លោក កែប ជុតិមា ចាត់ទុកគំនិតចង់ឱ្យកម្ពុជាដកខ្លួនពីកិច្ចសហប្រតិបត្តិការ CLV ថា ជាការព្រួយបារម្ភជ្រុល

អតីតអភិបាលខេត្តរតនគិរី និងបច្ចុប្បន្នជាតំណាងរាស្ត្រមណ្ឌលភ្នំពេញ លោក កែប ជុតិមា បានចាត់ទុកគំនិតដែលចង់ឱ្យកម្ពុជាដកខ្លួនចេញពីកិច្ចសហប្រតិបត្តិការតំបន់អភិវឌ្ឍន៍ កម្ពុជា-ឡាវ-វៀតណាម ឬហៅថា CLV-DTA ថា ជាការព្រួយបារម្ភជ្រុលតែមួយជ្រុង ហើយមិនសម្លឹងមើលពីផលប្រយោជន៍ដែលទទួលបានពីកិច្ចសហប្រតិបត្តិការនេះ។

ថ្លែងក្នុងកិច្ចសម្ភាសន៍ពិសេស ដែលផ្សព្វផ្សាយដោយរដ្ឋសភា លោក កែប ជុតិមា ប្រធានគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន នៃរដ្ឋសភា និងជាអតីតអភិបាលខេត្តរតនគីរី បានបញ្ជាក់ច្បាស់ៗទាក់ទងនឹងតំបន់ត្រីកោណអភិវឌ្ឍន៍ CLV-DTA ខណៈនាពេលថ្មីៗនេះ ក្រុមជ្រុលនិយមមួយចំនួន បានបំភ្លៃសភាពការណ៍ ក៏ដូចជាការធ្វើឱ្យភាន់ច្រឡំលើគម្រោងកិច្ចសហប្រតិបត្តិការ CLV  រហូតមានមតិខ្លះ ចង់ឱ្យរដ្ឋាភិបាលដកខ្លួនពីគម្រោងនេះទៀតផង។   

គំនិត ឬមតិ ដែលលើកឡើងចង់ឱ្យកម្ពុជាដកខ្លួនពីកិច្ចសហប្រតិបត្តិការអភិវឌ្ឍន៍តំបន់ត្រីកោណកម្ពុជា​-ឡាវ-វៀតណាម​ ត្រូវបានលោក កែប ជុតិមា យល់ឃើញថា ជាមតិមួយរបស់មហាជន ដែលជាការគិតគូរមួយរបស់ពួកគាត់ ប៉ុន្តែសម្រាប់លោក គិតថា ដើម្បីវាយតម្លៃថា កម្ពុជា ដក ឬ មិនដក​ គប្បីពិនិត្យលទ្ធផលជាក់ស្ដែង ដែលជាផលប្រយោជន៍ដែលប្រជាពលរដ្ឋនៅតំបន់នៃខេត្តទាំង៤នេះ មានខេត្តក្រចេះ ស្ទឹងត្រែង មណ្ឌលគិរី និងរតនគិរី ​ទទួលបាន។

លោក កែប ជុតិមា អតីតអភិបាលខេត្តរតនគិរី ដែលកាន់តំណែងនៅក្នុងចន្លោះឆ្នាំ១៩៩៥ ដល់១៩៩៩ បានរៀបរាប់ថា កិច្ចសហប្រតិបត្តិការ CLV-DTA ត្រូវបានបង្កើតឡើងតាំងពី១៩៩៩​​ ក្រោមគំនិតផ្ដួចផ្ដើមរបស់សម្ដេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា ដែលគិតមកដល់ពេលនេះ មានអាយុកាល២៥ឆ្នាំ ហើយផលប្រយោជន៍ដែលទទួលបានពីកិច្ចសហប្រតិបត្តិការនេះដំបូងគេ គឺការលើកកម្ពស់ជីវភាពរបស់ប្រជាពលរដ្ឋនៅតំបន់នោះ។ លោក កែប ជុតិមា បានបង្ហាញការកត់សម្គាល់ថា មុន​ និងក្រោយមានកិច្ចព្រមព្រៀង ជីវភាពពលរដ្ឋមានផ្លាស់ប្ដូរច្រើន ទោះមិនរុងរឿង តែសមរម្យ ជាអាទិ៍ មានផ្ទះសម្បែង មធ្យោបាយធ្វើដំណើរជាម៉ូតូ ឡាន និងមានលទ្ធភាពប្រកបមុខរបរដោយសេរីភាព​ ពិសេសសុខសន្តិភាពពេញលេញ មិនមានការភ័យខ្លាចអ្វីឡើយ។

