពាវនាវ និងបង្ហាញនូវលេខគណនីធនាគារនីមួយៗនេះ មន្រ្តីរាជការ ឧកញ៉ា និងប្រជាពលរដ្ឋជាច្រើន បានចូលរួមបរិច្ចាគថវិកាភ្លាមៗទៅតាមលទ្ធភាពរបស់ខ្លួន។ ជាមួយនឹងការបរិច្ចាគ ពួកគេក៏បានអំពាវនាវបន្តឱ្យប្រជាពលរដ្ឋដទៃៗទៀតចូលរួមបរិច្ចាគទៅតាមលទ្ធភាពផងដែរ ដើម្បីរួមគ្នាជួយដល់ជាតិ ជាពិសេស គឺរួមគ្នាជួយដល់ការអភិវឌ្ឍ និងការពារតំបន់ព្រំដែន៕