តាមការគូសបញ្ជាក់បន្ថែមរបស់លោក កែប ជុតិមា តាមរយៈគម្រោងនេះ បានខេត្តភូមិភាគឦសានកម្ពុជាប្រែមុខមាត់ថ្មី មានការរីកចម្រើនគួរឱ្យកត់សម្គាល់យ៉ាងឆាប់រហ័ស ទាំងហេដ្ឋារចនាសម្ព័ន្ធ និងការវិនិយោគពីក្រុមហ៊ុនឯកជន។ លោកអតីតអភិបាលខេត្តរូបនេះ ថា ២៥ឆ្នាំមកនេះ ប្រព័ន្ធហេដ្ឋារចនាសម្ព័ន្ធស្អេកស្កះ ផ្លូវខ្វាត់ខ្វែង រហូតមានផ្លូវក្រវាត់ព្រំដែន ព្រមទាំងហេដ្ឋារចនាសម្ព័ន្ធរូបវន្តច្រើនទៀត​ ដែលងាយស្រួលក្នុងការធ្វើដំណើរ ក៏ដូចជាការតភ្ជាប់ទៅខេត្តផ្សេងៗ។ មិនត្រឹមតែប៉ុននេះ នៅពេលមានហេដ្ឋារចនាសម្ព័ន្ធ ហើយមានកិច្ចព្រមព្រៀងបែបនេះ ការតភ្ជាប់កម្ពុជា ទៅក្នុងសមាហរណកម្មជាមួយប្រទេសជាតិខាង គឺឡាវ និងវៀតណាម បន្ទាប់គឺសហគមន៍អាស៊ាន ដែលក្នុងគោលការណ៍អាស៊ាន​ ប្រទេសជាសមាជិកទាំងអស់ត្រូវតែធ្វើសមាហរណកម្មជាមួយគ្នា។

ក្នុងន័យនេះ លោក កែប ជុតិមា ចង់បញ្ជាក់ថា កិច្ចសហប្រតិបត្តិការ CLV បានភ្ជាប់កម្ពុជាទៅក្នុងអាស៊ាន ហើយមិនត្រឹមតែតំបន់ទេ ក៏នឹងភ្ជាប់កម្ពុជាទៅពិភពលោក និងអន្តរជាតិ ដែលនេះជាចំណុចសំខាន់ណាស់។ លោក សង្កត់ធ្ងន់ថា កម្ពុជាមិនអាចនៅឯកោតែឯងបានទេ​ ខណៈពិភពលោកកំពុងធ្វើអន្តរជាតិភាវូបនីយកម្ម។ ដូច្នេះ កម្ពុជា មានឱកាសពេញលេញក្នុងការតភ្ជាប់ ដែលផ្ដល់ផលប្រយោជន៍ឱ្យគ្នាទៅវិញទៅមក។

ពាក់ព័ន្ធនឹងការវិនិយោគ គឺបានប្រែក្លាយតំបន់ដាច់ស្រយាល ដែលប្រជាជនភាគច្រើនជាជនជាតិភាគតិច ទៅជាតំបន់មានការអភិវឌ្ឍយ៉ាងសម្បើម ដែលមានការវិនិយោគលើដំណាំកសិ-ឧស្សាហកម្មប្រភេទធំ រាប់ម៉ឺនហិកតា ជាអាទិ៍ ចេក កៅស៊ូ ស្វាយ ស្វាយចន្ទី និងដំំណាំផ្សេងៗជាច្រើនទៀត ដែលបាននាំចេញទៅទីផ្សារខាងក្រៅ ខណៈនៅខេត្តមណ្ឌលគិរី ក៏មានរ៉ែមាស។ នេះជាការលើកឡើងរបស់លោក កែប ជុតិមា ដដែល។

លោក ថា បើគ្មានគម្រោងនេះ ប្រហែលជាគ្មានទេក្រុមហ៊ុនមកវិនិយោគនៅតំបន់ដាច់ស្រយាលទាំងនេះ។ ដោយឡែក ផលប្រយោជន៍ដែលចាត់ទុកថា ជាអាយុជីវិតរបស់លោក ហើយបានសម្រេចជាលទ្ធផលជាក់ស្ដែង ក្រោមកិច្ចសហប្រតិបត្តិការ CLV នេះ គឺការបោះបង្គោលព្រំដែន ខណ្ឌចែកព្រំដែនរវាងកម្ពុជា ឡាវ និងវៀតណាម។  

ឈរលើផលប្រយោជន៍ខាងលើនេះ លោក កែប ជុតិមា ចាត់ទុកមតិដែលចង់ឱ្យកម្ពុជាគួរដកចេញពីកិច្ចព្រមព្រៀង ថា ជាការគិតគូរស្រមោលស្រមៃ ជាការព្រួយបារម្ភមួយជ្រុង តែសំខាន់ភាពជាក់ស្ដែង គឺជាឧត្តមប្រយោជន៍ដែលទទួលបានពេលនេះ និងទៅអនាគត៕